കേരള ബ്ലാസ്റ്റേഴ്സ് കാത്തിരുന്ന കാര്യം ഇന്ന് നടക്കും, പ്ലേ ഓഫിന് മുൻപ് ഹാപ്പി ന്യൂസ്; ഇനി കളിമാറുമെന്ന് ആരാധകർ

2023-24 സീസൺ ഇന്ത്യൻ സൂപ്പർ ലീഗിന്റെ (Indian Super League) ആദ്യ പ്ലേ ഓഫ് എലിമിനേറ്റർ മത്സരത്തിൽ ഇന്ന് കരുത്തരായ ഒഡീഷ എഫ്സിയെ നേരിടാൻ ഒരുങ്ങുകയാണ് കേരള ബ്ലാസ്റ്റേഴ്സ് എഫ്സി (Kerala Blasters FC). ലീഗ് ഘട്ടത്തിൽ അഞ്ചാം സ്ഥാനത്ത് ഫിനിഷ് ചെയ്താണ് ബ്ലാസ്റ്റേഴ്സ് ഇത്തവണ പ്ലേ ഓഫിൽ കടന്നത്. അതേ സമയം നാലാമതായാണ് ഒഡീഷ എഫ്സി ലീഗ് ഘട്ടം അവസാനിപ്പിച്ചത്. മുന്നിൽ ഫിനിഷ് ചെയ്തത് കൊണ്ടുതന്നെ ഒഡീഷ എഫ്സിയുടെ ഹോം ഗ്രൗണ്ടായ കലിംഗ സ്റ്റേഡിയത്തിലാണ്‌ മത്സരം നടക്കുക.അതേ സമയം ഈ മത്സരത്തിന് മുൻപ് കേരള ബ്ലാസ്റ്റേഴ്സ് ആരാധകരെ ആവേശത്തിലാക്കുന്ന ഒരു വാർത്ത പുറത്ത് വന്നിട്ടുണ്ട്. ടീമിന്റെ സൂപ്പർ താരം അഡ്രിയാൻ ലൂണ ഇന്നത്തെ മത്സരത്തിൽ കളിക്കാൻ ഇറങ്ങും എന്നതാണ് അത്. പരിക്കിനെത്തുടർന്ന് ഡിസംബർ പകുതി മുതൽ കളിക്കളത്തിന് പുറത്തുള്ള ലൂണയുടെ തിരിച്ചുവരവ്‌ മത്സരം കൂടിയാണിത്. മത്സരത്തലേന്ന് മാധ്യമങ്ങളോട് സംസാരിക്കവെ കേരള ബ്ലാസ്റ്റേഴ്സ് പരിശീലകൻ ഇവാൻ വുകോമനോവിച്ചാണ് ലൂണയുടെ കാര്യത്തിൽ അപ്ഡേറ്റ് പുറത്ത് വിട്ടത്. അതേ സമയം ഇന്ന് കളത്തിലിറങ്ങുമെങ്കിലും ലൂണയുടെ കാര്യത്തിൽ മറ്റൊരു കണ്ടീഷനുണ്ടെന്നും ഇവാൻ ചൂണ്ടിക്കാട്ടി.



അഡ്രിയാൻ ലൂണ ഒഡീഷ എഫ്സിക്കെതിരായ പ്ലേ ഓഫ് മത്സരത്തിൽ കേരള ബ്ലാസ്റ്റേഴ്സിനായി ഇറങ്ങുമെന്നും എന്നാൽ 90 മിനിറ്റും കളത്തിൽ ഉണ്ടാവില്ലെന്നുമാണ് ഇവാൻ പത്രസമ്മേളനത്തിൽ വ്യക്തമാക്കിയത്. ഇതോടെ പകരക്കാരനായി താരം ഇന്ന് കളത്തിൽ ഇറങ്ങാനുള്ള ‌സാധ്യതകളാണ് ഉയർന്നിരിക്കുന്നത്. ''അഡ്രിയാൻ ലൂണ ഞങ്ങൾക്കൊപ്പമുണ്ട്. ഒരുപാട് നാളുകൾക്ക് ശേഷമാണ് അവൻ തിരിച്ചുവരുന്നത്, അത് നമ്മൾ പരിഗണിക്കണം. അവന് 90 മിനിറ്റ് കളിക്കാനാകില്ല, പക്ഷേ തീർച്ചയായും നമ്മൾ ഏറെക്കാലത്തിന് ശേഷം അഡ്രിയാൻ ലൂണയെ പിച്ചിൽ കാണും". കേരള ബ്ലാസ്റ്റേഴ്സ് പരിശീലകൻ പറഞ്ഞു.

കേരള ബ്ലാസ്റ്റേഴ്സ് ടീമിൽ സുപ്രധാന മാറ്റം വരും, സൂപ്പർ താരം കളിക്കും; പ്ലേ ഓഫിൽ മഞ്ഞപ്പട രണ്ടും കൽപ്പിച്ച്, സാധ്യത ലൈനപ്പ്

നേരത്തെ ഈ‌ സീസണിൽ ഉജ്ജ്വല ഫോമിൽ കളിച്ചുകൊണ്ടിരുന്ന അഡ്രിയാൻ ലൂണ 2023 ഡിസംബറിലാണ് പരിക്കിന്റെ പിടിയിലായത്. പഞ്ചാബ് എഫ്സിക്കെതിരായ ഐ എസ്‌ എൽ എവേ പോരാട്ടത്തിന് മുൻപായിരുന്നു ഇത്. തുടർന്ന് ശസ്ത്രക്രിയ യ്ക്ക് വിധേയനായ ലൂണയ്ക്ക് ഈ സീസൺ നഷ്ടമാകുമെന്നായിരുന്നു ആദ്യം വന്ന റിപ്പോർട്ടുകൾ. എന്നാൽ പ്രതീക്ഷിച്ചതിലും വേഗത്തിൽ അദ്ദേഹം കളിക്കളത്തിലേക്ക് തിരിച്ചെത്തുകയായിരുന്നു.

അഡ്രിയാൻ ലൂണയുടെ അഭാവം കേരള ബ്ലാസ്റ്റേഴ്സിന്റെ പ്രകടനങ്ങളെയും ബാധിക്കുന്നതാണ് ഈ വർഷം കണ്ടത്. ലൂണയില്ലാതെ കളിച്ച കലിംഗ സൂപ്പർ കപ്പിൽ സെമിഫൈനൽ പോലും കാണാതെ പുറത്തായ മഞ്ഞപ്പട, ഐ എസ്‌ എല്ലിലും മോശം പ്രകടനങ്ങളിലേക്ക് വീണു. ഈ കലണ്ടർ വർഷം കളിച്ച ഐ എസ്‌ എൽ മത്സരങ്ങളിൽ ആകെ രണ്ട് കളികളിൽ മാത്രമാണ് മഞ്ഞപ്പട ജയിച്ചത്.

കേരള ബ്ലാസ്റ്റേഴ്സിന് കനത്ത തിരിച്ചടി, പ്ലേ ഓഫിന് മുൻപ് പണി കിട്ടി; സൂപ്പർ താരം കളിക്കില്ല, പുറത്താകുന്നത് സസ്പെൻഷൻ മൂലം
2023-24 സീസണിൽ മഞ്ഞപ്പടയ്ക്കായി ഒൻപത് ഐ എസ്‌ എൽ മത്സരങ്ങളിലാണ് അഡ്രിയാൻ ലൂണ ബൂട്ടുകെട്ടിയത്. ഇതിൽ മൂന്ന് ഗോളുകളും നാല് അസിസ്റ്റുകളും സ്വന്തമാക്കാൻ അദ്ദേഹത്തിന് കഴിഞ്ഞിരുന്നു. ഇതിന് മുൻപ് ഡ്യൂറൻഡ് കപ്പിൽ മഞ്ഞപ്പടയ്ക്കായി കളിച്ച താരം രണ്ട് മത്സരങ്ങളിൽ ഒരു ഗോളും ഒരു അസിസ്റ്റും നേടി.

നേരത്തെ 2021-22 സീസണ് മുന്നോടിയായാണ് അഡ്രിയാൻ ലൂണ ആദ്യമായി കേരള‌ ബ്ലാസ്റ്റേഴ്സിൽ എത്തിയത്. മഞ്ഞപ്പടയിൽ ലൂണ എത്തിയതിന് ശേഷമുള്ള മൂന്നാം സീസണാണ് ഇത്തവണത്തേത്. ഈ മൂന്ന് സീസണുകളിലും കേരള ബ്ലാസ്റ്റേഴ്സ് പ്ലേ ഓഫിൽ എത്തി എന്നതാണ് ശ്രദ്ധേയം.