ഐഎസ്എല്ലില്‍ ഡല്‍ഹിയെ തകര്‍ത്ത് കൊല്‍ക്കത്ത

ന്യൂഡല്‍ഹി: ഐഎസ്എല്ലില്‍ ഒരിടവേളയ്ക്ക് ശേഷം നടന്ന ഡല്‍ഹി ഡൈനാമോസ്- അമര്‍ തൊമര്‍ കൊല്‍ക്കത്ത പോരാട്ടത്തില്‍ കൊല്‍ക്കത്തയ്ക്ക് ജയം. ഒന്നിനെതിരെ രണ്ട് ഗോളുകള്‍ക്കാണ് എടികെ ഡല്‍ഹിയെ തറപറ്റിച്ചത്. എടികെയ്ക്കായി ബല്‍വന്ത് സിങ്ങും എല്‍ മൈമുനിയുമാണ് ലക്ഷ്യം കണ്ടത്.

കളം നിറഞ്ഞു കളിച്ച എടികെ ആദ്യപകുതി അവസാനിക്കുന്നതിന് മുമ്പ് തന്നെ ലീഡ് നേടി. ബല്‍വന്ത് സിങ്ങാണ് എടികെയ്ക്കായി ആദ്യഗോള്‍ സ്വന്തമാക്കിയത്. എന്നാല്‍ രണ്ടാം പകുതിയുടെ തുടക്കത്തില്‍ തന്നെ ഡല്‍ഹി ഗോള്‍ മടക്കി. പ്രീതം കോട്ടാലിന്‍റെ വകയായിരുന്നു ഡല്‍ഹിയുടെ മറുപടി ഗോള്‍. പിന്നീട് മത്സരം സമനിലയില്‍ അവസാനിക്കുമെന്ന് തോന്നിപ്പിച്ചെങ്കിലും മൊറോക്കന്‍ താരം മൈമുനി വിജയ ഗോള്‍ നേടുകയായിരുന്നു.