ഫുട്‌ബോളില്‍ ദൈവമുണ്ടെങ്കില്‍ അത് റൊണാള്‍ഡോയാണ്! മെസി അതുക്കും മേലെ!!

റയല്‍ മാഡ്രിഡ് ഹോം മാച്ചില്‍ ഒരു ഗോളിന് പിറകില്‍ നില്‍ക്കുന്നു. ക്ലബ്ബ് അനുകൂലികള്‍ക്ക് ടീമിന്റെ പ്രകടനത്തില്‍ അരിശം വന്നു. അവര്‍ കൂക്കി വിളിച്ചു, പ്രത്യേകിച്ച് റൊണാള്‍ഡോയെ. രണ്ടാം പകുതിയില്‍ റൊണാള്‍ഡോയെ മാറ്റി റൂഡ് വാന്‍ നിസ്റ്റല്‍ റൂയിയെ ഇറക്കാന്‍ കോച്ച് തീരുമാനിച്ചു. എന്നാല്‍, റൊണാള്‍ഡോ ആ നീക്കം തടഞ്ഞു. പതിനഞ്ച് മിനിറ്റ് കൂടി തനിക്ക് തരണം. അത് കഴിഞ്ഞിട്ട് പിന്‍വലിച്ചോളാന്‍ പറഞ്ഞു.

കോച്ച് പതിനഞ്ച് മിനിറ്റ് നേരം കൂടി റൊണാള്‍ഡോക്ക് അനുവദിച്ചു.15 മിനുട്ട് ആയപ്പോള്‍ സ്‌കോര്‍ 2-1. റയല്‍ മാഡ്രിഡില്‍ റൊണാള്‍ഡോയുടെ സഹതാരമായിരുന്ന ഇറ്റാലിയന്‍ സ്‌ട്രൈക്കര്‍ അന്റോണിയോ കസാനോയാണ് ഈ സംഭവം വിവരിച്ചത്. ഞാന്‍ പറയുന്നു ഫുട്‌ബോളില്‍ ദൈവമുണ്ടെങ്കില്‍ അത് റൊണാള്‍ഡോയാണ്. ഇപ്പോള്‍ എന്റെ നിരീക്ഷണം മെസി റൊണാള്‍ഡോയെക്കാള്‍ മുകളിലാണെന്നാണ് - കസാനോ പറയുന്നു.

Also Read: തുര്‍ക്കിയുടെ ഇതിഹാസ ഗോൾകീപ്പര്‍ റുസ്തു റെക്ബറിന് കൊവിഡ്- 19; സ്ഥിരീകരിച്ച് ഭാര്യ

ഡിയഗോ മറഡോണയേക്കാള്‍ മികച്ച താരം ലയണല്‍ മെസിയാണ്. മറഡോണ നാലോ അഞ്ചോ വര്‍ഷമാണ് മികച്ച ഫോമില്‍ കളിച്ചത്. മെസി പതിനഞ്ച് വര്‍ഷമായി ഒരേ ഫോമില്‍ തുടരുന്നു. 710 ഗോളുകള്‍, 300 അസിസ്റ്റുകള്‍. മറഡോണക്കാര്‍ ദയവ് ചെയ്ത് വസ്തുത അംഗീകരിക്കാന്‍ പഠിക്കണം - കസാനോ അഭിപ്രായപ്പെട്ടു.2006-07 സീസണില്‍ റയല്‍ മാഡ്രിഡിനൊപ്പം ലാ ലിഗ കിരീടം നേടിയ താരമാണ് കസാനോ. അതേ സമയം ബ്രസീലിയന്‍ റൊണാള്‍ഡോയുടെ മുന്‍ സഹതാരം കഫു കഴിഞ്ഞ ദിവസം അഭിപ്രായപ്പെട്ടത് ടെക്‌നിക്കിലും സ്‌കില്ലിലും നെയ്മറാണ് ഏറ്റവും മികച്ചത് എന്നാണ്. മെസി പോലും നെയ്മറിന് പിറകിലേ വരൂ എന്നും കഫു പറഞ്ഞു.