നെയ്മര്‍ സൂത്രശാലി, ചുവപ്പ് കാര്‍ഡ് വാങ്ങിയത് മന:പൂര്‍വ്വം!! കാരണം വെളിപ്പെടുത്തി ആരാധകര്‍

ഞായറാഴ്ച ബോര്‍ഡക്സിനെതിരെ നടന്ന മത്സരത്തില്‍ മൂന്നിനെതിരെ നാല് ഗോളുകള്‍ക്ക് പിഎസ്ജി വിജയം സ്വന്തമാക്കിയിരുന്നു. മത്സരത്തില്‍ എഡിന്‍സണ്‍ കവാനി, കിലിയന്‍ എമ്പാപ്പെ എന്നിവര്‍ പിഎസ്ജിക്കായി ഓരോ ഗോളും മാര്‍കീഞ്ഞ്യോ ഇരട്ടഗോളുകളും സ്വന്തമാക്കി. നെയ്മറിന് മത്സരത്തില്‍ ഗോള്‍ നേടാന്‍ സാധിച്ചിരുന്നില്ല. എന്നാല്‍ ഇതൊന്നുമല്ല പ്രശ്നം, മത്സരം തീരാന്‍ നിമിഷങ്ങള്‍ ബാക്കി നില്‍ക്കെ നെയ്മര്‍ ഒരു ചുവപ്പ് കാര്‍ഡ് വാങ്ങിയതെന്തിനെന്നാണ് ആരാധകര്‍ ചോദിക്കുന്നത്.

മത്സരത്തിന്‍റെ പൂര്‍ണസമയവും പിന്നിട്ട് പിഎസ്ജി വിജയത്തിലേക്ക് നീങ്ങിക്കൊണ്ടിരിക്കുകയായിരുന്നു. എന്നാല്‍ ഇഞ്ചുറി സമയത്ത് കളിച്ചുകൊണ്ടിരിക്കവേയാണ് നെയ്മര്‍ അനാവശ്യമായി ഒരു ഫൗള്‍ ചെയ്ത് ചുവപ്പ് കാര്‍ഡ് വാങ്ങിയത്. മത്സരം തീരാന്‍ നിമിഷങ്ങള്‍ മാത്രം ബാക്കി നില്‍ക്കെ അത്തരൊരും അനാവശ്യം ഫൗളും ചുവപ്പ് കാര്‍ഡും താരം മനപൂര്‍വ്വം വാങ്ങിച്ചെടുത്തതാണ് എന്നതാണ് ആരാധകര്‍ ഉന്നയിക്കുന്ന സംശയം.

സാധാരണ ഗതിയില്‍ നെയ്മറിനെതിരെ ക്രൂരമായ ഫൗളുകള്‍ തന്നെയാണ് എതിരാളികള്‍ ചെയ്യാറുള്ളത്. ഈ സാഹചര്യത്തില്‍ നെയ്മര്‍ തിരിച്ചൊരു ഫൗള്‍ ചെയ്യുന്നതോ ചുവപ്പ് കാര്‍ഡ് വാങ്ങുന്നതോ അസാധാരമായ കാര്യമാണെന്ന് പറയാനാവില്ല. എന്നാല്‍ കഴിഞ്ഞ മത്സരത്തില്‍ ഇതായിരുന്നില്ല സ്ഥിതി. നല്ല നിലയില്‍ പുരോഗമിച്ചു കൊണ്ടിരുന്ന മത്സരത്തില്‍ തികച്ചും അനാവശ്യമായിരുന്നു നെയ്മറിന്‍റെ ഫൗള്‍. താരം കാര്‍ഡ് മനപൂര്‍വ്വം വാങ്ങിയതാണെന്നും ഇതിന് പിന്നില്‍ ഒരു കാരണമുണ്ടെന്നുമാണ് ആരാധകര്‍ പറയുന്നത്.

2014 മുതല്‍ മുടങ്ങാതെ നെയ്മര്‍ പങ്കെടുക്കുന്ന പരിപാടിയാണ് ബ്രസീലിലെ റിയോ കാര്‍ണിവല്‍. താരത്തിന് സ്പെഷ്യല്‍ പരിഗണനയുണ്ടവിടെ. ഓരോ തവണയും കാര്‍ണിവലിന്‍റെ സമയമാകുമ്പോൾ എങ്ങനേയും നെയ്മര്‍ കാര്‍ണിവലിനെത്തും. അപ്പോള്‍ താരത്തിന് പരിക്കോ വിലക്കോ അങ്ങനെ എന്തേലുമായിരിക്കും. ഇതെല്ലാം വിവാദമാകാറുണ്ട്. ഇക്കുറിയും അനാവശ്യമായി ഒരു ചുവപ്പ് കാര്‍ഡ് വാങ്ങി അടുത്ത മത്സരം നഷ്ടപ്പെടുത്തിയത് കാര്‍ണിവലിന് പോകാനാണ് എന്നാണ് ആരാധകര്‍ പരിഹസിക്കുന്നത്.

ഇക്കുറി റിയോ കാര്‍ണിവലിന് താന്‍ ഉണ്ടാകില്ല എന്നായിരുന്നു നെയ്മര്‍ ഇന്‍സ്റ്റഗ്രാമിലൂടെ വ്യക്തമാക്കിയത്. കുറേ കാലമായി സ്ഥിരമായി പോകുന്നുണ്ട്. എന്നാല്‍ ഇത്തവണ ഉണ്ടാകില്ല. അതുകൊണ്ട് തന്നെ ഇക്കുറി വിവാദങ്ങള്‍ ഉണ്ടാകില്ലെന്നും അക്കാര്യത്തില്‍ താന്‍ സന്തോഷവാനാണെന്നുമായിരുന്നു പോസ്റ്റ്. മത്സരത്തിന് മുമ്പ് താരം പറഞ്ഞത് ഇതായിരുന്നുവെങ്കിലും ഒരു അവസരം കിട്ടിയപ്പോള്‍ നെയ്മര്‍ അത് കാര്‍ണിവലിനായി ഉപയോഗിച്ചു എന്നാണ് ആരാധകര്‍ പറയുന്നത്.