റിയാദ്: സൗദി അറേബ്യയില് നടന്ന ബ്രസീല് - അര്ജന്റീന സൗഹൃദ മത്സരത്തിന് പിന്നാലെ അര്ജന്റൈന് ക്യാപ്റ്റന് ലയണല് മെസിക്കെതിരെ ഗുരുതര ആരോപണം ഉന്നയിച്ച് ബ്രസീലിന്റെ ക്യാപ്റ്റന് തിയാഗോ സില്വ. മത്സരത്തിനിടെ മെസി റഫറിമാരെ സ്വാധീനിക്കാന് നിരന്തരം ശ്രമിക്കുകയാണെന്ന് തിയാഗോ സില്വ കുറ്റപ്പെടുത്തി. കളിക്കളത്തില് കൂടുതല് ബഹുമാനത്തോടെയും മര്യാദയോടെയും പെരുമാറാന് മെസി തയ്യാറാകണമെന്നും സില്വ കൂട്ടിച്ചേര്ത്തു.
റിയാദില് നടന്ന മത്സരത്തില് പെനല്റ്റിയിലൂടെ ലഭിച്ച ഏക ഗോളിന് അര്ജന്റീന ബ്രസീലിനെ പരാജയപ്പെടുത്തിയിരുന്നു. ഇതിന് പിന്നാലെയാണ് മെസിക്കെതിരെ ഗുരുതര ആരോപണങ്ങളുമായി തിയാഗെ സില്വ രംഗത്തെത്തിയത്. കളിയുടെ നിയന്ത്രണം എപ്പോഴും തന്റെ കയ്യിലാക്കാന് മെസി ശ്രമിക്കും. അപകടകരമായ സ്ഥലങ്ങളില് വീണ് ഫ്രീകിക്കുകള് നേടാന് മെസി റഫറിയെ സ്വാധിനിക്കാന് ശ്രമിക്കുകയാണെന്നും സില്വ കുറ്റപ്പെടുത്തി.
Also Read: ആ പെരുമാറ്റം ശരിയായില്ല!! മത്സരത്തിനിടെ മെസി തനിക്കെതിരെ വിളിച്ചുപറഞ്ഞ കാര്യം വെളിപ്പെടുത്തി ബ്രസീല് കോച്ച്
റിയാദില് നടന്ന മത്സരത്തിലും മെസി പലപ്പോഴും ഇത്തരം ശ്രമങ്ങള് നടത്തിയിരുന്നു. എന്നാല് ഇത് ഏതെങ്കിലും ഒരു മത്സരത്തിലെ കാര്യമല്ല. മിക്ക മത്സരങ്ങളിലും മെസി ഈ അടവ് തന്നെയാണ് പ്രയോഗിക്കുന്നത്. സ്പെയിനിലെ നിരവധി കളിക്കാരുമായി ഇക്കാര്യം സംസാരിച്ചപ്പോള് അവരെല്ലാം താരത്തെ കുറിച്ച് സമാന അഭിപ്രായമാണ് പങ്കുവെച്ചത്. മെസിയുടെ ഈ രീതി ശരിയല്ലെന്നും സില്വ പറഞ്ഞു.
മത്സരത്തിനിടെ ബ്രസീലിന്റെ കോച്ച് ടിറ്റെയ്ക്ക് എതിരെ മെസി മോശമായി പെരുമാറിയിരുന്നു. റഫറിയുമായി സംസാരിച്ചുകൊണ്ടിരിക്കുകയായിരുന്ന ടിറ്റെയോട് വാ അടക്കാനായിരുന്നു മെസി വിളിച്ചു പറഞ്ഞത്. മത്സരത്തിന് പിന്നാലെ ടിറ്റെ തന്നെയാണ് ഇക്കാര്യം വെളിപ്പെടുത്തിയത്. ഇതിനെ കുറിച്ച് ചോദിച്ചപ്പോള് വിദ്യാഭ്യാസം പ്രധാനമാണ് എന്നായിരുന്നു തിയാഗോ സില്വയുടെ പ്രതികരണം.