വഴങ്ങിയത് ഏഴ് ഗോളുകള്‍; പ്രീസീസണില്‍ റയലിന് നാണം കെട്ട തോല്‍വി

അത്ലറ്റികോ മാഡ്രിഡിനെതിരായ പ്രീസീസണണ്‍ മത്സരത്തില്‍ റയല്‍ മാഡ്രിഡിന് നാണം കെട്ട പരാജയം. ബദ്ധവൈരികളായ അത്ലറ്റികോ മൂന്നിനെതിരെ ഏഴ് ഗോളുകള്‍ക്കാണ് റയല്‍ മാഡ്രിഡിനെ പരാജയപ്പെടുത്തിയത്. അത്ലറ്റികോയുടെ കുന്തമുന ഡീഗോ കോസ്റ്റ മാത്രം റയലിന്‍റെ വലയില്‍ നാല് ഗോളുകള്‍ നിക്ഷേപിച്ചു. ഇന്ന് പുലര്‍ച്ചെ നടന്ന മത്സരത്തിലാണ് റയല്‍ മാഡ്രിഡിന് അത്ലറ്റികോയില്‍ നിന്നും നാണം കെട്ട പരാജയം ഏറ്റുവാങ്ങേണ്ടി വന്നത്.

മിന്നുന്ന പ്രകടനമാണ് സിമിയോണിയുടെ കുട്ടികള്‍ റയലിനെതിരെ പുറത്തെടുത്തത്. അത്ലറ്റികോയ്ക്കായി ആദ്യമിനുട്ടില്‍ തന്നെ ഡീഗോ കോസ്റ്റ് ഗോള്‍ കണ്ടെത്തി. എട്ടാം മിനുട്ടില്‍ ജോ ഫെലിക്സും പിന്നാലെ 19ാം മിനുട്ടില്‍ ഏഞ്ചല്‍ കൊറേയും അത്ലറ്റികോയുടെ ലീഡുയര്‍ത്തി. 28ാം മിനുട്ടില്‍ കോസ്റ്റയുടെ വക രണ്ടാം ഗോള്‍. ആദ്യപകുതിയുടെ അവസാന മിനുട്ടില്‍ ലഭിച്ച പെനല്‍റ്റി ഡീഗോ കോസ്റ്റ വീണ്ടും വലയിലെത്തിച്ചതോടെ അത്ലറ്റികോയുടെ ലീഡ് അഞ്ചായി ഉയര്‍ന്നു. എന്നാല്‍ ആദ്യപകുതിയില്‍ മറുപടി പറയാന്‍ റയലിന് കഴിയാതെ പോയി.

അത്ലറ്റികോ 5-0 റയല്‍ എന്ന നിലയിലാണ് രണ്ടാം പകുതി ആരംഭിക്കുന്നത്. ആറ് മിനുട്ടിനകം അത്ലറ്റികോ വീണ്ടും റയലിന്‍റെ വലയില്‍ പ്രകമ്പനം തീര്‍ത്തു. മത്സരത്തിലെ ഡാഗോ കോസ്റ്റയുടെ നാലാമത്തെ ഗോള്‍. എന്നാല്‍ 59ാം മിനുട്ടില്‍ റയല്‍ തിരിച്ചടിച്ചു. നാച്ചോയുടെ വകയായിരുന്നു. നാണക്കേടൊഴിവാക്കിക്കൊണ്ടുള്ള റയലിന്‍റെ ഗോള്‍. 70ാം മിനുട്ടില്‍ അത്ലറ്റികോയുടെ പട്ടിക പൂര്‍ത്തിയാക്കിക്കൊണ്ട് വിറ്റോളോ ഏഴാം ഗോള്‍ സ്വന്തമാക്കി. പിന്നാലെ ലഭിച്ച പെനല്‍റ്റി വലയിലെത്തിച്ച് കരിം ബെന്‍സെമയും 89ാം മിനുട്ടില്‍ ഹാവിയര്‍ ഹെര്‍ണാണ്ടസും റയലിനായി രണ്ട് ഗോളുകള്‍ കൂടി കൂട്ടിച്ചേര്‍ത്തു. മത്സരത്തിന്‍റെ പൂര്‍ണസമയം അവസാനിച്ചപ്പോള്‍ അത്ലറ്റികോ 7-3 റയല്‍.