ഇക്കുറി മൂസ മരേഗ
പോര്‍ച്ചുഗീസ് ക്ലബ്ബായ പോര്‍ട്ടോയുടെ താരം മൂസ മരേഗയ്ക്കാണ് ഏറ്റവുമൊടുവില്‍ ഗ്രൗണ്ടില്‍ ദുരനുഭവം നേരിടേണ്ടി വന്നത്. ഗുമാരസുമായുള്ള മത്സരത്തിനിടെയാണ് മൂസയ്ക്ക് വംശീയ അധിക്ഷേപം നേരിടേണ്ടി വന്നത്. തന്‍റെ മുന്‍ ക്ലബ്ബായ ഗുമാരസിന്‍റെ ആരാധകരില്‍ നിന്ന് തന്നെ ഇത്തരം വിഷമം അനുഭങവിക്കേണ്ടി വന്നു എന്നതാണ് താരത്തിന് ഏറെ സങ്കടം ഉണ്ടാക്കിയത്.
Twitter-Stu Holden
കുരങ്ങ് വിളിയും ചേഷ്ടകളും
സാധാരണ പോലെ തന്നെ കുരങ്ങനെന്ന് വിളിച്ച് കൊണ്ടും കുരങ്ങിന്‍റേതിന് സമാനമായ ശബ്ദങ്ങള്‍ പുറപ്പെടുവിച്ചും ഒക്കെയാണ് മൂസ മരേഗയ്ക്ക് എതിരെ എതിര്‍ ടീം ആരാധകര്‍ രംഗത്തെത്തിയത്. ഇതെല്ലാം സഹിച്ച് തന്നെയാണ് മത്സരത്തിന്‍റെ ആദ്യ പകുതി മൂസ പൂര്‍ത്തിയാക്കിയത്. എന്നാല്‍ രണ്ടാം പകുതിയില്‍ ഈ ആക്ഷേപങ്ങള്‍ മറ്റൊരു തലത്തിലേക്ക് എത്തുകയായിരുന്നു.
Twitter-Chima Chidera Okoro
ഗോളടിച്ചതോടെ അധിക്ഷേപം രൂക്ഷം
ഒന്നിനെതിരെ രണ്ട് ഗോളുകള്‍ക്ക് പോര്‍ട്ടോ ഗുമാരസിനെതിരെ ജയിച്ച മത്സരത്തിനിടെയാണ് മൂസയ്ക്ക് ദുരനുഭവം ഉണ്ടായത്. മത്സരത്തില്‍ മൂസ മരേഗ ഇറങ്ങിയത് മുതല്‍ തന്നെ ഗുമാരസ് ആരാധകര്‍ താരത്തിനെതിരെ തിരിഞ്ഞിരുന്നു. എന്നാല്‍ 61ാം മിനുട്ടില്‍ മൂസ വിജയ ഗോള്‍ നേടിയതോടെ ആരാധകരുടെ അധിക്ഷേപം എല്ലാ പരിധികളും ലംഘിച്ചു. അതുവരെ പിടിച്ചുനിന്നെങ്കിലും പിന്നാലെ മൂസയുടെ ക്ഷമ കെട്ടു.
Twitter-BenchWarmers
നടുവിരലുയര്‍ത്തി മടക്കം
അധിക്ഷേപത്തിന് അറുതിയില്ലാതെ വന്നതോടെ ക്ഷമ നശിച്ച താരം 69ാം മിനുട്ടില്‍ മത്സരം സ്വയം അവസാനിപ്പിച്ച് മടങ്ങുകയായിരുന്നു. സഹതാരങ്ങള്‍ മൂസയെ തടയാന്‍ ശ്രമിച്ചെങ്കിലും അദ്ദേഹം കൂട്ടാക്കിയില്ല. കളിക്കാന്‍ മൂസ തയ്യാറാകാതെ വന്നതോടെ താരത്തെ പിന്‍വലിക്കാന്‍ പോര്‍ട്ടോ പരിശീലകന്‍ നിര്‍ബന്ധിതനായി. അധിക്ഷേപിച്ച ആരാധകര്‍ക്ക് നേരെ നടുവിരലുയര്‍ത്തി തന്‍റെ രോഷം പ്രകടിപ്പിച്ചതിന് ശേഷമാണ് താരം കളം വിട്ടത്.
Twitter-Danny Armstrong
സാമൂഹ്യമാധ്യമങ്ങളില്‍ വിമര്‍ശനം
മത്സരത്തിന് പിന്നാലെ സാമൂഹ്യ മാധ്യമങ്ങളിലൂടെ സംഭവത്തെ വിമര്‍ശിച്ചും മൂസ രംഗത്തെത്തി. വംശീയ അധിക്ഷേപങ്ങള്‍ നടത്തുന്നവര്‍ വിഡ്ഡികളാണെന്ന് മൂസ കുറ്റപ്പെടുത്തി. തനിക്ക് മഞ്ഞക്കാര്‍ഡ് നല്‍കിയത് ശരിയായ തീരുമാനമല്ലെന്നും താരം പറഞ്ഞു. നാണംകെട്ട സംഭവമാണ് അരങ്ങേറിയത്. ഇത്തരക്കാരെ ഫുട്ബോളില്‍ ഇനി കാണാതിരിക്കട്ടെയെന്നും മൂസ പ്രത്യാശ പ്രകടിപ്പിച്ചു.