കൊച്ചി: കലൂര് സ്റ്റേഡിയം ഹോം ഗ്രൗണ്ടായി ഐഎസ്എല്ലില് കളിക്കുന്ന കേരള ബ്ലാസ്റ്റേഴ്സ് കോഴിക്കോട് ഇഎംഎസ് സ്റ്റേഡിയത്തെ രണ്ടാം ഹോം ഗ്രൗണ്ടായി മാറ്റുന്നത് ഗൗരവമായി ചിന്തിക്കുന്നു. ഇത് സംബന്ധിച്ച് കഴിഞ്ഞ ദിവസം കോഴിക്കോട് കോര്പ്പറേഷന് മേയറുടെ ചേംബറില് നടന്ന യോഗത്തില് ബ്ലാസ്റ്റേഴ്സ് പ്രതിനിധികള് പങ്കെടുത്തിരുന്നു. ഇ എം എസ് സ്റ്റേഡിയം ഐ എസ് എല് നിബന്ധനകള്ക്ക് വിധേയമായി നടപ്പാക്കേണ്ട പ്രവര്ത്തികളെ സംബന്ധിച്ച് പ്രാഥമിക വിവരങ്ങള് മേയര് മുമ്പാകെ കെബിഎഫ്സി പ്രതിനിധികള് സമര്പ്പിച്ചു. പിച്ച്, ഗാലറി, ലൈറ്റ്, സംപ്രേഷണ സാമഗ്രികള് ഉള്പ്പടെ പതിമൂന്ന് കോടിയുടെ രൂപയുടെ നിര്ദേശങ്ങളുണ്ട്.
Also Read: ലോക്ക്ഡൗണിന് ശേഷം കൊറോണക്ക് തുടരെ ഗോള്, എഫ് സി പോര്ട്ടോ ഒന്നാം സ്ഥാനത്ത്
കോഴിക്കോടിനെ രണ്ടാം ഹോം ഗ്രൗണ്ടായി പരിഗണിക്കുന്നിന് തടസമില്ലെന്നും ബ്ലാസ്റ്റേഴ്സ് പ്രതിനിധികള് അറിയിച്ചു. ഐ എസ് എല് ആവേശം മലബാര് മേഖലയിലേക്കും വ്യാപിപ്പിക്കുക എന്നതാണ് കോഴിക്കോടിനെ രണ്ടാം ഹോം ഗ്രൗണ്ടാക്കുന്നതിന്റെ ഉത്തമ താത്പര്യമെന്നും ബ്ലാസ്റ്റേഴ്സ് വ്യക്തമാക്കി. അതേ സമയം, സമര്പ്പിച്ചിട്ടുള്ള നിര്ദേശങ്ങള് നടപ്പിലാക്കുന്നതിന് ആവശ്യമായ നിക്ഷേപത്തിലേക്ക് വലിയ തോതിലുള്ള വിഹിതം നല്കാനാകില്ലെന്ന് ബ്ലാസ്റ്റേഴ്സ് അറിയിച്ചു. കോര്പ്പറേഷനെ ചെറിയ തോതില് സഹായിക്കാന് തയ്യാറാണ്. കേരള ബ്ലാസ്റ്റേഴ്സ് പ്രതിനിധികളായി മുഹമ്മദ് റഫീഖ്, സിദ്ധാര്ഥ്, പി ശശി, ആന് ജോസഫ് എന്നിവര് പങ്കെടുത്തു.