ആവേശകരമായ പോരാട്ടത്തിന് ഒടുവിൽ കേരള പ്രീമിയർ ലീഗിന്‍റെ സെമിഫൈനല്‍ പ്രവേശനം ഉറപ്പിച്ച് കേരള ബ്ലാസ്റ്റേഴ്സ്. ഇന്ന് ഗ്രൂപ്പ് ഘട്ടത്തിലെ തങ്ങളുടെ അവസാന മത്സരത്തിനിറങ്ങിയ കേരള ബ്ലാസ്റ്റേഴ്സ് റിസര്‍വ്സ് ശക്തരായ ഗോകുലം കേരള റിസേർവ്സിനെ സമനിലയിൽ തളച്ചാണ് സെമി ഉറപ്പിച്ചത്. ഓരോ ഗോള്‍ വീതം നേടിയാണ് ഇരുടീമുകളും സമനിലയില്‍ പിരിഞ്ഞത്.
ഇന്ന് കൊച്ചിയിൽ വെച്ച് നടന്ന മത്സരത്തിലാണ് കേരള ബ്ലാസ്റ്റേഴ്സും കരുത്തരായ ഗോകുലം കേരളയും തമ്മില്‍ ഏറ്റുമുട്ടിയത്. അവേശപ്പോരിനൊടുവില്‍ മത്സരം 1-1 എന്ന നിലയിലാണ് അവസാനിച്ചത്. ഇതോടെ തുടർച്ചയായ രണ്ടാം തവണയും കേരള ബ്ലാസ്റ്റേഴ്സ് കേരള പ്രീമിയര്‍ ലീഗ് സെമി ഫൈനല്‍ ഉറപ്പാക്കുകയായിരുന്നു.
Also Read: തിയാഗോയും തന്നെ വിമര്‍ശിക്കുന്നു; മകനെ കുറിച്ച് മെസിയുടെ വെളിപ്പെടുത്തൽ
മത്സരത്തിന്റെ ആദ്യഘട്ടത്തില്‍ പിന്നില്‍ പോയ ശേഷം തിരിച്ചടിച്ചാണ് കേരള ബ്ലാസ്റ്റേഴ്സ് സമനില സ്വന്തമാക്കിയത്. ആദ്യപകുതി ഗോള്‍രഹിത സമനിലയില്‍ പിരിഞ്ഞു. എന്നാല്‍ മത്സരത്തിന്റെ 55ാം മിനുട്ടിൽ നിംഷാദിലൂടെയായിരുന്നു ഗോകുലം കേരള ആദ്യം ലീഡ് നേടിയത്. ഇതോടെ ഗോകുലത്തിന് കളിയില്‍ ശക്തമായ മേധാവിത്തം ലഭിച്ചു.
Also Read: നെയ്മര്‍ സൂത്രശാലി, ചുവപ്പ് കാര്‍ഡ് വാങ്ങിയത് മന:പൂര്‍വ്വം!! കാരണം വെളിപ്പെടുത്തി ആരാധകര്‍
എന്നാല്‍ തോറ്റ് മടങ്ങാൻ്‍ ബ്ലാസ്റ്റേഴ്സ് ഒരുക്കമായിരുന്നില്ല. മത്സരം അവസാനിക്കാൻ 10 മിനുട്ട് മാത്രം ശേഷിക്കെ നാവൊറം മഹേഷ് തകര്‍പ്പനൊരു ഗോളിലൂടെ കേരള ബ്ലസ്റ്റേഴ്സിന് സമനില നേടിക്കൊടുത്തു. ഈ സമനിലയോടെയാണ് ഗ്രൂപ്പ് എയിൽ എട്ടു മത്സരങ്ങളിൽ നിന്ന് 11 പോയന്‍റ് സ്വന്തമാക്കി ബ്ലാസ്റ്റേഴ്സ് രണ്ടാം സ്ഥാനം ഉറപ്പിച്ചത്. അതേസമയം ഗോകുലം നേരത്തെ തന്നെ സെമി പ്രവേശനം ഉറപ്പിച്ചിരുന്നു.