ക്വാലാലംപൂര്: 2022ലെ ഖത്തര് ലോകകപ്പിനുള്ള യോഗ്യതാ മത്സരങ്ങള് ഇന്ത്യയ്ക്ക് താരതമ്യേന എളുപ്പമായേക്കും. യോഗ്യതാ റൗണ്ട് മത്സരങ്ങള്ക്കുള്ള നറുക്കെടുപ്പ് ഏഷ്യന് ഫുട്ബോള് കോണ്ഫെഡറേഷന് ആസ്ഥാനമായ ക്വാലാലംപൂരില് നടന്നു. ഖത്തര്, ഒമാന്, അഫ്ഗാനിസ്താന്, ബംഗ്ലാദേശ് എന്നിവര്ക്കൊപ്പം ഗ്രൂപ്പ് ഇയിലാണ് ഇന്ത്യ കളിക്കുക. അത്രയേറെ കരുത്തരല്ലാത്ത ടീമുകളാണ് ഇന്ത്യക്കൊപ്പം ഇ ഗ്രൂപ്പിലുള്ളത്.
40 ഏഷ്യന് രാജ്യങ്ങളെ അഞ്ച് ടീമുകള് ഉള്പ്പെടുന്ന എട്ട് ഗ്രൂപ്പുകളാക്കിയാണ് തിരിച്ചിട്ടുള്ളത്. എല്ലാ ടീമുകള്ക്കും ഹോം മത്സരങ്ങളും എവേ മത്സരങ്ങളും ഉണ്ടായിരിക്കും. സെപ്തംബര് അഞ്ചിനാണ് യോഗ്യതാ മത്സരങ്ങള് ആരംഭിക്കുക.
എട്ട് ഗ്രൂപ്പുകളില് നിന്നും ജേതാക്കളാകുന്ന എട്ട് ടീമുകളും മികച്ച നാല് രണ്ടാം സ്ഥാനക്കാരുമാണ് ഫൈനല് യോഗ്യതാ റൗണ്ടിലെത്തുക. ഇതോടൊപ്പം 2023ല് ചൈനയില് നടക്കുന്ന ഏഷ്യാ കപ്പ് ഫുട്ബോളിലേക്കും ഇവര് യോഗ്യത നേടും.
കരുത്തരായ ഇറാന്, ജപ്പാന്, കൊറിയ, ഓസ്ട്രേലിയ, സൗദി അറേബ്യ എന്നീ ടീമുകള്ക്കെതിരെ യോഗ്യതാ റൗണ്ടില് ഇന്ത്യയ്ക്ക് ഏറ്റുമുട്ടേണ്ടി വരില്ല. കരുത്തരായ ഇറാക്കും ഉസ്ബക്കിസ്ഥാനും ഒഴിവായവരില് പെടും. ഗ്രൂപ്പിലുള്ള ബംഗ്ലാദേശിനെയും അഫ്ഗാനിസ്ഥാനെയും ഇന്ത്യയ്ക്ക് പരാജയപ്പെടുത്താന് കഴിഞ്ഞേക്കും. കഴിഞ്ഞ എഎഫ്സി ചാമ്പ്യന്മാരായ ഖത്തറിന് ഗ്രൗണ്ട് സപ്പോര്ട്ടുണ്ട്. എങ്കിലും മികച്ച പ്രകടനം കാഴ്ച വെക്കാന് കഴിയുമെന്ന് തന്നെയാണ് പ്രതീക്ഷ.