ISL 2020: ബെംഗളൂരുവിനോട് പൊരുതി സമനില പിടിച്ച് ഗോവ

ഇന്ത്യൻ സൂപ്പർ ലീഗ് 2020ൽ തങ്ങളുടെ ആദ്യമത്സരത്തിന് ഇറങ്ങിയ ആതിഥേയരായ എഫ് സി ഗോവ ബെംഗളൂരുവിനോട് പൊരുതി സമനില പിടിച്ചു. രണ്ട് ഗോളുകൾക്ക് പിന്നിൽ നിന്ന ശേഷമായിരുന്നു ഗോവയുടെ തിരിച്ചുവരവ്. അരങ്ങേറ്റ മത്സരം കളിച്ച ബ്രസീലിയൻ താരം ക്ലെയ്റ്റൻ സിൽവയാണ് ബെംഗളൂരുവിനെ മുന്നിലെത്തിച്ചത്. 27ാം മിനിറ്റിലാണ് ആദ്യഗോൾ പിറന്നത്. ഒന്നാം പകുതിയിൽ ബെംഗളൂരു 1-0നാണ് മുന്നിൽ നിന്നത്.

രണ്ടാം പകുതിയുടെ 57ാം മിനിറ്റിൽ ഫ്രീകിക്കിൽ നിന്നാണ് ബെംഗളൂരു രണ്ടാം ഗോൾ നേടിയത്. സെൻട്രൽ ബാക്ക് യുവനാനാണ് ഗോളടിച്ചത്. രണ്ട് ഗോളുമായി വിജയമുറപ്പിച്ച് മുന്നേറിയ ബെംഗളൂരുവിനെ ഗോവ പിന്നീട് സ്തബ്ധരാക്കുന്ന കാഴ്ചയാണ് കണ്ടത്. ഇഗോർ അൻഗുലോയാണ് ഗോവയുടെ രക്ഷകനായത്. മൂന്ന് മിനുറ്റ് ഇടവേളയിലാണ് അൻഗുലോ ബെംഗളൂരു വലയിൽ രണ്ട് ഗോളുകൾ അടിച്ച് കയറ്റിയത്.

Also Read: ശ്രീശാന്തിന്റെ മടങ്ങിവരവ് ഉറപ്പിച്ചു, ഈ ടൂര്‍ണമെന്റില്‍ പന്തെറിയും; മലയാളികള്‍ക്ക് ആവേശമിരട്ടിക്കും!!

പകരക്കാരനായി ഇറങ്ങിയ താരം 66ാം മിനിറ്റിലാണ് ബെംഗളൂരുവിനെ ഞെട്ടിച്ചത്. വിജയം ഉറപ്പിച്ച ടീമിന് അത് ആദ്യപ്രഹരമായി. 69ാം മിനിറ്റിൽ വല ചലിപ്പിച്ച് അൻഗുലോ മത്സരം 2-2ന് സമനിലയിലാക്കി. ബെംഗളൂരുവിനായി മലയാളി താരം ആഷിഖ് കുരുണിയൻ ആദ്യ ഇലവനിൽ തന്നെ സ്ഥാനം പിടിച്ചിരുന്നു.