കേരള ബ്ലാസ്റ്റേഴ്സിനായി 23 മത്സരങ്ങളില് ബൂട്ടണിഞ്ഞ വാസ്ക്വെസ് എട്ട് ഗോള് നേടുകയും രണ്ട് ഗോളിന് അസിസ്റ്റ് നടത്തുകയും ചെയ്തിരുന്നു. ലോംഗ് റേഞ്ച് ഷോട്ടുകളിലൂടെ ഗോള് നേടുന്നതില് തനിക്കുള്ള പ്രത്യേക പ്രാഗല്ഭ്യം വാസ്ക്വെസ് കേരള ബ്ലാസ്റ്റേഴ്സ് ജഴ്സിയില് പുറത്തെടുത്തിരുന്നു എന്നതാണ് ശ്രദ്ധേയം. അടുത്ത സീസണില് വാസ്ക്വെസ് കേരള ബ്ലാസ്റ്റേഴ്സില് ഉണ്ടാകില്ലെന്ന റിപ്പോര്ട്ടുകളാണ് ഇപ്പോള് വാസ്തവമായിരിക്കുന്നത്. വാസ്ക്വെസ് എഫ് സി ഗോവയിലേക്ക് ചേക്കേറുമ്പോള് ഉണ്ടാകുന്ന അഞ്ച് സാഹചര്യങ്ങള്...
1. എഫ് സി ഗോവയില് പെന്ന - വാസ്ക്വെസ് കൂട്ടുകെട്ട്
2022 - 2023 ഐ എസ് എല് സീസണിലേക്ക് എഫ് സി ഗോവ ഒപ്പിടുന്ന ആദ്യ കളിക്കാരനാണ് ആല്വാരൊ വാസ്ക്വെസിന്റേത്. സീസണിലെ ആദ്യ കരാറില് തന്നെ ഐ എസ് എല്ലിലെ മറ്റ് ക്ലബ്ബുകളെ ഞെട്ടിച്ചിരിക്കുകയാണ് എഫ് സി ഗോവ എന്നതാണ് വാസ്തവം. 2022 - 2023 സീസണിലേക്ക് എഫ് സി ഗോവ പുതിയൊരു സഖ്യത്തെയാണ് ഈ കരാറിലൂടെ മുന്നോട്ട് വയ്ക്കുന്നതെന്നതും ശ്രദ്ധേയം. എഫ് സി ഗോവയുടെ മുന് താരവും സ്പാനിഷ് കാരനുമായ കാര്ലോസ് പെന്ന ക്ലബ്ബിന്റെ മുഖ്യ പരിശീലക റോളില് ഈ മാസം പകുതിയോടെ എത്തിയിരുന്നു. പെന്ന - വാസ്ക്വെസ് സഖ്യത്തില് വിശ്വാസം അര്പ്പിച്ചാകും അടുത്ത സീസണിലേക്ക് ഗോവ തയാറെടുപ്പ് ആരംഭിക്കുന്നത്.
Also Read : സൂപ്പർ താരത്തെ സ്വന്തമാക്കാൻ ശക്തമായ മത്സരം; ബ്ലാസ്റ്റേഴ്സ് അടക്കം 3 ക്ലബ്ബുകൾ രംഗത്ത്
2. വമ്പന്മാര് ഞെട്ടി
2021 - 2022 സീസണില് കേരള ബ്ലാസ്റ്റേഴ്സില് നടത്തിയ പ്രകടനത്തിലൂടെ ആല്വാരോ വാസ്ക്വെസ് എന്ന 30 കാരന് അമേരിക്കയില് വരെ ശ്രദ്ധേ പിടിച്ചുപറ്റിയിരുന്നു. ലോംഗ് റേഞ്ചും ഫ്രീ കിക്കും ഗോള് നേടുന്നതിനൊപ്പം അസിസ്റ്റ് ചെയ്യുന്നതിലുമുള്ള കഴിവ് ബ്ലാസ്റ്റേഴ്സ് ജഴ്സിയില് വാസ്ക്വെസ് പ്രകടിപ്പിച്ചതോടെയാണ് വിദേശ ക്ലബ്ബുകള് അടക്കം വാസ്ക്വെസിന്റെ പിന്നാലെ കൂടിയത്. എന്നാല്, എല്ലാ വമ്പന് ക്ലബ്ബുകളെയും ഞെട്ടിച്ചാണ് വാസ്ക്വെസിനെ എഫ് സി ഗോവ സ്വന്തമാക്കിയിരിക്കുന്നത്.
ഐ എസ് എല്ലിലെ കോല്ക്കത്തന് ക്ലബ്ബായ എ ടി കെ മോഹന് ബഗാന്, മുന് ചാമ്പ്യന്മാരായ മുംബൈ സിറ്റി എഫ് സി, ചെന്നൈയിന് എഫ് സി, അമേരിക്കന് സോക്കര് ലീഗ് ക്ലബ്ബുകള്, ചൈനീസ് ക്ലബ്ബുകള് തുടങ്ങിയവ എല്ലാം വാസ്ക്വെസിനായി രംഗത്തുണ്ടായിരുന്നു.
3. തിരിച്ചു വരാന് ഗോവ
2021 - 2022 സീസണ് ഐ എസ് എല് ഫുട്ബോളില് എഫ് സി ഗോവയ്ക്ക് പ്രതീക്ഷിച്ച പ്രകടനം കാഴ്ച വയ്ക്കാന് സാധിച്ചിരുന്നില്ല. 20 മത്സരങ്ങളില് നാല് ജയവും ഏഴ് സമനിലയും നല്കിയ 19 പോയിന്റുമായി ഒമ്പതാം സ്ഥാനത്ത് ഫിനിഷ് ചെയ്യാനേ എഫ് സി ഗോവയ്ക്ക് സാധിച്ചിരുന്നുള്ളൂ. 2016 നുശേഷം ആദ്യമായി ആണ് നോക്കൗട്ടില് കടക്കാതെ എഫ് സി ഗോവ പുറത്തായത്. ഐ എസ് എല് ചരിത്രത്തില് രണ്ടാം തവണ മാത്രവും. സീസണിന്റെ ഇടയില് വച്ച് മുഖ്യ പരിശീലകനായിരുന്ന ഹ്വാന് ഫെറാന്ഡൊ എ ടി കെ മോഹന് ബഗാനിലേക്ക് ചേക്കേറുകയും ചെയ്തത് ഗോവയ്ക്ക് കനത്ത പ്രഹരമായി.
കയ്പ്പേറിയ 2021 - 2022 സീസണില് നിന്ന് മോചിതമായി പുതിയൊരു കുതിപ്പാണ് എഫ് സി ഗോവ 2022 - 2023 സീസണില് ആഗ്രഹിക്കുന്നത്. കാര്ലോസ് പെന്നയെ മുഖ്യ പരിശീലകന് ആക്കിയതും ഇപ്പോള് ആല്വാരൊ വാസ്ക്വെസിനെ കേരള ബ്ലാസ്റ്റേഴ്സ് എഫ് സിയില് നിന്ന് സ്വന്തമാക്കിയതും അതിന്റെ സൂചനകള് ആണ്.
4. വാസ്ക്വെസിനായുള്ള കാത്തിരിപ്പ് അവസാനിച്ചു
സത്യത്തില് 2021 - 2022 സീസണ് ഐ എസ് എല്ലില് ആല്വാരൊ വാസ്ക്വെസിനെ സ്വന്തമാക്കാന് മുന് പന്തിയില് ഉണ്ടായിരുന്നത് എഫ് സി ഗോവ ആയിരുന്നു. എന്നാല്, ഗോവയുടെ നീക്കം ഫലം കണ്ടില്ല. അതോടെയാണ് കേരള ബ്ലാസ്റ്റേഴ്സ് എഫ് സിയിലേക്ക് വാസ്ക്വെസ് എത്തിയത്. സ്പാനിഷ് ലാ ലിഗ ഫുട്ബോളില് 150ല് അധികം മത്സരങ്ങളുടെയും ഇംഗ്ലീഷ് പ്രീമിയര് ലീഗിലും കളിച്ച് പരിചയമുള്ള താരമാണ് ആല്വാരൊ വാസ്ക്വെസ്. 2013 യുവേഫ യൂറോ അണ്ടര് 21 ചാമ്പ്യന്ഷിപ്പ് സ്വന്തമാക്കിയ സ്പാനിഷ് ടീമിന്റെ നിര്ണായക സാന്നിധ്യമായിരുന്നു. 2011 ഫിഫ അണ്ടര് 20 ലോകകപ്പ് ഫുട്ബോളില് സില്വര് ഷൂ സ്വന്തമാക്കിയതും ആല്വാരൊ വാസ്ക്വെസ് ആണ്.
കഴിഞ്ഞ സീസണില് എയ്റം കബ്റേറയെ ആയിരുന്നു സ്ട്രൈക്കര് റോളില് എഫ് സി ഗോവ സ്വന്തമാക്കിയത്. കേരള ബ്ലാസ്റ്റേഴ്സിന് എതിരായ ഹാട്രിക് അടക്കം 13 മത്സരങ്ങളില് ആറ് ഗോള് നേടിയ താരം പരിക്കേറ്റ് പിന്മാറിയത് ഗോവയ്ക്ക് കനത്ത പ്രഹരവുമായി. ഫെറാന് കൊറോമിനസ്, ഇഗോര് അംഗൂളൊ, കബ്റേറ എന്നിവരേക്കാള് ഒക്കെ ചെറുപ്പമാണ് എഫ് സി ഗോവയില് എത്തുമ്പോള് ആല്വാരൊ വാസ്ക്വെസിന് എന്നതും ശ്രദ്ധേയം.
5. ബ്ലാസ്റ്റേഴ്സ് പുതുസഖ്യം കണ്ടെത്തണം
ആല്വാരൊ വാസ്ക്വെസ് - അര്ന്റീനക്കാരനായ ജോര്ജ് പെരേര ഡിയസ് എന്നിവർ ചേർന്ന മുന്നേറ്റ നിര സഖ്യമായിരുന്നു 2021 - 2022 സീസണ് ഐ എസ് എല്ലില് കേരള ബ്ലാസ്റ്റേഴ്സിന്റെ മുന്നേറ്റത്തില് നിര്ണായക പങ്കു വഹിച്ചത്. വാസ്ക്വെസ് എട്ട് ഗോളും രണ്ട് അസിസ്റ്റും നടത്തിയപ്പോള് ജോര്ജ് പെരേര ഡിയസ് എട്ട് ഗോളും ഒരു അസിസ്റ്റും നടത്തി. 2021 - 2022 ഐ എസ് എല് ഫൈനലില് കേരള ബ്ലാസ്റ്റേഴ്സിനെ എത്തിച്ച വാസ്ക്വെസ് - ഡിയസ് സഖ്യം ഇതോടെ ഇല്ലാതായി. ലോണ് അടിസ്ഥാനത്തില് എത്തിയ ജോര്ജ് പെരേര ഡിയസ് തന്റെ മാതൃക്ലബ്ബായ പ്ലേറ്റന്റിലേക്ക് തിരിച്ച് പോകുമെന്നാണ് ശക്തമായ സൂചന. ചുരുക്കത്തില് 2022 - 2023 ഐ എസ് എല് സീസണിലേക്ക് പുതിയ മുന്നേറ്റ സഖ്യത്തെ കേരള ബ്ലാസ്റ്റേഴ്സ് കണ്ടെത്തേണ്ടിയിരിക്കുന്നു.