യുവേഫ യൂറോ യോഗ്യതാ മത്സരത്തില്‍ തകര്‍പ്പന്‍ ജയവുമായി സ്പെയിന്‍

യുവേഫ യൂറോ യോഗ്യതാ മത്സരത്തില്‍ വമ്പന്‍ ജയം സ്വന്തമാക്കി സ്പെയിന്‍. ഫറോ ഐലന്‍റ്സിനെ എതിരില്ലാത്ത നാല് ഗോളുകള്‍ക്കാണ് സ്പെയിന്‍ പരാജയപ്പെടുത്തിയത്. റോഡ്രിഗോ, അല്‍കസര്‍ എന്നിവരുടെ ഇരട്ടഗോള്‍ മികവിലാണ് സ്പെയിനിന്‍റെ തകര്‍പ്പന്‍ ജയം. ജയത്തോടെ ഗ്രൂപ്പില്‍ ഏഴ് പോയിന്‍റിന്‍റെ ലീഡുമായി സ്പെയിന്‍ ഒന്നാം സ്ഥാനത്താണ്.

ഇതിന് മുമ്പ് റൊമാനിയക്കെതിരെ നടന്ന മത്സരത്തില്‍ നിന്ന് പ്രധാനപ്പെട്ട ഒമ്പത് മാറ്റങ്ങളുമായാണ് സ്പാനിഷ് പരിശീലകന്‍ റോബര്‍ട്ട് മൊറേനോ ടീമിനെ ഇറക്കിയത്. അതിന്‍റെ മാറ്റം മത്സരത്തില്‍ പ്രകടമാകുകയും ചെയ്തു. റൊമാനിയക്കെതിരെ ഒന്നിനെതിരെ രണ്ട് ഗോളുകള്‍ക്ക് ജയിച്ച സ്പെയിന്‍ ഫറോയ്ക്കെതിരെ ഏകപക്ഷീയമായ ജയമാണ് സ്വന്തമാക്കിയത്.

റോഡ്രിഗോയാണ് സ്പെയിനിന് വേണ്ടി ആദ്യഗോള്‍ സ്വന്തമാക്കിയത്. 13ാം മിനുട്ടിലായിരുന്നു റോഗ്രിഗോയുടെ ഗോള്‍. ആദ്യപകുതി അവസാനിക്കുമ്പോള്‍ ഒരു ഗോളിന് സ്പെയിന്‍ മുന്നില്‍. രണ്ടാം പകുതി ആരംഭിച്ച ഉടന്‍ തന്നെ റോഡ്രിഗോ രണ്ടാം ഗോളും സ്വന്തമാക്കി. 50ാമത്തെ മിനുട്ടിലായിരുന്നു രണ്ടാമത്തെ ഗോള്‍. പിന്നാലെ അവസാന മൂന്ന് മിനുട്ടിനുള്ളില്‍ രണ്ട് ഗോളുകള്‍ കൂടി ഫറോയുടെ വലയിലെത്തിച്ച് അല്‍കാസര്‍ പട്ടിക പൂര്‍ത്തിയാക്കി.