കാരബവോ കപ്പ് സ്വന്തം, 6 വർഷത്തെ കിരീടവരൾച്ച അവസാനിപ്പിച്ച് മാഞ്ചസ്റ്റർ യുണൈറ്റഡ്

6 വർഷം നീണ്ട കിരീടവരൾച്ച അവസാനിപ്പിച്ചു കൊണ്ട് കാരബാവോ കപ്പിൽ (Carabao Cup) മുത്തമിട്ട് ഇംഗ്ലീഷ് പ്രീമിയർ ലീഗിലെ വമ്പന്മാരായ മാഞ്ചസ്റ്റർ യുണൈറ്റഡ് (Manchester United). ഞായറാഴ്ച വെംബ്ലി സ്റ്റേഡിയത്തിൽ നടന്ന ഫൈനൽ മത്സരത്തിൽ ന്യൂകാസിൽ യുണൈറ്റഡിനെ (Newcastle United) മറുപടിയില്ലാത്ത രണ്ട് ഗോളുകൾക്ക് തകർത്താണ് ചുവന്ന ചെകുത്താന്മാരുടെ കിരീട ധാരണം. സ്വെൻ ബോട്സ്മാന്റെ സെൽഫ് ഗോളും, കാസമിറോയുടെ ഗോളുമാണ് യുണൈറ്റഡിന് വിജയം സമ്മാനിച്ചത്. 2017 ലെ യൂറോപ്പ ലീഗിൽ ചാമ്പ്യന്മാരായതിന് ശേഷം ഇത് 6 വർഷം കഴിഞ്ഞാണ് മാഞ്ചസ്റ്റർ യുണൈറ്റഡ് ഒരു പ്രധാന കിരീടത്തിൽ മുത്തമിടുന്നത്.
സമീപകാലത്തായി എറിക് ടെൻഹാഗിന് കീഴിൽ ഉജ്ജ്വല ഫോമിൽ കളിക്കുന്ന മാഞ്ചസ്റ്റർ യുണൈറ്റഡ് കാരബാവോ കപ്പ് ഫൈനലിലും മികച്ച രീതിയിൽ തുടക്കം മുതൽ പോരാടി. മുപ്പത്തിമൂന്നാം മിനുറ്റിൽ ബ്രസീലിയൻ സൂപ്പർ താരം കാസമിറോ (Casemiro) നേടിയ ഗോൾ മാഞ്ചസ്റ്റർ യുണൈറ്റഡിന് ലീഡ് സമ്മാനിച്ചു. ഹെഡറിലൂടെയായിരുന്നു താരം ന്യൂകാസിൽ വല കുലുക്കിയത്. ആറ് മിനിറ്റുകൾക്ക് ശേഷം മാഞ്ചസ്റ്റർ യുണൈറ്റഡ് ലീഡ് ഉയർത്തി. ഇക്കുറി സ്വെൻ ഗോട്സ്മാന്റെ സെൽഫ് ഗോളായിരുന്നു യുണൈറ്റഡിന്റെ അക്കൗണ്ടിലേക്കെത്തിയത്. ര‌ണ്ട് ഗോളിന് മുന്നിലായ യുണൈറ്റഡ് പിന്നീട് മികച്ച രീതിയിൽ പ്രതിരോധിച്ചാണ് കിടിലൻ ജയം സ്വന്തമാക്കിയത്.

Also Read : കേരള ബ്ലാസ്റ്റേഴ്സിന്റെ ആ തീരുമാനം പാളി, ഹൈദരാബാദിനെതിരെ തോറ്റത് ഇക്കാരണങ്ങൾ മൂലം

എറിക് ടെൻ ഹാഗ് പരിശീലകനായി എത്തിയതിന് ശേഷം മോശം ഫോമിൽ നിന്ന് ഉയർത്തെഴുന്നേറ്റ മാഞ്ചസ്റ്റർ യുണൈറ്റഡിന്റെ ആത്മവിശ്വാസം വാനോളം ഉയർത്താൻ പോന്നതാണ് കാരബവോ കപ്പിലെ കിരീട ധാരണം. കഴിഞ്ഞ ദിവസം യൂറോപ്പ ലീഗിൽ ബാഴ്സലോണയെ പരാജയപ്പെടുത്തി പ്രീ ക്വാർട്ടറിൽ എത്തിയിരുന്ന റെഡ് ഡെവിൾസ്, നിലവിൽ ഇംഗ്ലീഷ് പ്രീമിയർ ലീഗിൽ മൂന്നാമതുമുണ്ട്. അതേ സമയം കാരബാവോ കപ്പിലേക്ക് മാഞ്ചസ്റ്റർ യുണൈറ്റഡിനെ നയിച്ചതോടെ ഹോസെ മൗറീന്യോയ്ക്ക് ശേഷം ഓൾഡ് ട്രാഫോഡിലേക്ക് കിരീടമെത്തിക്കുന്ന ആദ്യ പരിശീലകനായി എറിക് ടെൻ ഹാഗ് മാറി.

Also Read : കേരള ബ്ലാസ്റ്റേഴ്സിൽ കളിക്കാനായി ഇന്ത്യൻ നേവിയിലെ ജോലി ഉപേക്ഷിച്ചു, ഇന്ന് ഐ എസ് എല്ലിലെ ശ്രദ്ധേയ താരങ്ങളിൽ ഒരാൾ, ഇത് നിഹാലിന്റെ കഥ

5 വർഷവും 278 ദിവസങ്ങളും നീണ്ട കാത്തിരിപ്പ്

5 വർഷവും 278 ദിവസങ്ങളുമാണ് ഒരു കിരീടത്തിനായി മാഞ്ചസ്റ്റർ യുണൈറ്റഡ് കാത്തിരുന്നത്. 1983 ന് ശേഷം ഒരു കിരീടത്തിനായുള്ള മാഞ്ചസ്റ്റർ യുണൈറ്റഡിന്റെ ഏറ്റവും നീണ്ട കാത്തിരിപ്പിനാണ് ഇതോടെ അവസാനമായത്. 1977 ലെ എഫ് എ കപ്പിന് ശേഷം മറ്റൊരു കപ്പിനായി 6 വർഷങ്ങളും 5 ദിവസങ്ങളും അവർക്ക് കാത്തിരിക്കേണ്ടി വന്നിരുന്നു.

Read Latest Sports News and Malayalam Newsundefined