Copa America 2019: രണ്ടാം സെമിയില്‍ ചാമ്പ്യന്മാരെ മലര്‍ത്തിയടിച്ച് പെറു ഫൈനലില്‍

പോര്‍ട്ടോ അലെഗ്രെ: കോപ്പ അമേരിക്ക ഫുട്ബോളിലെ രണ്ടാം സെമി ഫൈനല്‍ മത്സരത്തില്‍ നിലവിലെ ചാമ്പ്യന്മാരെ മലര്‍ത്തിയടിച്ച് പെറു ഫൈനലില്‍. ചിലിയെ മറുപടിയില്ലാത്ത മൂന്ന് ഗോളുകള്‍ക്ക് പരാജയപ്പെടുത്തിയാണ് പെറു കിരീട പോരാട്ടത്തിന് യോഗ്യത നേടിയിരിക്കുന്നത്. പോര്‍ട്ടോ അലെഗ്രെയിലെ അരീന ഗ്രെമിയോ സ്റ്റേഡിയത്തില്‍ ഇന്ന് പുലര്‍ച്ചെ ആറ് മണിക്കായിരുന്നു മത്സരം നടന്നത്.

കളിയിലെ ഏത് മേഖല പരിശോധിച്ചാലും വ്യക്തമായ മേധാവിത്തം പുലര്‍ത്തിയത് കോപ്പ അമേരിക്കയിലെ നിലവിലെ ചാമ്പ്യന്മാരായ ചിലിയായിരുന്നു. മത്സരത്തില്‍ സിംഹഭാഗവും പന്ത് കൈവശം വെച്ചതും പെറുവിനേക്കാള്‍ ഇരട്ടിയോളം പാസുകള്‍ കൈമാറിയതും ചിലി തന്നെയായിരുന്നു. എന്നാല്‍ പന്ത് കയ്യില്‍ കിട്ടിയപ്പോഴെല്ലാം പെറു ചിലിയുടെ വലയില്‍ പ്രകമ്പനം സൃഷ്ടിച്ചു കൊണ്ടേയിരുന്നു.

മത്സരം ആരംഭിച്ച് ഇരുപത്തിയൊന്നാം മിനുട്ടില്‍ തന്നെ പെറു ലക്ഷ്യം കണ്ടു. എഡിസണ്‍ ഫ്ലോറസിന്‍റെ വകയായിരുന്നു ആദ്യഗോള്‍. പിന്നാലെ യോഷ്മീര്‍ യോട്ടന്‍റെ വക 38ാം മിനുട്ടില്‍ രണ്ടാം ഗോള്‍. ഇതോടെ ചിലിയുടെ സമനില തെറ്റി. ഗോള്‍ മടക്കാന്‍ ചിലി പതിനെട്ടടവും പയറ്റിയെങ്കിലും പെറുവിയന്‍ പ്രതിരോധം ഉരുക്കു കോട്ടയായി നിലകൊണ്ടു. മത്സരത്തിന്‍റെ ആദ്യപകുതിയില്‍ തന്നെ പെറുവിന് രണ്ട് ഗോള്‍ ലീഡ്.

രണ്ടാം പകുതിയിലും ചിലിയ്ക്ക് ഗോള്‍ മടക്കാനായില്ല. മത്സരത്തിന്‍റെ അധികസമയത്ത് മൂന്നാമത് ഗോളില്‍ പെറു ചിലിയുടെ അവസാനത്തെ ആണിയും അടിച്ചു. പൗലോ ഗുറീറോയാണ് പെറുവിനായി മൂന്നാം ഗോള്‍ കണ്ടെത്തിയത്. ഞായറാഴ്ച നടക്കുന്ന ഫൈനല്‍ മത്സരത്തില്‍ കരുത്തരായ ബ്രസീലാണ് പെറുവിന്‍റെ എതിരാളികള്‍. സീസണില്‍ നേരത്തേ ഇരുടീമുകളും ഏറ്റുമുട്ടിയപ്പോള്‍ എതിരില്ലാത്ത അഞ്ച് ഗോളുകള്‍ ബ്രസീല്‍ പെറുവിനെ പരാജയപ്പെടുത്തിയിരുന്നു