ബ്ലാസ്റ്റേഴ്സ് ചില്ലറക്കാരല്ല, ലോകക്ലബ്ബുകളില്‍ രണ്ടാം സ്ഥാനത്ത്; ബാഴ്സയും ലിവര്‍പൂളും പിന്നില്‍

ലോകമെമ്പാടും കോവിഡ് 19 ഭീതിയിൽ ലോക്ക്ഡൗൺ പ്രഖ്യാപിച്ചിരിക്കുന്ന സാഹചര്യത്തിൽ മത്സരങ്ങളെല്ലാം ഓണ്‍ലൈനാണ്. ട്വിറ്ററിലും ഇന്‍സ്റ്റഗ്രാമിലും ഒക്കെ തന്നെയാണ് ക്ലബ്ബുകള്‍ തമ്മില്‍ മത്സരിക്കുന്നത്. ഇക്കഴിഞ്ഞ ഏപ്രിൽ മാസത്തിൽ ലോകത്തിലെ ഫുട്ബോൾ ക്ലബ്ബുകളിൽ വെച്ചേറ്റവും കൂടുതൽ 'ഇൻസ്റ്റാഗ്രാം എൻഗേജ്മെന്റ്സ്' നേടിയതിൽ രണ്ടാം സ്ഥാനമാണ് ബ്ലാസ്റ്റേഴ്‌സ് കൈവരിച്ചത്. 3.68ശതമാനമാണ് കേരള ബ്ലാസ്റ്റേഴ്സിന്റെ റേറ്റിങ്.

ലോക്ക് ഡൗണ്‍ കാലത്ത് ഇന്‍സ്റ്റഗ്രാം എൻഗേജ്മെന്റ്സ് റേറ്റിംഗില്‍ വലിയ കുതിപ്പാണ് കേരള ബ്ലാസ്റ്റേഴ്സ് നടത്തിയിരിക്കുന്നത്. ലോകത്തിലെ മുൻനിര ഫുട്ബോൾ ക്ലബുകളായ എഫ് സി ബാഴ്സലോണ (0.97%), ലിവർപൂൾ എഫ് സി (0.88%), മാഞ്ചസ്റ്റർ യുണൈറ്റഡ് (0.57%) എന്നിവരൊക്കെതന്നെ ഇൻസ്റ്റാഗ്രാം എൻഗേജ്മെന്റിൽ ബ്ലാസ്റ്റേഴ്സിനെക്കാൾ പിന്നിലാണ്.

ബ്രസീലിലെ ഫുട്ബോള്‍ ക്ലബ്ബ് ഗ്രെമിയോ ഫുട്ബോള്‍ പോര്‍ട്ടോ അലെഗ്രോ ആണ് റേറ്റിംഗഗില്‍ ഒന്നാം സ്ഥാനത്തുള്ളത്. 3.78% എന്‍ഗേജ്മെന്‍റ് റേറ്റിംഗാണ് ഗ്രെയിയോയ്ക്ക് ലഭിച്ചത്. 1.4 ദശലക്ഷത്തിന്‍റെ ഇൻസ്റ്റാഗ്രാം ആരാധകരുള്ള ഇന്ത്യൻ സൂപ്പർ ലീഗിന്റെ ഭാഗമായ കേരള ബ്ലാസ്റ്റേഴ്സ് എഫ്‌സി ലോകമെമ്പാടുമുള്ള 1 ദശലക്ഷത്തിലധികം ഫോളോവേഴ്‌സ് ബേസ് ഉള്ള 58 ഫുട്ബോൾ ക്ലബ്ബുകളിൽ ഒന്നാണ്.

അത്ലറ്റുകൾ, ക്ലബ്ബുകൾ, ലീഗുകൾ, ഫെഡറേഷനുകൾ, അസോസിയേഷനുകൾ, സ്പോൺസർമാർ എന്നിവരുടെ ഡിജിറ്റൽ ആശയവിനിമയ, വിപണന ആവശ്യങ്ങളിൽ പ്രാവീണ്യമുള്ള ഏജൻസിയായ റിസൾട്ട്സ് സ്പോർട്സ് നടത്തിയ “ഗ്ലോബൽ ഡിജിറ്റൽ പ്ലാറ്റ്ഫോം ബെഞ്ച്മാർക്ക്” എന്ന പഠനമാണ് ഇത് സംബന്ധിച്ച പ്രഖ്യാപനം നടത്തിയത്.