കെയ‍്‍നിൻെറ നേതൃത്വത്തിൽ ഇംഗ്ലണ്ട് യുവനിരയുടെ കുതിപ്പ്

മോസ്കോ: ഏകദേശം രണ്ട് പതിറ്റാണ്ടുകൾക്ക് ശേഷം ലോകകപ്പിൽ ഇംഗ്ലണ്ട് മികച്ച കുതിപ്പ് നടത്തുകയാണ്. വർഷങ്ങൾക്ക് ശേഷം അവർ ലോകകപ്പിൻെറ സെമിഫൈനലിൽ എത്തിയിരിക്കുന്നു. കാലങ്ങളായി വേട്ടയാടിയിരുന്ന പെനാൽറ്റി പരാജയം ഇത്തവണ തിരുത്തി. ഒന്നാം റൗണ്ടിൽ തന്നെ മികച്ച വിജയങ്ങൾ. ഹാരി കെയ്ൻ എന്ന ക്യാപ്റ്റന് കീഴിൽ ഇംഗ്ലണ്ടിൻെറ യുവനിര കുതിപ്പ് തുടരുകയാണ്.

24കാരനായ കെയ്ൻ എന്ന ഇംഗ്ലണ്ട് ക്യാപ്റ്റൻ ഇത്തവണ ലോകകപ്പിലെ ടോപ് സ്കോററാണ്. ഈ ലോകകപ്പിലെ ഏറ്റവും മികച്ച യുവനിര ഇംഗ്ലണ്ടിൻേറത് തന്നെയാണ്. 23കാരനായ സ്റ്റെർലിങ് ആണ് ഇംഗ്ലണ്ട് ആക്രമണത്തിൻെറ കുന്തമുന. 22കാരനായ ഡെലെ അലി കഴിഞ്ഞ മത്സരത്തിൽ സ്വീഡനെതിരെ ഗോളടിച്ച് മിന്നുന്ന പ്രകടനം കാഴ്ച വെച്ചു. 24കാരനായ ജോർദാൻ പിക്ക് ഫോർഡ് എന്ന ഗോൾകീപ്പർ.

യുവതാരങ്ങളുടെ മികച്ച പ്രകടനം തന്നെയാണ് ഇംഗ്ലണ്ടിനെ മുന്നോട്ട് നയിക്കുന്നത്. കപ്പിലേക്ക് ഇനി ഇംഗ്ലണ്ടിന് മുന്നിൽ രണ്ട് മത്സരങ്ങൾ മാത്രമാണുള്ളത്. ഈ യുവനിര കപ്പും കൊണ്ട് പോയാൽ അത് പുതിയ ചരിത്രം തന്നെയാവും.