പ്രീ സീസണില്‍ ദയനീയ തോല്‍വിയുമായി വീണ്ടും ലിവര്‍പൂള്‍

പ്രീ സീസണ്‍ സൗഹൃദ മത്സരത്തില്‍ ലിവർപൂളിന് വീണ്ടും തോല്‍വി. നാപോളിക്കെതിരായ മത്സരത്തിലാണ് ലിവര്‍പൂള്‍ ദയനീയ തോൽവി ഏറ്റുവാങ്ങിയത്. മറപടിയില്ലാത്ത മൂന്ന് ഗോളുകൾക്കാണ് നാപോളി ലിവർപൂളിനെ പരാജയപ്പെടുത്തിയത്. നേരത്തെ സെവിയ്യയ്ക്കും ഡോർട്മുണ്ടിനും എതിരായ പ്രീ സീസണ്‍ മത്സരങ്ങളിലും ലിവർപൂൾ പരാജയം രുചിച്ചിരുന്നു. കഴിഞ്ഞ ദിവസം ലിവർപൂളിനൊപ്പം ചേര്‍ന്ന ഹാർവി എലിയട്ടിന്‍റെ അരങ്ങേറ്റ മത്സരം കൂടിയായിരുന്നു ഇത്.

മുന്നേറ്റ നിരയിൽ പ്രമുഖരായ മൊഹമ്മദ് സല, ഫിർമിനോ, മാനെ എന്നിവരില്ലാതെയാണ് ലിവർപൂൾ ഇറങ്ങിയത്. അതുകൊണ്ടുതന്നെ ലിവര്‍പൂളിന്‍റെ ആക്രമണങ്ങള്‍ പലപ്പോഴും ദുര്‍ബലമായി ഒതുങ്ങിപ്പോയി. നാപോളി മികച്ച മുന്നേറ്റങ്ങള്‍ സൃഷ്ടിക്കുകയും ഗോള്‍ നേടുകയും ചെയ്തപ്പോള്‍ ലിവര്‍പൂള്‍ താരങ്ങള്‍ കാഴ്ചക്കാരായി നോക്കിനിന്നു. ലിവര്‍പൂളിന്‍റെ പ്രതിരോധവും പലപ്പോഴും പിഴവുകള്‍ക്ക് വലിയ വില കൊടുക്കേണ്ടിയും വന്നു.

ആദ്യ പകുതിയിൽ മത്സരം ആരംഭിച്ച് അധികം വൈകാതെ തന്നെ നാപോളി ലിവര്‍പൂളിനെ ഞെട്ടിച്ചു. ലിവർപൂൾ പ്രതിരോധ നിരയിലെ പിഴവ് മുതലെടുത്തുകൊണ്ട് ഇൻസൈൻ ആണ് നാപോളിക്കായി ആദ്യ ഗോൾ സ്വന്തമാക്കിയത്. തുടർന്ന് പത്ത് മിനുട്ട് പിന്നിട്ടപ്പോഴേക്കും നാപോളി വീണ്ടും ലക്ഷ്യം കണ്ടു. അർകാടിയൂസ് മിലികിലൂടെയായിരുന്നു നാപോളി ലീഡ് ഉയർത്തിയത്.

രണ്ടാം പകുതിയിൽ കൂടുതല്‍ മെച്ചപെട്ട പ്രകടനം കാഴ്ചവെക്കാൻ ലിവർപൂൾ ശ്രമം നടത്തി. എന്നാല്‍ നാപോളി പ്രതിരോധത്തിന് മു്നനില്‍ ലിവര്‍പൂള്‍ താരങ്ങള്‍ കളിമറന്നു. 52ാം മിനുട്ടില്‍ മൂന്നാമത്തെ ഗോൾ നേടി നാപോളി ലിവർപൂളിന് മേല്‍ അവസാന ആണിയും അടിച്ചു. അമിൻ യൂനിസാണ് മൂന്നാം ഗോള്‍ നേടി നാപോളിയുടെ വിജയം ഉറപ്പിച്ചത്. ലിവർപൂൾ ഗോൾ കീപ്പർ മിഗ്നോലെ തട്ടിയകറ്റിയ പന്ത് യൂനിസ് ഗോളാക്കി മാറ്റുകയായിരുന്നു.

കളിയിലെ കണക്കുകള്‍ പരിശോധിച്ചാല്‍ ലിവര്‍പൂളാണ് മുന്നിട്ട് നില്‍ക്കുന്നത്. പന്ത്രണ്ട് ഷോട്ടുകള്‍ അഴ്സണല്‍ ഉതിര്‍ത്തപ്പോള്‍ എട്ട് എണ്ണം മാത്രമാണ് നാപോളി അടിച്ചത്. എന്നാല്‍ ലിവര്‍പൂള്‍ മൂന്ന് ഷോട്ടുകള്‍ മാത്രം ലക്ഷ്യത്തിലെത്തിച്ചപ്പോള്‍ നാപോളി എട്ടില്‍ ഏഴെണ്ണവും ലക്ഷ്യത്തിലെത്തിച്ചു. ബോള്‍ പൊസെഷന്‍ ലിവര്‍പൂള്‍ 59 ശതമാനവും നാപോളി 41 ശതമാനവുമാണ്. മത്സരത്തിലുടനീളം ലിവര്‍പൂള്‍ 661 പാസുകള്‍ കൈമാറിയപ്പോള്‍ നാപോളി 480 പാസുകള്‍ നല്‍കി. പാസുകളില്‍ ലിവര്‍പൂള്‍ 90 ശതമാനം കൃത്യത പുലര്‍ത്തിയപ്പോള്‍ ലാപോളി 85 ശതമാനം കൃത്യത പാലിച്ചു.