UEFA Champions League 2019-20: യുവന്‍റസിനെ സമനിലയില്‍ തളച്ച് അത്‍ലറ്റികോ മാഡ്രിഡ്

ചാമ്പ്യന്‍സ് ലീഗിലെ ആദ്യ മത്സരത്തില്‍ ഇറ്റാലിയന്‍ ചാമ്പ്യന്മാര്‍ക്ക് നിരാശ. ജയിച്ചെന്ന് കരുതി ആശ്വസിച്ച് നിന്ന യുവന്‍റസിന് മത്സരത്തിന്‍റെ അവസാന നിമിഷം സമനിലയില്‍ കുടുക്കിയാണ് അത്ലറ്റികോ മാഡ്രിഡ് തിരിച്ചടി നല്‍കിയത്. മത്സരം പൂര്‍ണസമയം അവസാനിക്കുമ്പോള്‍ രണ്ട് വീതം ഗോളുകള്‍ നേടിയാണ് ഇരുടീമുകളും സമനിലയില്‍ പിരിഞ്ഞത്.

ഗ്രൂപ്പില്‍ ആദ്യത്തെ മൂന്ന് പോയിന്‍റുമായി മടങ്ങാമെന്ന യുവന്‍റസ് മോഹങ്ങളാണ് അവസാന മിനുട്ടുകളില്‍ ഹെരേരയുടെ തലയില്‍ തട്ടിത്തകര്‍ന്നുപോയത്. മത്സരത്തില്‍ സിംഹഭാഗവും രണ്ട് ഗോളിന്‍റെ ലീഡ് പുലര്‍ത്തിയ യുവന്‍റസിന് പെട്ടെന്നായിരുന്നു തിരിച്ചടിയേറ്റത്. എഴുപതാം മിനുട്ടിലും തൊണ്ണൂറാം മിനുട്ടിലും വഴങ്ങിയ രണ്ട് ഗോളുകളാണ് യുവന്‍റസിന് മൂന്ന് പോയിന്‍റ് നഷ്ടമാക്കിയത്.

Also Read: ഇറ്റാലിയന്‍ ഫുട്ബോളില്‍ വംശീയത വേരുറപ്പിക്കുന്നുവെന്ന് വിവേചന വിരുദ്ധ സമിതി

ഗോള്‍ രഹിതമായിരുന്നു യുവന്‍റസ്- അത്ലറ്റികോ മത്സരത്തിലെ ആദ്യ പകുതി. എന്നാല്‍ 48ാം മിനുട്ടില്‍ ക്വാഡ്രാഡോയിലൂടെ യുവന്‍റസ് ലീഡ് കണ്ടെത്തി. ഏറെ വൈകാതെ മറ്റൗഡിയിലൂടെ ഇറ്റാലിയന്‍ ചാമ്പ്യന്മാര്‍ രണ്ടാം ഗോളും സ്വന്തമാക്കി. ഈ സമയങ്ങളിലെല്ലാം മത്സരം പൂര്‍ണമായും യുവന്‍റസിന്‍റെ കൈകളില്‍ തന്നെയായിരുന്നു. 70 മിനുട്ട് വരെ ഈ സ്ഥിതി തുടര്‍ന്നു. യുവന്‍റസ് ഏറെക്കുറെ ജയമുറപ്പിച്ചിരുന്നു.

Also Read: മെസിയേക്കാള്‍ കൂടുതല്‍ ബാലന്‍ ഡി ഓര്‍ താന്‍ അര്‍ഹിക്കുന്നുവെന്ന് റൊണാള്‍ഡോ

എന്നാല്‍ 70ാം മിനുട്ടില്‍ കളി മാറി. സ്റ്റീഫന്‍ സാവിച്ച് ഒരു ഗോളിലൂടെ അത്ലറ്റികോയ്ക്ക് ശ്വാസം തിരിച്ചുനല്‍കി. തുടര്‍ന്നങ്ങോട്ട് സമനില പിടിക്കാനുള്ള മികച്ച മുന്നേറ്റങ്ങളാണ് അത്ലറ്റികോയുടെ ഭാഗത്ത് നിന്നും ഉണ്ടായത്. 90ാം മിനുട്ടില്‍ അവര്‍ അതില്‍ വിജയിക്കുകയും ചെയ്തു. ഹെക്ടര്‍ ഹരേരയുടെ ഒരു കിടിലന്‍ ഹെഡറിലൂടെ അത്ലറ്റികോ സമനില സ്വന്തമാക്കി.

അതേസമയം യുവേഫ ചാമ്പ്യന്‍സ് ലീഗില്‍ പിഎസ്ജി തങ്ങളുടെ അരങ്ങേറ്റം ഗംഭീരമാക്കി. സ്പാനിഷ് വമ്പന്മാരായ റയൽ മാഡ്രിഡിനെ അട്ടിമറിച്ചാണ് പിഎസ്ജി ആദ്യമത്സരം അവിസ്മരണീയമാക്കിയത്. നെയ്മർ, കിലിയന്‍ എംബാപ്പെ, എഡിന്‍സണ്‍ കവാനി എന്നീ മുന്‍നിര താരങ്ങള്‍ ഒന്നും ഇല്ലാതെ ഇറങ്ങിയിട്ടും പാരീസിൽ പി എസ് ജി തന്നെ ജേതാക്കളായി. ഇന്ന് നടന്ന ഗ്രൂപ്പിലെ ആദ്യ മത്സരത്തിൽ എതിരില്ലാത്ത മൂന്നു ഗോളുകൾക്കാണ് റയല്‍ മാഡ്രിഡിന്‍റെ പരാജയം. പിഎസ്ജിക്കായി അർജന്‍റൈൻ താരം ഡി മരിയ രണ്ട് ഗോളുകൾ സ്വന്തമാക്കി.