ബ്ലാസ്റ്റേഴ്സ് - ബെംഗളൂരു മത്സരത്തിൽ ഗോൾമഴ; വീണ്ടും തോൽവിയേറ്റുവാങ്ങി മഞ്ഞപ്പട

ആദ്യം ഗോളടിച്ചിട്ടും ബെംഗളൂരു എഫ്സിയോട് കേരള ബ്ലാസ്റ്റേഴ്സിന് ദയനീയ തോൽവി. ഗോൾമഴ കണ്ട മത്സരത്തിൽ ആകെ ആറ് ഗോളുകളാണ് പിറന്നത്. 4-2നാണ് മുൻ ചാമ്പ്യൻമാരോട് മഞ്ഞപ്പട പരാജയപ്പെട്ടത്. മലയാളി താരം കെപി രാഹുൽ നേടിയ ഗോളിലൂടെ ബ്ലാസ്റ്റേഴ്സാണ് ആദ്യം ലീഡ് നേടിയത്. ഇരുടീമുകളും ഒരു പോലെ മുന്നേറ്റങ്ങൾ നടത്തിയ സമയത്താണ് തകർപ്പൻ ഗോളിലൂടെ ബ്ലാസ്റ്റേഴ്സ് മുന്നിലെത്തിയത്.

എന്നാൽ ആദ്യപകുതിയുടെ 29ാം മിനിറ്റിൽ തന്നെ ബെംഗളൂരു തിരിച്ചടിച്ചു. ക്ലെയ്റ്റൺ സിൽവയാണ് ബെംഗളൂരുവിനായി ഗോളടിച്ചത്. 1-1 എന്ന നിലയിലാണ് ഒന്നാം പകുതി അവസാനിച്ചത്. എന്നാൽ രണ്ടാം പകുതിയിൽ ബെംഗളൂരുവിൻെറ മുന്നേറ്റ മികവ് വരാനിരിക്കുന്നതേ ഉണ്ടായിരുന്നുള്ളൂ. ക്രിസ്റ്റ്യൻ ഒപ്സേത്, ദിമാസ് ഡെൽഗാഡോ എന്നിവർ 51ാം മിനിറ്റിലും 53ാം മിനിറ്റിലും ബ്ലാസ്റ്റേഴ്സ് ഗോൾവല കുലുക്കി.


ക്യാപ്റ്റൻ വിൻസെൻെറ ഗോമസ് 61ാം മിനിറ്റിൽ ബ്ലാസ്റ്റേഴ്സിനെ വീണ്ടും മത്സരത്തിലേക്ക് തിരികെ കൊണ്ടുവന്നു. എന്നാൽ 65ാം മിനിറ്റിൽ സുനിൽ ഛേത്രി നേടിയ ഗോളിലൂടെ ബെംഗളൂരു 4-2ൻെറ വിജയം ഉറപ്പാക്കി.