ലയണല് മെസിയേക്കാള് മികച്ച താരം റൊണാള്ഡീഞ്ഞോയാണെന്ന് മുന് അര്ജന്റീന താരം മാര്ട്ടിന് കാര്ഡെറ്റി. ബ്രസീലിയന് താരത്തിനൊപ്പം ഫ്രാന്സില് പി എസ് ജി ക്ലബ്ബില് ഒരുമിച്ച് കളിച്ചിട്ടുണ്ട് മാര്ട്ടിന്. ഈ അനുഭവത്തില് നിന്നു കൊണ്ട് അര്ജന്റൈന് താരം പറയുന്നു: കോച്ച് എന്ന നിലയില്, എന്റെ ടീമിലേക്ക് മെസിയേക്കാള് മുന്നെ റൊണാള്ഡീഞ്ഞോയെ തിരഞ്ഞെടുക്കാനാകും ഞാന് ശ്രമിക്കുക. ഒരു വര്ഷം ഞാനയാള്ക്കൊപ്പം കളിച്ചിട്ടുണ്ട്, വ്യത്യസ്തമായൊരു കളിക്കാരനാണ്. ദൈവം അനുഗ്രഹിച്ചു വിട്ടതാണ് അദ്ദേഹത്തെ- മാര്ട്ടിന് പറഞ്ഞു.
എപ്പോഴും തമാശയൊപ്പിക്കും. പന്തുകൊണ്ട് ചില പ്രത്യേകതകള് കാണിക്കാന് പരിശീലന സമയത്ത് ശ്രമിക്കും. അത് വാശിയേറിയ മത്സരത്തിനിടെയിലും റോണോ പയറ്റുന്നത് കാണാം. അദ്ദേഹം പരിശീലനം നടത്തുമ്പോള് നോക്കി നിന്നു പോകും. മറ്റുള്ളവരില് നിന്നെല്ലാം വ്യത്യസ്തമായ നീക്കങ്ങളാണ് റൊണാള്ഡീഞ്ഞോയുടെ ഭാഗത്ത് നിന്നുണ്ടാവുക. മത്സരത്തിനിടയിലും അങ്ങനെ തന്നെ. റൊണാള്ഡീഞ്ഞോയെ പോലുള്ള കളിക്കാര് വളരെ കുറവാണ്. അതുകൊണ്ടു തന്നെ ഫുട്ബോള് ചരിത്രത്തില് അവരെന്നും ഓര്മിക്കപ്പെടും - മാര്ട്ടിന് കാര്ഡെറ്റി പറഞ്ഞു.
Also Read: മെസ്സി ആദ്യമായി ഗോളടിച്ച മത്സരത്തില് ബാഴ്സലോണയ്ക്കുവേണ്ടി ആരൊക്കെയാണ് കളിച്ചതെന്നറിയുമോ?
ബാഴ്സലോണയുടെ എക്കാലത്തേയും മികച്ച താരങ്ങളില് ഒരാളാണ് മെസിയും റൊണാള്ഡീഞ്ഞോയും. വ്യക്തിഗത മികവു കൊണ്ട് റൊണാള്ഡീഞ്ഞോ ബാഴ്സക്ക് യുവേഫ ചാമ്പ്യന്സ് ലീഗ് നേടിക്കൊടുത്തിരുന്നു. മെസി ബാഴ്സക്കായി അരങ്ങേറ്റ ഗോള് നേടുന്നത് റോണോയുടെ അസിസ്റ്റിലായിരുന്നു. റൊണാള്ഡീഞ്ഞോ ഒഴിഞ്ഞ സിംഹാസനത്തില് മെസി കൂടുതല് തിളങ്ങി. ആറ് ബാലണ്ദ്യോറുകളാണ് മെസി സ്വന്തമാക്കിയത്. ബാഴ്സക്ക് നാല് തവണ ചാമ്പ്യന്സ് ലീഗ് നേടിക്കൊടുത്തും പത്ത് ലാ ലിഗ കിരീടങ്ങള് നേടിയും മെസി ഇതിഹാസ താരമായി.