Durand Cup 2019: ബെംഗളുരു എഫ്സിക്കും കൊല്‍ക്കത്തയ്ക്കും സമനില

കൊല്‍ക്കത്ത: ഡ്യുറന്‍റ് കപ്പ് ഫുട്ബോളില്‍ ഐഎസ്എല്‍ ചാമ്പ്യന്മാരായ ബെംഗളുരു എഫ്‌സിക്ക് സമനിലക്കുരുക്ക്. ആര്‍മി റെഡ്ഡിനെതിരെ ആദ്യഘട്ടത്തില്‍ ഒരു ഗോളിന് പിന്നില്‍ നിന്ന ശേഷമായിരുന്നു ബെംഗളുരു സമനില നേടിയത്. അതേസമയം മറ്റൊരു മത്സരത്തില്‍ മുന്‍ ചാമ്പ്യന്മാരായ അമര്‍ തൊമര്‍ കൊല്‍ക്കത്തയും സമനില വഴങ്ങി.

ഇന്ത്യന്‍ നേവിക്കെതിരായ മത്സരത്തില്‍ 1-1 എന്ന സ്‌കോറിനായിരുന്നു കൊല്‍ക്കത്ത സമനിലയില്‍ കുരുങ്ങിയത്. എടികെയുടെ ഗോള്‍കീപ്പര്‍ നടത്തിയ നിര്‍ണ്ണായക രക്ഷപ്പെടുത്തലുകളാണ് ടീമിന് സമനിലനേടിക്കൊടുത്തത്. അല്ലാത്തപക്ഷം നേവിക്ക് മുമ്പില്‍ എടികെ അടിയറവ് പറയേണ്ടി വന്നേനെ.

ബെംഗളൂരുവിനെതിരായ മത്സരത്തില്‍ ആര്‍മി റെഡ്ഡിന് വേണ്ടി ലിന്‍റണ്‍ ഷില്‍ ആണ് ആദ്യ ഗോള്‍ സ്വന്തമാക്കിയത്. ആദ്യ പകുതിക്ക് പിന്നാലെ ലഭിച്ച അധിക സമയത്ത്, 45+ 4ാം മിനിറ്റിലായിരുന്നു ഗോള്‍. ഇതോടെ ആര്‍മി റെഡ് മത്സരം കൈപ്പിടിയിലൊതുക്കുമെന്ന പ്രതീതിയുളവാക്കി. അവസാന മിനിറ്റുകളില്‍ എതിര്‍ ഗോള്‍മുഖത്ത് നിരന്തരം ആക്രമണം അഴിച്ചുവിട്ട ബെംഗളൂരു എതിരാളികളെ കടുത്ത സമ്മര്‍ദ്ദത്തിലാക്കി. അധികം വൈകാതെ നേടിയെടുക്കുകയും ചെയ്തു.

പുതുമുഖ താരം സുരേഷ് വാങ്ജം ആണ് ബെംഗളുരുവിന്‍റെ സമനില ഗോള്‍ സ്വന്തമാക്കിയത്. തോല്‍വിയിലേക്ക് പോകുകയായിരുന്ന മത്സരത്തിന്‍റെ 81-ാം മിനിറ്റിലായിരുന്നു ഗോള്‍. ഓഗസ്ത് 14ന് ഈസ്റ്റ് ബംഗാളുമായാണ് ബെംഗളുരുവിന്‍റെ അടുത്ത മത്സരം.

രണ്ട് തവണ ഐഎസ്എല്‍ ചാമ്പ്യന്മാരായ എടികെയും ഒരു ഗോളിന് പിന്നില്‍ നിന്ന ശേഷം തിരിച്ചടിക്കുകയായിരുന്നു. ഇന്ത്യന്‍ നേവി 19-ാം മിനിറ്റില്‍ ഹരികൃഷ്ണനിലൂടെ ലീഡ് നേടി. ആദ്യ പകുതിയില്‍ ടീം ഒരു ഗോളിന് മുന്നില്‍ നില്‍ക്കുകയും ചെയ്തു. എന്നാല്‍, കളി തീരാന്‍ മിനിറ്റുകള്‍ ശേഷിക്കെയായിരുന്നു എടികെ സമനില പിടിച്ചെടുത്തത്. 88-ാം മിനിറ്റില്‍ ലഭിച്ച പെനാല്‍റ്റി പ്രബിര്‍ ദാസ് കൃത്യമായി വലയിലെത്തിച്ചു. ഓഗസ്ത് എട്ടിന് മോഹന്‍ ബഗാനുമായാണ് എടികെയുടെ രണ്ടാമത്തെ മത്സരം.