സുവാരസിന് പകരക്കാരന്‍ വേണം
നിലവില്‍ പരിക്കേറ്റ് ടീമില്‍ പുറത്ത് പോയിരിക്കുന്ന ഉറുഗ്വന്‍ താരം ലൂയിസ് സുവാരസ് ബാഴ്സ മുന്നേറ്റത്തിലെ പ്രധാന ഘടകമായിരുന്നു. താരത്തിന്‍റെ അഭാവം മുന്നേറ്റനിരയില്‍ നിഴലിച്ചുനില്‍ക്കുകയും ചെയ്യുന്നു. ഈ പൊസിഷനില്‍ സുവാരസിനെ പോലെ തന്നെ കരുത്തനായ ഒരു താരത്തെ കൊണ്ടുവരിക എന്നതാണ് ബാഴ്സയ്ക്ക് മുന്നില്‍ ഇപ്പോഴുള്ള വലിയ വെല്ലുവിളി.
നാല് മാസത്തേക്ക് സുവാരസില്ല
പരിക്കറ്റ സുവാരസിന് നാലം മാസത്തേക്ക് ഇനി കളത്തിലിറങ്ങാന്‍ സാധിക്കില്ല. ഈ സാഹചര്യത്തില്‍ ബാഴ്സയുടെ മുന്നേറ്റങ്ങള്‍ മെസിയിലും ഗ്രീസ്മാനിലും ഒതുങ്ങുകയാണ്. എന്നാല്‍ മെസിയുമായി മികച്ച കോമ്പിനേഷന്‍ കളിക്കാന്‍ സാധിക്കുന്ന ഒരു താരത്തെ മുന്നേറ്റത്തില്‍ എത്തിച്ചാല്‍ മാത്രമേ ബാഴ്സയുടെ ആക്രമണങ്ങള്‍ക്ക് മൂര്‍ച്ച കൂടുകയുള്ളൂ. ഈ സാഹചര്യത്തിലാണ് മെസി ചില നിര്‍ദ്ദേശങ്ങള്‍ മുന്നോട്ട് വെയ്ക്കുന്നത്.
മെസിയുടെ ഉപദേശം
അര്‍ജന്‍റീന ദേശീയ ടീമിലെ സഹതാരവും മാഞ്ചസ്റ്റര്‍ സിറ്റിയുടെ സൂപ്പര്‍ താരവുമായ സെര്‍ജിയോ അഗ്യൂറോയെ ടീമിലെത്തിക്കുകയാണ് ഇപ്പോള്‍ വേണ്ടതെന്നായിരുന്നു ക്യാപ്റ്റന്‍ ലയണല്‍ മെസിയുടെ ഉപദേശം. ചെറിയ പ്രായം തൊട്ട് ഒരുമിച്ച് കളിച്ച് വളര്‍ന്നവരാണ് ലയണല്‍ മെസിയും സെര്‍ജിയോ അഗ്യൂറോയും. ഈ കൂട്ടുകെട്ട് ബാഴ്സയ്ക്ക് ഗുണം ചെയ്യുമെന്നാണ് മെസി പറയുന്നത്.
അഗ്യൂറോ മികച്ച ഫോമില്‍
ദേശീയ ടീമിന് വേണ്ടി വന്‍ തിരിച്ചുവരവ് നടത്തി മിന്നുന്ന പ്രകടനം കാഴ്ച വെക്കുന്ന സെര്‍ജിയോ അഗ്യൂറോ ക്ലബ്ബ് ഫുട്ബോളിലും തകര്‍പ്പന്‍ ഫോമില്‍ തന്നെയാണ്. മാഞ്ചസ്റ്റര്‍ സിറ്റിക്കായി ഏറ്റവും കൂടുതല്‍ ഗോളുകള്‍ നേടിയിട്ടുള്ള അഗ്യൂറോ ക്ലബ്ബിന്‍റെ നെടുംതൂണാണ്. ഇംഗ്ലീഷ് പ്രീമിയര്‍ ലീഗില്‍ ഏറ്റവും കൂടുതല്‍ ഗോള്‍ നേടിയിട്ടുള്ള വിദേശ താരം കൂടിയാണ് അഗ്യൂറോ. 176 ഗോളുകളാണ് താരം സ്വന്തം പേരില്‍ കുറിച്ചത്. അഗ്യൂറോയെ വിട്ടുനല്‍കാന്‍ സിറ്റി ഒരുക്കമായിരുന്നില്ലെന്നും റിപ്പോര്‍ട്ടുകളുണ്ട്.
എങ്കിലും ടീമിലെടുക്കില്ല
കാര്യങ്ങള്‍ ഇങ്ങനെയൊക്കെ ആണെങ്കില്‍ പോലും മെസിയുടെ ആവശ്യം തള്ളുകയാണ് ബാഴ്സ മാനേജ്മെന്‍റ് ചെയ്തത്. അഗ്യൂറോയെ ടീമിന്‍റെ ഭാഗമാക്കണമെന്ന് നേരത്തേ തന്നെ തന്നെ മാനേജ്മെന്‍റിനോട് മെസി ആവശ്യപ്പെട്ടിരുന്നു. ഈ ആവശ്യം പുതിയ പരിശീലകന്‍ കികി സെറ്റിയനോടും താരം ആവര്‍ത്തിച്ചു. എന്നാല്‍ പുതിയ പരിശീലകനും മെസിയുടെ ഉപദേശം തള്ളിക്കളഞ്ഞതായാണ് റിപ്പോര്‍ട്ട്.