കോപ്പാ ലിബർട്ടഡോറസില്‍ ബ്രസീൽ- അർജന്‍റൈൻ പോര്!! തീപാറും പോരാട്ടം കാത്ത് ഫുട്ബോള്‍ ലോകം

റിയോ: ലാറ്റിനമേരിക്കൻ ഫുട്ബോളിലെ തീ പാറുന്ന പോരാട്ടത്തിനായി കാത്ത് ഫുട്ബോള്‍ ലോകം. ലാറ്റിനമേരിക്കക്കാരുടെ ക്ലബ് ലോകകപ്പായ കോപ്പ ലിബർട്ടഡോറസിലാണ് ആവേശപ്പോരാട്ടം അരങ്ങേറുന്നത്. ഫൈനലില്‍ ബ്രസീലിലെയും അർജന്റീനയിലെയും മുൻനിര ക്ലബ്ബുകള്‍ മുഖാമുഖം എത്തുന്നു. ഇത്തവണത്തെ ചാമ്പ്യൻഷിപ്പിന്റെ പ്രത്യേകത. കോപ്പാ ലിബർട്ടഡോറസ് കലാശപ്പോരാട്ടത്തില്‍ അർജന്റീനയിൽ നിന്നുള്ള റിവർപ്ളേറ്റും ബ്രസീലിയന്‍ ക്ലബ് ഫ്ലെമിംഗോയുമാണ് ഏറ്റുമുട്ടുക.

ഗ്രെമിയോയെ മറുപടിയില്ലാത്ത അഞ്ച് ഗോളുകൾക്ക് പരാജയപ്പെടുത്തിയാണ് സീക്കോയുടെ പിൻഗാമികൾ ഫൈനല്‍ ബെര്‍ത്ത് ഉറപ്പിച്ചത്. നീണ്ട 38 വർഷങ്ങൾക്ക് ശേഷം ഫ്ലെമെംഗോ കോപ്പ ലിബർട്ടഡോറസ് ഫൈനലിൽ പ്രവേശിച്ചിരിക്കുന്നത്. മാരക്കാനയിൽ നടന്ന മത്സരത്തില്‍ ഗ്രെമിയോയ്ക്ക് വേണ്ടി ഗാബിഗോൾ ഇരട്ട ഗോളടിച്ചു. വിംഗർ ബ്രൂണോ ഹെൻറിക്കെ സ്റ്റോപ്പർ ബാക്കുകളായ റോഡ്രിഗോ കായോ, പാബ്ലോ എന്നിവർ ഓരോ ഗോള്‍ വീതവും സ്വന്തമാക്കി.

Also Read: കൊൽക്കത്തയിൽ മഴയ്‍ക്കൊപ്പം ഗോള്‍മഴ!! ഹൈദരാബാദിനെ അ‍ഞ്ച് ഗോളുകള്‍ക്ക് തകര്‍ത്ത് എടികെ

അതേസമയം റിവർപ്ലേറ്റ് ബൊക്കാ ജൂനിയേഴ്സിനെ മറികടന്നാണ് ഫൈനലില്‍ എത്തിയിരിക്കുന്നത്. പരമ്പരാഗത എതിരാളികളായ ബൊക്കാ ജൂനിയേഴ്സിനോട് രണ്ടാം പാദ സെമിയിൽ ഒരു ഗോളിന് പരാജയപ്പെട്ട റിവർപ്ലേറ്റിന് ആദ്യ പാദ മത്സരത്തിലെ രണ്ടു ഗോളുകളുടെ ജയമാണ് തുണയായത്.

ചിലിയിലെ സാന്‍റിയാഗോയില്‍ നവംബർ 23 നാണ് ഫൈനല്‍ പോരാട്ടം നടക്കുക. റിവർപ്ലേറ്റാണ് നിലവിലെ കോപ്പാ ലിബർട്ടഡോറസ് ജേതാക്കൾ. ഇക്കുറി തീപാറുന്ന പോരാട്ടമാകും ഫൈനലില്‍ നടക്കുക. ബ്രസീൽ- അർജന്‍റീന വൈര്യം പ്രതിഫലിക്കുന്ന കപ്പായതിനാല്‍ ലോകകപ്പിന്‍റെ അതേ പ്രാധാന്യത്തോടെയാണ് കോപ്പാ ലിബർട്ടഡോറസിനേയും കാണുന്നത്.