​ആദ്യ ജയം നേടാൻ, ഗോളടിക്കാൻ... ബ്ലാസ്റ്റേഴ്‍സ് ഇന്ന് മുംബൈക്കെതിരെ

കൊച്ചി: എെഎസ്എലിലെ തങ്ങളുടെ മൂന്നാം മത്സരത്തിൽ കേരള ബ്ലാസ്റ്റേഴ്‍സ് ഇന്ന് മുംബൈ സിറ്റിക്കെതിരെ ഇറങ്ങുന്നു. സ്വന്തം കാണികൾക്ക് മുന്നിൽ ഇന്നെങ്കിലും ഗോളടിക്കുകയും ജയിക്കുകയും ചെയ്യുക എന്നത് തന്നെയായിരിക്കും ബ്ലാസ്റ്റേഴ്‍സിൻെറ ലക്ഷ്യം. ആദ്യ രണ്ട് മത്സരത്തിലും ടീം ഗോൾ രഹിത സമനില വഴങ്ങുകയായിരുന്നു.

കളിച്ച മൂന്ന് മത്സരങ്ങളിൽ ഒരു ജയവും രണ്ട് തോൽവിയുമായാണ് മുംബൈ കൊച്ചിയിൽ ഇറങ്ങുന്നത്. മൂന്ന് മത്സരങ്ങളിൽ നിന്ന് അവർക്ക് മൂന്ന് പോയിൻറ് ഉള്ളപ്പോൾ ബ്ലാസ്റ്റേഴ്‍സിന് വെറും രണ്ട് പോയിൻറ് മാത്രമാണുള്ളത്. മൂന്ന് മത്സരങ്ങളിലും മികച്ച പോരാട്ട മികവാണ് മുംബൈ കാഴ്ച വെച്ചത്.

രാത്രി എട്ടിനാണ് കൊച്ചി കലൂർ ഇൻറർനാഷണൽ സ്റ്റേഡിയത്തിൽ മത്സരം നടക്കുക. ആക്രമണ ഫുട്ബോളിന് ഊന്നൽ നൽകിയായിരിക്കും ബ്ലാസ്റ്റേഴ്‍സ് ഇന്നിറങ്ങുക. പരുക്കേറ്റ് വിശ്രമത്തിലായിരുന്ന മുന്‍ മാഞ്ചസ്റ്റര്‍ യുണൈറ്റഡ് താരം വെസ് ബ്രൗണ്‍ ഇന്ന് കളിക്കളത്തിൽ ഇറങ്ങുമെന്നാണ് സൂചന.