ഫ്രീകിക്ക് നവമാധ്യമങ്ങളില്‍ തരംഗം
നിലമ്പൂരിലെ പൂലപാടം ജിഎല്‍പി സ്കൂളിലെ വിദ്യാര്‍ത്ഥികളാണ് സ്കൂള്‍ മൈതാനത്ത് വെച്ച് ലോകോത്തര ഫ്രീകിക്ക് പ്രകടനത്തിലൂടെ ഗോള്‍ നേടിയത്. പിന്നാലെ ഇന്‍സ്റ്റഗ്രാമിലും ട്വിറ്ററിലുമടക്കം ഈ ഫ്രീകിക്ക് ഗോള്‍ വീഡിയോ തരംഗമാവുകയാണ്. ലോക ഫുട്ബോളില്‍ തന്നെ ഈ മനോഹര ഫ്രീകിക്ക് ഗോള്‍ ചര്‍ച്ചയായി എന്നതാണ് യാഥാര്‍ത്ഥ്യം.
ക്ലാസിക് ഫ്രീകിക്ക് ഇങ്ങനെ
യുറോപ്യന്‍ ഫുട്ബോളിലൊക്കെ കാണുന്ന തരത്തിലുള്ള ക്ലാസിക് ഫ്രീകിക്കാണ് മലപ്പുറത്ത് പിറന്നത്. സ്കൂള്‍ മൈതാനത്ത് ഫുട്ബോള്‍ കളിക്കുന്നതിനിടെ ലഭിച്ച ഫ്രീകിക്കാണ് തന്ത്രപരമായി കുട്ടികള്‍ ഗോളാക്കിമാറ്റിയത്. മൂന്ന് കുട്ടികള്‍ ഫ്രീകിക്ക് എടുക്കുന്നത് പോലെ ഓടി കബളിപ്പിച്ച് നാലാമത്തെയാള്‍ എടുത്ത ഫ്രീകിക്കാണ് മനോഹരമായി പോസ്റ്റിന്‍റെ വലത് മൂലയില്‍ ചെന്ന് പതിച്ചത്.
കയ്യടിച്ച് ലോക ഫുട്ബോള്‍ താരങ്ങള്‍
ഫ്രീകിക്ക് വീഡിയോ വൈറലായതോടെ ഫുട്ബോള്‍ ലോകം ഒന്നടങ്കം കൈയ്യടിയുമായി രംഗത്തെത്തിയിരിക്കുകയാണ്. ട്വിറ്ററിലും ഇന്‍സ്റ്റഗ്രാമിലും അടക്കം നിരവധി അന്താരാഷ്ട്ര ഫുട്ബോള്‍ താരങ്ങളാണ് ഈ വീഡിയോ ഷെയര്‍ ചെയ്തിരിക്കുന്നത്. ഇതോടൊപ്പം ലിവര്‍പൂളിന്‍റെ സൂപ്പര്‍ സ്ട്രൈക്കര്‍ ശാക്കീരി "മികച്ച ഫ്രീകിക്ക്" എന്ന് ഇന്‍സ്റ്റഗ്രാമില്‍ കുറിക്കുകയും ചെയ്തു. ഫുട്ബോള്‍ താരം ലോതര്‍ മത്യാസും ഒളിമ്പ്യന്‍ മെലിസാ ഓര്‍തിസും ഇന്‍സ്റ്റഗ്രാമില്‍ പ്രതികരണം രേഖപ്പെടുത്തി.
കയ്യടിച്ച സൂപ്പര്‍ താരങ്ങള്‍ ഇവര്‍
നിലമ്പൂരിലെ ഈ ക്ലാസിക് ഫ്രീകിക്കിന് കയ്യടിച്ചവര്‍ ചില്ലറക്കാരല്ല എന്നതാണ് ശ്രദ്ധേയമായ കാര്യം. ബയേണ്‍ മ്യൂണിക്കിന്‍റെ ബ്രസീലിയന്‍ മുന്നേറ്റതാരം ഫിലിപ് കുട്ടീഞ്ഞ്യോ, ബാഴ്സലോണ താരങ്ങളായ ഇവാന്‍ റാകിടിച്ച്, ഫ്രാങ്ക് ഡിജോങ്, പിഎസ്ജിയുടെ അര്‍ജന്‍റൈന്‍ താരം എയ്ഞ്ചല്‍ ഡി മരിയ തുടങ്ങിയ സൂപ്പര്‍ താരങ്ങളൊക്കെയാണ് ഈ ഫ്രീകിക്ക് ഗോളിന് ലൈക്കടിച്ചിരിക്കുന്നത്.