ജർമൻ ഫുട്ബോളർ ബാസ‍്‍റ്റിൻ ഷ്വെയ്ൻസ്റ്റീഗർ വിരമിച്ചു; ഇനി പുതിയ ലക്ഷ്യമെന്ന് സൂചന!

ലോകകപ്പ് നേടിയ ജർമൻ ടീം അംഗവും മാഞ്ചസ്റ്റർ യുണൈറ്റഡ്, ബയേൺ മ്യൂണിക്ക് മിഡ‍്‍ഫീൽഡറുമായിരുന്ന ബാസ‍്‍റ്റിൻ ഷ്വെയ്ൻസ്റ്റീഗർ പ്രൊഫഷണൽ ഫുട്ബോളിൽ നിന്ന് വിരമിച്ചു. 35ാം വയസ്സിലാണ് താരം വിരമിക്കൽ പ്രഖ്യാപിക്കുന്നത്. ഏറ്റവും അവസാനമായി ചിക്കാഗോ ഫയറിലാണ് അദ്ദേഹം കളിച്ചിരുന്നത്.

"പ്രിയപ്പെട്ട ആരാധകരേ... കളി അവസാനിപ്പിക്കാൻ സമയം ആയിരിക്കുന്നു. ഈ സീസണോടെ ഫുട്ബോൾ കരിയർ അവസാനിപ്പിക്കുകയാണ്," സോഷ്യൽ മീഡിയയിൽ ഷെയർ ചെയ്ത പോസ്റ്റിൽ ഷ്വെയ്ൻസ്റ്റീഗർ കുറിക്കുന്നു. കളിച്ച എല്ലാ ക്ലബ്ബുകളോടും ജർമൻ ദേശീയടീമിനോടും നന്ദി അറിയിക്കുന്നതായും അദ്ദേഹം പറഞ്ഞു.



Read More: പ്രീമിയർ ലീഗിൽ ഇത്തവണ ആര് കപ്പടിക്കും ? പ്രവചനവുമായി വെയ‍്‍ൻ റൂണി

പ്രൊഫഷണൽ ഫുട്ബോളർ എന്ന നിലയിൽ കരിയർ അവസാനിപ്പിച്ചുവെങ്കിലും ഈ മേഖലയിൽ തന്നെ തുടരുമെന്ന സൂചനയാണ് ഷ്വെയ്ൻസ്റ്റീഗർ നൽകുന്നത്. ജർമ്മൻ ഫുട്ബോൾ ടീമിൻെറ കോച്ചിങ് സ്റ്റാഫിൽ വൈകാതെ താരം ഇടംപിടിച്ചേക്കും. ജർമ്മനിയുടെ പരിശീലക സംഘത്തിലേക്ക് ഷ്വെയ്ൻസ്റ്റീഗറെ സ്വാഗതം ചെയ്യുന്നതായി കോച്ച് ജോക്വിം ലോവ് പ്രഖ്യാപിച്ച് കഴിഞ്ഞു.


2014ൽ ജർമനി ലോകകപ്പ് കിരീടം നേടിയപ്പോൾ ടീം അംഗമായിരുന്നു ഷ്വെയ്ൻസ്റ്റീഗർ. ദേശീയ ടീമിന് വേണ്ടി ഏറ്റവും കൂടുതൽ മത്സരങ്ങൾ കളിച്ചിട്ടുള്ള നാലാമത്തെ താരമാണ്. ജർമൻ ക്ലബ്ബായ ബയേൺ മ്യൂണിക്കിനായി 500ലധികം തവണ ബൂട്ടണിഞ്ഞിട്ടുണ്ട്. ഒമ്പത് തവണ ബുണ്ടസ‍്‍ലീഗ കിരീടവും ഒരു തവണ ചാമ്പ്യൻസ് ലീഗ് കിരീടവും നേടിയ ടീം അംഗമാണ്. 2015 മുതൽ 2017 വരെ മാഞ്ചസ്റ്റർ യുണൈറ്റഡിൽ കളിച്ചിരുന്നു. 2016ൽ അന്താരാഷ്ട്ര ഫുട്ബോളിൽ നിന്ന് വിരമിച്ചിരുന്നു.