Real Madrid News: ക്ലബ്ബ് വിട്ട് പോകാം, സൂപ്പര്‍ താരത്തെ ടീമില്‍ നിന്ന് ഒഴിവാക്കി റയല്‍

മാഡ്രിഡ്: സ്പാനിഷ് ക്ലബ്ബ് റയല്‍ മാഡ്രിഡിന്‍റെ സൂപ്പര്‍ താരം ഗാരെത് വെയ്ല്‍ ഉടന്‍ തന്നെ ക്ലബ്ബ് വിട്ടേക്കുമെന്ന് ഉറപ്പിച്ച് പരിശീലകന്‍ സിനദിന്‍ സിദാന്‍. എപ്പോള്‍ വേണമെങ്കിലും ബെയ്ലിന് റയല്‍ മാഡ്രിഡ് വിട്ടുപോകാവുന്നതാണെന്ന് അദ്ദേഹം വ്യക്തമാക്കി. ക്ലബ്ബില്‍ നിന്ന് പുറത്തുപോകുന്നുവെന്ന വാര്‍ത്തകള്‍ ശക്തമായതിനെ തുടര്‍ന്നാണ് ബെയ്ലിനെ ബയറണിനെതിരായ ടീമില്‍ ഉള്‍പ്പെടുത്താതിരുന്നതെന്നും സിനദിന്‍ സിദാന്‍ കൂട്ടിച്ചേര്‍ത്തു.

ഗാരെത് ബെയ്ല്‍ ഉടന്‍ റയല്‍ മാഡ്രിഡ് വിട്ട് മറ്റൊരു ക്ലബ്ബിലേക്ക് ചേക്കേറുമെന്ന് തന്നെയാണ് തങ്ങള്‍ പ്രതീക്ഷിക്കുന്നത്. എത്ര പെട്ടെന്ന് അത് സാധ്യമാകുമോ, അത്രയും വേഗം ബെയ്‍ലിന് ക്ലബ്ബ് വിട്ട് പോകാവുന്നതാണ്. നാളെയെങ്കില്‍ നാളെ തന്നെ താര്തതിന് പോകാം. അതാണ് എല്ലാവര്‍ക്കും നല്ലതെന്നും റയല്‍ മാഡ്രിഡ് പരിശീലകനായ സിദാന്‍ വ്യക്തമാക്കി.


ഇന്‍റര്‍നാഷണല്‍ ചാമ്പ്യന്‍സ് കപ്പില്‍ ബയറണ്‍ മ്യൂണിക്കിനെതിരായ മത്സരത്തില്‍ സിദാന്‍ ബെയ്ലിനെ കളിപ്പിച്ചിരുന്നില്ല. ബെയ്ല്‍ ഇല്ലാതെയാണ് ടീം കളിക്കാനിറങ്ങിയത്. മത്സരത്തിന് ശേഷം മാധ്യമങ്ങളെ കണ്ടപ്പോഴാണ് സിദാന്‍ സൂപ്പര്‍ താരത്തെ ടീമില്‍ ഉള്‍പ്പെടുത്താത്തതിനെ കുറിച്ച് സൂചിപ്പിച്ചത്. താരത്തെ വില്‍ക്കാന്‍ ക്ലബ്ബ് ശ്രമം തുടരുകയാണെന്നും സിദാന്‍ പറഞ്ഞു.

റയല്‍ വിട്ട് പുറത്തേക്ക് പോകുന്നതിന്‍റെ വക്കില്‍ നില്‍ക്കുകയാണ് ഗാരെത് ബെല്‍. അതുകൊണ്ടാണ് അദ്ദേഹത്തെ ടീമില്‍ ഉള്‍പ്പെടുത്താതിരുന്നതെന്ന് സിദാന്‍ അറിയിച്ചു. എന്നാല്‍ താരത്തെ വില്‍ക്കാന്‍ ടീം ശ്രമം നടത്തുന്നുണ്ടെങ്കിലും താത്പര്യം പ്രകടിപ്പിച്ച് ക്ലബ്ബുകളൊന്നും തന്നെ ഇതുവരെ രംഗത്ത് വന്നിട്ടില്ല. മൂന്ന് സീസണുകളിലേക്ക് കൂടി റയലുമായി ബെയ്ലിന് കരാര്‍ ബാക്കിയുണ്ട്.