​എെഎസ്എൽ: കൊൽക്കത്തയെ തോൽപ്പിച്ച് ചെന്നൈയിൻ ഒന്നാമത്

ചെന്നൈ: ഇന്ത്യൻ സൂപ്പർ ലീഗിൽ അത്‍ലറ്റികോ ഡി കൊൽക്കത്തക്കെതിരെ ചെന്നൈയിൻ എഫ്.സിക്ക് വിജയം. 3-2ന് വിജയം നേടിയ ടീം ലീഗിൽ പോയിൻറ് പട്ടികയിൽ ഒന്നാമതെത്തി. ഇരട്ട ഗോൾ നേടിയ ജെജെ ലാൽ പെഖുലയാണ് ടീമിൻെറ വിജയശിൽപി.

90 മിനിറ്റ് നേരം സമനിലയിലായിരുന്ന മത്സരത്തെ ഇഞ്ചുറി ടൈമിൽ പെഖുല നേടിയ ഗോളാണ് ചെന്നൈയുടേത് ആക്കി മാറ്റിയത്. ലീഗിലെ ചെന്നൈയിൻെറ മൂന്നാമത്തെ വിജയമാണിത്. ഒമ്പത് പോയിൻറുമായാണ് അവ‍ർ ഒന്നാം സ്ഥാനത്തെത്തിയത്.

സെക്വിഞ്ഞയും എൻജാസി കുകിയുമാണ് കൊൽക്കത്തക്കായി ഗോൾ നേടിയത്. പെഖുലക്ക് പുറമെ ഇനിഗോ കാൽഡറോണാണ് ചെന്നൈയിന് വേണ്ടി ഒരു ഗോൾ നേടിയത്. എല്ലാ ഗോളുകളും പിറന്നത് മത്സരത്തിൻെറ രണ്ടാം പകുതിയിലായിരുന്നു.