ക്രിസ്റ്റ്യാനോ റൊണാൾഡോയുടെ കാര്യത്തിൽ പേടിവേണ്ട; താരം അൽ നസറിനൊപ്പം ഇല്ലാതിരുന്നതിന്റെ കാരണം പുറത്ത്

സൗദി പ്രൊ ലീഗ് മിന്നും ക്ലബ്ബായ അൽ നസർ എഫ് സിയുടെ (Al Nassr FC) പോർച്ചുഗീസ് സൂപ്പർ താരം ക്രിസ്റ്റ്യാനോ റൊണാൾഡോ (Cristiano Ronaldo) പരിക്കിനെത്തുടർന്ന് പരിശീലനത്തിന് ഇറങ്ങിയില്ല എന്ന് ആശങ്ക. അൽ നസർ എഫ് സി യുടെ അടുത്ത മത്സരത്തിനു മുന്നോടിയായുള്ള പരിശീലനത്തിലാണ് സി ആർ 7 പങ്കെടുക്കാതിരുന്നത്. ഇതോടെ സൂപ്പർ താരത്തിന്റെ പരിക്ക് സംബന്ധിച്ച ആശങ്ക ആരാധകർക്ക് ഇടയിൽ ഉയർന്നു. എന്നാൽ, സി ആർ 7 ന് ഗുരുതര പരിക്ക് ഇല്ലെന്നും താരത്തിന് കുഴപ്പമില്ല എന്നുമാണ് ക്ലബ് വൃത്തങ്ങൾ അറിയിച്ചത്. അതേസമയം, ക്രിസ്റ്റ്യാനോ റൊണാൾഡോ പരിശീലനത്തിൽ പങ്കെടുക്കാതിരുന്നത് പരിക്ക് മൂലം അല്ല എന്നാണ് ക്ലബ്ബിനോട് അടുത്ത വൃത്തങ്ങൾ റിപ്പോർട്ട് ചെയ്തത്. അൽ നസറിന്റെ അവസാന മത്സരത്തിനിടെ ക്രിസ്റ്റ്യാനോ റൊണാൾഡോ ക്ഷീണിതനായിരുന്നു. ഇതിനു പിന്നാലെ താരം പരിശീലനത്തിൽ നിന്ന് വിട്ടുനിന്നതും ആശങ്കയ്ക്ക് ഇടയാക്കി.


എന്നാൽ, പരിക്കിന്റെ പ്രശ്നം അദ്ദേഹത്തിന് ഇല്ലെന്നതാണ് വിശ്വസനീയ കേന്ദ്രങ്ങൾ റിപ്പോർട്ട് ചെയ്തത്. അൽ തായ് എഫ് സിക്ക് എതിരായ മത്സരത്തിനിടെ ആയിരുന്നു സി ആർ 7 ക്ഷീണിതനായി അവശനായത്. മത്സരത്തിൽ പോർച്ചുഗൽ താരം നേടിയ ഹാട്രിക്കിന്റെ ബലത്തിൽ അൽ നസർ എഫ് സി 5 - 1 ന്റെ ആധികാരിക ജയം സ്വന്തമാക്കി. 64, 67, 87 മിനിറ്റുകളിൽ ആയിരുന്നു സി ആർ 7 ഗോൾ സ്വന്തമാക്കിയത്.

ക്രിസ്റ്റ്യാനോയും മെസിയും ഒരുമിച്ച് മുന്നേറ്റത്തിൽ, ഈ ടീം വേറെ ലെവൽ; ബ്രസീൽ ഇതിഹാസം തെരഞ്ഞെടുത്ത എക്കാലത്തെയും മികച്ച ഫുട്ബോൾ ഇലവൻ
ക്രിസ്റ്റ്യാനോ റൊണാൾഡോയുടെ കരിയറിലെ 64 -ാം ഹാട്രിക്കായിരുന്നു അൽ തായ് ക്ലബ്ബിന് എതിരേ പിറന്നത്. ഈ മത്സരത്തിനു ശേഷം ടീമിനൊപ്പം സൂപ്പർ താരം പരിശീലനം നടത്തിയില്ല. എന്നാൽ, വ്യക്തിഗത പരിശീലനം നടത്തുകയും ചെയ്തു.

2023 - 2024 സൗദി പ്രൊ ലീഗിലെ ടോപ് സ്കോററാണ് 39 കാരനായ ക്രിസ്റ്റ്യാനോ റൊണാൾഡോ. 23 മത്സരങ്ങളിൽ അൽ നസർ ജഴ്സി അണിഞ്ഞ പോർച്ചുഗൽ താരം 26 ഗോൾ സ്വന്തമാക്കി. ഒൻപത് അസിസ്റ്റും റൊണാൾഡോ സൗദി പ്രൊ ലീഗ് സീസണിൽ ഇതുവരെ നടത്തി. സൗദി പ്രൊ ലീഗ് ഗോൾ വേട്ടയിൽ രണ്ടാമതുള്ള അലക്സാണ്ടർ മിട്രോവിച്ചിനേക്കാൾ ( 22 ) നാല് ഗോൾ മുന്നിലാണ് സി ആർ 7. അസിസ്റ്റിൽ രണ്ടാമതും പോർച്ചുഗൽ താരം ഉണ്ട്.

ഫുട്ബോൾ കരിയറിൽ ക്രിസ്റ്റ്യാനോയ്ക്ക് ഇതുവരെ ആകെ 882 ഗോൾ ആയി. 900 ഗോളിലേക്ക് വെറും 18 എണ്ണത്തിന്റെ അകലം മാത്രമാണുള്ളത്. 2023 - 2024 സീസണിൽ ഈ ലക്ഷ്യം മറികടക്കാൻ ക്രിസ്റ്റ്യാനോയ്ക്ക് സാധിക്കുമോ എന്നതാണ് ആരാധകർ കാത്തിരിക്കുന്നത്. ഈ സീസണിൽ നടന്നില്ലെങ്കിലും 2024 കലണ്ടർ വർഷത്തിൽ 900 ഗോളിൽ റൊണാൾഡോ എത്തും എന്നാണ് ആരാധകരുടെ ഉറച്ച വിശ്വാസം.

ക്രിസ്റ്റ്യാനോ റൊണാൾഡോയ്ക്ക് സൗദിയിൽ രണ്ട് മുഖങ്ങൾ; ഒരു വലിയ നാണക്കേടും ഒപ്പം കിടിലൻ റെക്കോഡും സ്വന്തം
25 മത്സരങ്ങളിൽ 59 പോയിന്റുമായി അൽ നസർ ലീഗ് ടേബിളിൽ രണ്ടാം സ്ഥാനത്താണ്. 71 പോയിൻറുള്ള അൽ ഹിലാൽ എഫ് സി യാണ് ലീഗിൻറെ തലപ്പത്ത്. 25 മത്സരങ്ങളിൽ 22 പോയിന്റുള്ള അബ്ബ എഫ് സി തരം താഴ്ത്തൽ ഭീഷണിയിലാണ്. 18 ടീമുകൾ മത്സരിക്കുന്ന സൗദി പ്രൊ ലീഗിൽ നിലവിൽ 17 -ാം സ്ഥാനത്താണ് അബ്ബ എഫ് സി. 2023 - 2024 സീസണിൽ ആറ് ജയവും നാല് സമനിലയും മാത്രമാണ് അബ്ബ എഫ് സിക്ക് ഇതുവരെ ഉള്ളത്.