ചാമ്പ്യന്മാര്‍ക്ക് തുടക്കം പാളി; ലിവര്‍പൂളിനെതിരെ നാപോളിക്ക് ജയം

നിലവിലെ ചാമ്പ്യന്‍സ് ലീഗ് ജേതാക്കളായ ലിവര്‍പൂള്‍ എഫ്സിക്ക് പുതിയ സീസണില്‍ പരാജയത്തുടക്കം. മറുപടിയില്ലാത്ത രണ്ട് ഗോളുകള്‍ക്ക് നാപോളിയാണ് ചാമ്പ്യന്മാരെ മലര്‍ത്തിയടിച്ചത്. ഗോള്‍രഹിത ആദ്യപകുതിക്ക് പിന്നാലെ രണ്ടാം പകുതിയിലാണ് നാപോളി രണ്ട് ഗോളുകളും സ്വന്തമാക്കിയത്. നാപോളിക്കായി മെര്‍റ്റന്‍സ്, ലോറെന്‍റെ എന്നിവര്‍ ഗോള്‍ നേടി.

Also Read: മക്കള്‍ അത് കണ്ടാലുള്ള അപമാനം ഭയന്ന് താന്‍ ചാനല്‍ മാറ്റി; റൊണാള്‍ഡോയുടെ വെളിപ്പെടുത്തല്‍

ആദ്യപകുതിയില്‍ പ്രതിരോധത്തിലൂന്നിയ കളിയാണ് നാപോളി പുറത്തെടുത്തത്. ലിവര്‍പൂള്‍ ആക്രമണങ്ങളെ സമര്‍ത്ഥമായി തടഞ്ഞ നാപോളി രണ്ടാം പകുതിയില്‍ പ്രത്യാക്രമണത്തിന് നേതൃത്വം നല്‍കി. കിട്ടിയ അവസരങ്ങള്‍ മുതലാക്കിയ നാപോളി രണ്ട് ഗോളുകള്‍ ലിവര്‍പൂളിന്‍റെ വലയില്‍ നിക്ഷേപിക്കുകയും ചെയ്തു.

മത്സരത്തിന്‍റെ 80ാം മിനുട്ടില്‍ നാപോളിയുടെ കല്ലേഹോനിനെ ആന്‍ഡി റോബട്സണ്‍ ഫൗള്‍ ചെയ്തതിന് ലിവര്‍പൂളിന് വലിയ വില കൊടുക്കേണ്ടി വന്നു. റഫറിയും വാറും ഒരു പോലെ പെനല്‍റ്റി വിധിച്ചു. പെനല്‍റ്റി കിക്കെടുത്ത മെര്‍റ്റന്‍സ് യാതൊരു പിഴവും കൂടാതെ പന്ത് ലിവര്‍പൂളിന്‍റെ വലയിലെത്തിച്ചു.

Also Read: മെസിയുടെ തനിപ്പകർപ്പായി മകൻ; ഗോളടിയും ആഘോഷവും വൈറൽ!

മത്സരത്തിന്‍റെ ഇഞ്ചുറി ടൈമില്‍ രണ്ടാം ഗോള്‍ കൂടി സ്വന്തമാക്കി നാപോളി ലിവര്‍പൂളിന്‍റെ പതനം പൂര്‍ണമാക്കുകയായിരുന്നു. ലോറെന്‍റെയുടെ വകയായിരുന്നു വിജയഗോള്‍. ലിവര്‍പൂള്‍ പ്രതിരോധ താരം വിര്‍ജില്‍ വാന്‍ ഡിക്കിന്‍റെ ചെറിയ പിഴവില്‍ നിന്നുമായിരുന്നു ലോറെന്‍റെ രണ്ടാം ഗോള്‍ കണ്ടെത്തിയത്.