Kerala Blasters Pre Season 2019: പ്രീ സീസണില്‍ മറ്റൊരു ഐഎസ്എല്‍ ക്ലബ്ബിനെതിരെ ബ്ലാസ്റ്റേഴ്സ് അങ്കത്തിനൊരുങ്ങുന്നു

കൊച്ചി: ഇന്ത്യന്‍ സൂപ്പര്‍ ലീഗിന്‍റെ ആറാമത് സീസണിന് മുന്നോടിയായി കേരളത്തില്‍ നടക്കുന്ന പ്രീ സീസണ്‍ മത്സരത്തില്‍ ഐഎസ്എല്ലിലെ മറ്റൊരു ടീമിനോട് കൊമ്പുകോര്‍ക്കാനൊരുങ്ങി കേരള ബ്ലാസ്റ്റേഴ്സ്. തൊട്ടടുത്ത മത്സരത്തില്‍ കേരള സന്തോഷ് ട്രോഫി ടീമിനോട് ഏറ്റുമുട്ടുന്ന കേരള ബ്ലാസ്റ്റേഴ്സ് അതിന് ശേഷമുള്ള മത്സരത്തിലാണ് പുതിയ ഐഎസ്എല്‍ ടീമായ ഹൈദരാബാദ് എഫ്സിയെ നേരിടുക.

കേരളത്തില്‍ നടന്ന ആദ്യ പ്രീ സീസണ്‍ മത്സരത്തില്‍ സൗത്ത് യുണൈറ്റഡിനെതിരായാണ് ബ്ലാസ്റ്റേഴ്സ് കളിച്ചത്. ഒന്നിനെതിരെ മൂന്ന് ഗോളുകള്‍ക്കായിരുന്നു കേരള ബ്ലാസ്റ്റേഴ്സിന്‍റെ ജയം. ഈ മത്സരത്തില്‍ ജയിച്ചെങ്കിലും രണ്ടാം മത്സരത്തില്‍ കൂടുതല്‍ കരുത്തരായ ഐ ലീഗ് ക്ലബ്ബ് റിയല്‍ കാശ്മീരിനെതിരെയാണ് കേരള ബ്ലാസ്റ്റേഴ്സ് ഏറ്റുമുട്ടിയത്. ഈ മത്സരത്തില്‍ ബ്ലാസ്റ്റേഴ്സ് പരാജയപ്പെടുകയും ചെയ്തു.

Also Read: ഐ എം വിജയന്‍റെ വണ്ടര്‍ ഗോളില്‍ കണ്ണുമിഴിച്ച് സോഷ്യല്‍ മീഡിയ

ഇതിന് പിന്നാലെയാണ് കൂടുതല്‍ മെച്ചപ്പെട്ട എതിരാളികളെ ബ്ലാസ്റ്റേഴ്സ് പ്രീ സീസണ്‍ മത്സരങ്ങള്‍ക്കായി എത്തിക്കുന്നത്. ഇതില്‍ ഈ സീസണില്‍ ഇന്ത്യന്‍ സൂപ്പര്‍ ലീഗില്‍ കളിക്കാനൊരുങ്ങുന്ന ഹൈദരാബാദ് എഫ്സിക്കെതിരയും ബ്ലാസ്റ്റേഴ്സ് ഏറ്റുമുട്ടുന്നുണ്ട്. പുതിയ സീസണില്‍ പൂനെ സിറ്റി എഫ്സിക്ക് പകരം വന്ന ടീമാണ് ഹൈദരാബാദ് എഫ്സി. ഈ മത്സരത്തില്‍ തീപാറുമെന്ന് തന്നെയാണ് ആരാധകര്‍ കരുതുന്നത്.

Also Read: 'ഡബിള്‍ സെഞ്ച്വറിക്ക് 200 റണ്‍സ് കുറവ്'; രോഹിതിനെ ട്രോളി സോഷ്യന്‍ മീഡിയ

നേരത്തേ യുഎഇയില്‍ വെച്ച് പ്രീ സീസണ്‍ മത്സരങ്ങള്‍ നടത്താനായിരുന്നു ബ്ലസ്റ്റേഴ്സിന്‍റെ തീരുമാനം. ഡിബ്ബ അല്‍ ഫുജൈറയ്ക്ക് എതിരായിട്ടായിരുന്നു ആദ്യ മത്സരം. ഈ മത്സരത്തില്‍ ബ്ലാസ്റ്റേഴ്സ് സമനില സ്വന്തമാക്കിയിരുന്നു. എന്നാല്‍ ഇതിന് പിന്നാലെ പ്രീ സീസണ്‍ ടൂര്‍ ബ്ലാസ്റ്റേഴ്സ് മാനേജ്മെന്‍റ് റദ്ദാക്കുകയായിരുന്നു. അതിന് ശേഷമാണ് കേരളത്തില്‍ മത്സരങ്ങൾ തുടരാന്‍ ബ്ലാസ്റ്റേഴ്സ് തീരുമാനിച്ചത്.