നെയ്മര്‍, എംബാപ്പെ, കവാനി ഇല്ലാഞ്ഞിട്ടും റയലിനെ അട്ടിമറിച്ച് പിഎസ്ജി

പാരീസ്: യുവേഫ ചാമ്പ്യന്‍സ് ലീഗില്‍ അരങ്ങേറ്റം ഗംഭീരമാക്കി പിഎസ്ജി. സ്പാനിഷ് വമ്പന്മാരായ റയൽ മാഡ്രിഡിനെ അട്ടിമറിച്ചാണ് പിഎസ്ജി ആദ്യമത്സരം അവിസ്മരണീയമാക്കിയത്. നെയ്മർ, കിലിയന്‍ എംബാപ്പെ, എഡിന്‍സണ്‍ കവാനി എന്നീ മുന്‍നിര താരങ്ങള്‍ ഒന്നും ഇല്ലാതെ ഇറങ്ങിയിട്ടും പാരീസിൽ പി എസ് ജി തന്നെ ജേതാക്കളായി. ഇന്ന് നടന്ന ഗ്രൂപ്പിലെ ആദ്യ മത്സരത്തിൽ എതിരില്ലാത്ത മൂന്നു ഗോളുകൾക്കാണ് റയല്‍ മാഡ്രിഡിന്‍റെ പരാജയം. പിഎസ്ജിക്കായി അർജന്‍റൈൻ താരം ഡി മരിയ രണ്ട് ഗോളുകൾ സ്വന്തമാക്കി.

Also Read: ഇറ്റാലിയന്‍ ഫുട്ബോളില്‍ വംശീയത വേരുറപ്പിക്കുന്നുവെന്ന് വിവേചന വിരുദ്ധ സമിതി

മത്സരം ആരംഭിച്ച് 14ആം മിനുട്ടിൽ തന്നെ പിഎസ്ജി ലക്ഷ്യം കണ്ടു. ബെർണാഡ് നൽകിയ പാസ് ഡിമറിയ മനോഹരമായി ഗോൾ മുഖത്തേക്ക് എയ്ത് വിട്ടപ്പോൾ തടയാൻ റയല്‍ ഗോള്‍ കീപ്പര്‍ കോർതുവയ്ക്ക് കഴിഞ്ഞില്ല. തന്‍റെ നിയർ പോസ്റ്റിലൂടെ പന്ത് വലയിലെത്തിയിട്ടും കോർതുവ കാഴ്ചക്കാരനായതോടെ പി എസ് ജിക്ക് ഒരു ഗോളിന്‍റെ ലീഡ്. അധികം വൈകാതെ ഡി മറിയ തന്നെ പി എസ് ജിയുടെ ലീഡ് ഇരട്ടിയാക്കി. 33ആം മിനുട്ടിൽ ആയിരുന്നു രണ്ടാം ഗോള്‍. ഒരു കിടിലന്‍ സ്ട്രൈക്കിലൂടെ ആയിരുന്നു ഡി മറിയയുടെ രണ്ടാം ഗോൾ.

Also Read: മെസിയേക്കാള്‍ കൂടുതല്‍ ബാലന്‍ ഡി ഓര്‍ താന്‍ അര്‍ഹിക്കുന്നുവെന്ന് റൊണാള്‍ഡോ

റയലിന്‍റെ പക്ഷത്ത് ഗാരെത് ബെയ്ല്‍, ഹസാർഡ്, ബെൻസീമ, ഹാമസ് എന്നിവർ ഒക്കെ ഉണ്ടായിട്ടും അവസരങ്ങൾ സൃഷ്ടിക്കുന്നതിലും സ്കോര്‍ കണ്ടെത്തുന്നതിലും റയൽ ഏറെ പിറകിലായി. രണ്ടാം പകുതിയിലും പി എസ് ജിക്ക് എതിരെ തിരിച്ചടിക്കാൻ റയലിനായില്ല. കളിയുടെ അവസാന നിമിഷം മുനിയർ പി എസ് ജിയുടെ മൂന്നാം ഗോൾ നേടി പട്ടിക പൂര്‍ത്തിയാക്കുകയായിരുന്നു. മത്സരത്തിലുടനീളം പിഎസ്ജിയുടെ സര്‍വ്വാധിപത്യമാണ് കാണാനായത്.