വനിതാ ലോകകപ്പ് ഫുട്ബോള്‍: നാലാം കിരീടമുയര്‍ത്തി അമേരിക്ക

ലിയോണ്‍: വനിതാ ലോകകപ്പ് ഫുട്ബോളില്‍ നാലാം കിരീടനേട്ടവുമായി അമേരിക്ക. നെതര്‍ലന്‍റ്സിനെ എതിരില്ലാത്ത രണ്ട് ഗോളുകള്‍ക്ക് പരാജയപ്പെടുത്തിയാണ് യുഎസ് ലോകകിരീടം നിലനിര്‍ത്തിയത്. കഴിഞ്ഞ ലോകകപ്പിലെ ചാമ്പ്യന്മാര്‍ കൂടിയാണ് അമേരിക്ക.

ആവേശകരമായ ഒരു മണിക്കൂര്‍ പോരാട്ടത്തിന് പിന്നാലെയായിരുന്നു ആധിപത്യം ഉറപ്പിച്ചുകൊണ്ടുള്ള അമേരിക്കയുടെ ഗോള്‍. ബോക്സിനകത്ത് അലക്സ് മോര്‍ഗനെ സ്റ്റെഫാനി വാന്‍ഡെര്‍ ഗ്രാട്ട് ഫൗള്‍ ചെയ്തത് നെതര്‍ലന്‍റ്സിന്‍റ തലവര മാറ്റി. വാറിന്‍റെ സഹായത്തോടെ റഫറി അമേരിക്കയ്ക്ക് അനുകൂലമായി പെനല്‍റ്റി വിധിച്ചു. മേഗന്‍ റാപിനോ പന്ത് കൃത്യമായി വലയിലെത്തിച്ച് അമേരിക്കയ്ക്ക് ലീഡ് നേടിക്കൊടുത്തു. 61ാം മിനുട്ടിലായി ഗോള്‍.

69ാം മിനുട്ടില്‍ ഓറഞ്ച് പടയുടെ പതനം പൂര്‍ണമാക്കിക്കൊണ്ട് അമേരിക്ക രണ്ടാം ഗോള്‍ നേടി. റോസ് ലെവല്ലയുടെ വകയായിരുന്നു രണ്ടാം ഗോള്‍. മത്സരത്തില്‍ 54 ശതമാനം ബോള്‍ പെസിഷന്‍ അമേരിക്കയ്ക്കായിരുന്നു. അമേരിക്ക പതിനേഴ് ഷോട്ടുകളുതിര്‍ത്തപ്പോള്‍ നെതല്‍ലന്‍റ്സ് അഞ്ച് ഷോട്ടുകള്‍ മാത്രമാണ് ലക്ഷ്യത്തിലേക്ക് ഉതിര്‍ത്തത്.