ലോകകിരീടം ഇനിയും സ്വപ്നം... ലിയോ തലകുനിച്ച് മടങ്ങുന്നു...

കസാൻ: അ‍ർജൻറീനയുടെ നീലയും വെള്ളയും ജഴ്സിയിൽ ലോകകിരീടം എടുത്തുയർത്തുന്നത് അയാൾ സ്വപ്നം കാണാൻ തുടങ്ങിയിട്ട് വ‍ർഷങ്ങളായി. 2014ൽ ഫൈനൽ വരെയെത്തിയെങ്കിലും തോറ്റ് മടങ്ങി. 2018ൽ ശരാശരി ടീമിനെ മുന്നിൽ നിന്ന് നയിച്ചെങ്കിലും പ്രീ ക്വാ‍ർട്ടറിൽ ആ പത്താം നമ്പറുകാരൻ ലിയോ തലകുനിച്ച് മടങ്ങുന്നു.

ഈ ലോകകപ്പിൽ ഒന്നാം റൗണ്ടിൽ അർജൻറീന പതറി കളിച്ചിട്ടും മെസ്സി പ്രതീക്ഷ കൈവിട്ടില്ല. ക്രൊയേഷ്യക്കെതിരെ വലിയ പരാജയം ഏറ്റ് വാങ്ങിയിട്ടും, അ‍ർജൻറീനക്കായി ലോകകപ്പ് ഉയ‍ർത്താതെ കളി നിർത്തില്ലെന്ന് അദ്ദേഹം പ്രഖ്യാപിച്ചു. നൈജീരിയക്കെതിരെ വിജയിച്ച് ടീം വീണ്ടും പ്രതീക്ഷ നൽകിയെങ്കിലും എംബാപ്പെയെന്ന 19കാരനും കൂട്ടരും നീലപ്പടയാളികൾക്ക് പുറത്തേക്കുള്ള വഴികാട്ടി.

മത്സരശേഷം ഫ്രഞ്ച് താരം ബെഞ്ചമിൻ മെൻഡിയാണ് ആദ്യം മെസ്സിയെ ഹസ്തദാനം ചെയ്യുന്നത്. പിന്നീട് എംബാപ്പെയെത്തി, ശേഷം ഫ്രാൻസ് ടീമിലെ മുഴുവൻ പേരും. ഒരു പക്ഷേ ലിയോയുടെ അവസാന ലോകകപ്പായിരിക്കും ഇത്.

ഫ്രഞ്ച് താരങ്ങളെ അഭിനന്ദിച്ച ശേഷം മെസ്സി തലകുനിച്ച് തന്നെ നിന്നു. ഫ്രാൻസിൻെറ ആഘോഷം നോക്കി നിരാശനായി. കഴിഞ്ഞ പത്ത് വ‍ർഷത്തിലധികമായ ലോകഫുട്ബോൾ അടക്കി വാഴുന്ന ലിയോക്ക് ഇത്തവണയും നിരാശയോടെ മടക്കം.