ബ്ലാസ്റ്റേഴ്സിനും പരിശീലകൻ ഇവാൻ വുകോമനോവിച്ചിനും തിരിച്ചടി, അപ്പീലുകൾ തള്ളി എ ഐ എഫ് എഫ്

ബംഗളൂരു എഫ് സിക്കെതിരായ മത്സരം പൂർത്തിയാക്കാതെ മടങ്ങിയ കേരള ബ്ലാസ്റ്റേഴ്സ് എഫ് സിക്ക് 4 കോടി രൂപയായിരുന്നു വൈഭവ് ഗഗ്ഗർ തലവനായ എ ഐ എഫ് എഫിന്റെ അച്ചടക്ക സമിതി പിഴയിട്ടത്. സംഭവത്തിൽ പരസ്യമായ ക്ഷമാപണം നടത്തണമെന്നും അല്ലെങ്കിൽ പിഴത്തുക 6 കോടി രൂപയായി ഉയരുമെന്നും എ ഐ എഫ് എഫ് വ്യക്തമാക്കിയിരുന്നു. എന്നാൽ ബ്ലാസ്റ്റേഴ്സ് ഇക്കാര്യത്തിൽ ക്ഷമാപണം നടത്തി.

ടീമിന്റെ ഇറങ്ങിപ്പോക്കിന് നേതൃത്വം കൊടുത്ത ഇവാൻ വുകോമനോവിച്ചിന് 10 മത്സര വിലക്കും, 5 ലക്ഷം രൂപ പിഴയുമാണ് എ ഐ എഫ് എഫ് വിധിച്ചത്. പരസ്യമായ ക്ഷമാപണം നടത്തണമെന്നും അല്ലെങ്കിൽ പിഴത്തുക 10 ലക്ഷമായി ഉയരുമെന്നും എഐ എഫ് എഫ് വ്യക്തമാക്കി. ഇതിന് ശേഷമായിരുന്നു തങ്ങൾക്കെതിരായ വിധിക്കെതിരെ ഇവാനും ക്ലബ്ബും അപ്പീലിന് പോയത്‌.

തങ്ങൾക്കെതിരായ നടപടികൾക്ക് എതിരെ കേരള ബ്ലാസ്റ്റേഴ്സ് എഫ് സിയും, പരിശീലകൻ ഇവാൻ വുകോമനോവിച്ചും നൽകിയ അപ്പീലുകൾ അക്ഷയ് ജെയ്റ്റ്ലി തലവനായ കമ്മറ്റിയാണ് തള്ളിയത്‌. രണ്ടാഴ്ചയ്ക്കകം ഈ പിഴ അടക്കാനാണ് ക്ലബ്ബിനും ഇവാൻ വുകോമനോവിച്ചിനും ലഭിച്ചിരിക്കുന്ന നിർദ്ദേശം. ഇരു കൂട്ടർക്കും കനത്ത തിരിച്ചടി നൽകുന്ന കാര്യമാണിത്.

മാർച്ച് മൂന്നാം തീയതി ബംഗളൂരുവിലെ ശ്രീ കണ്ടീരവ സ്റ്റേഡിയത്തിൽ വെച്ചു നടന്ന കേരള ബ്ലാസ്റ്റേഴ്സ് എഫ് സി-ബംഗളൂരു എഫ് സി എലിമിനേറ്റർ മത്സരത്തിനിടെയാണ് വിവാദ സംഭവങ്ങൾ നടന്നത്. നിശ്ചിത സമയത്ത് സമനിലയിൽ തുടർന്ന മത്സരം അധിക സമയത്തേക്ക് നീണ്ടപ്പോളായിരുന്നു സംഭവം.

കളിയുടെ തൊണ്ണൂറ്റിയാറാം മിനുറ്റിൽ ബംഗളൂരു സൂപ്പർ താരം സുനിൽ ഛേത്രി നേടിയ ഒരു ക്വിക്ക് ഫ്രീ കിക്ക് ഗോൾ റഫറി ക്രിസ്റ്റൽ ജോൺ അനുവദിച്ചതാണ് വിവാദമായത്. തങ്ങൾ തയ്യാറാകും മുന്നേയാണ് ഛേത്രി കിക്കെടുത്തെന്നും അത് ഗോൾ അനുവദിക്കാനാവില്ലെന്നും ബ്ലാസ്റ്റേഴ്സ് താരങ്ങൾ പറഞ്ഞെങ്കിലും റഫറി തന്റെ തീരുമാനത്തിൽ നിന്ന് പിന്മാറാൻ തയ്യാറായില്ല. ഇതോടെ പരിശീലകൻ ഇവാൻ വുകോമനോവിച്ച് ബ്ലാസ്റ്റേഴ്സ് താരങ്ങളുമായി മൈതാനം വിട്ടു. തുടർന്ന് മൈതാനത്തേക്ക് തിരിച്ചു വരാൻ ബ്ലാസ്റ്റേഴ്സ് വിസമ്മതിച്ചതോടെ ബംഗളൂരു എഫ് സിയെ വിജയികളായി പ്രഖ്യാപിക്കുകയായിരുന്നു.

Read Latest Sports News and Malayalam News