ബ്ലാസ്റ്റേഴ്സ് പ്ലേഓഫില്‍ എത്തുമോ?
ഐഎസ്എല്‍ അവസാന ഘട്ടത്തിലേക്ക് കടക്കുമ്പോള്‍ കേരള ബ്ലാസ്റ്റേഴ്സ് ആരാധകര്‍ ഒന്നടങ്കം നെഞ്ചിടിപ്പോടെ ചോദിക്കുന്ന ചോദ്യമാണിത്. മഞ്ഞപ്പട ഇക്കുറിയെങ്കിലും കലിപ്പടക്കുമോ എന്നത്. എന്നാല്‍ ആരാധകരെ സമാധാനിപ്പിക്കാന്‍ പോലും എത്തുമെന്ന് ഉറപ്പിച്ച് പറയാന്‍ കഴിയാത്ത സ്ഥിതിയാണ് ഇപ്പോഴുള്ളത്. സ്വയം ആശ്വസിക്കാനെങ്കിലും അങ്ങനെ വിശ്സിക്കുന്ന ആരാധകര്‍ക്ക് പോലും ചങ്കിടിപ്പ് കൂട്ടുന്നതാണ് ക്യാപ്റ്റന്‍ ബര്‍ത്തലോമിയോ ഒഗ്ബെചെയുടെ വാക്കുകള്‍.
ആദ്യനാലിലെത്തുക ബുദ്ധിമുട്ടെന്ന് ക്യാപ്റ്റന്‍
സീസണിലെ എഫ്സി ഗോവയ്ക്ക് എതിരായ മത്സരത്തിന് മുന്നോടിയായി മാധ്യമങ്ങള്‍ക്ക് നല്‍കിയ അഭിമുഖത്തിലാണ് കേരള ബ്ലാസ്റ്റേഴ്സ് ക്യാപ്റ്റന്‍ ബര്‍ത്തലോമിയോ ഒഗ്ബെചെ ചില കാര്യങ്ങള്‍ തുറന്ന് പറഞ്ഞത്. ഇതില്‍ ആദ്യനാലില്‍ എത്തുക എന്നത് ബുദ്ധിമുട്ടേറിയ കാര്യമാണെന്ന് ഒഗ്ബെചെ വ്യക്തമാക്കുന്നു. അതേസമയം പോരാടാന്‍ തന്നെയാണ് ടീമിന്‍റെ തീരുമാനമെന്ന് ക്യാപ്റ്റന്‍ തുറന്നടിച്ചു.
ഒട്ടും സമ്മര്‍ദ്ദമില്ല
ഒട്ടും സമ്മര്‍ദ്ദമില്ലാതെയാണ് കേരള ബ്ലാസ്റ്റേഴ്സ് സീസണില്‍ കളിക്കുന്നതെന്ന് ഒഗ്ബെചെ വ്യക്തമാക്കി. അതുകൊണ്ട് തന്നെ ഏതു ടീമിനോടും മികച്ച പ്രകടനം പുറത്തെടുക്കാന്‍ ബ്ലാസ്റ്റേഴ്സിന് സാധിക്കും. ഇനിയുള്ള മത്സരങ്ങളിലും പ്രതീക്ഷയോടെ തന്നെ കളിക്കാന്‍ ടീമിന് കഴിയുമെന്നും ബുദ്ധിമുട്ടാണെങ്കില്‍ കൂടി പ്ലേഓഫിനായുള്ള കടുത്ത പോരാട്ടം തന്നെ പുറത്തെടുക്കാനാണ് ടീമിന്‍റെ തീരുമാനമെന്നും ക്യാപ്റ്റന്‍ പറയുന്നു.
Twitter-Kerala Blasters FC
ഏത് വെല്ലുവിളിയും ഏറ്റെടുക്കും
മികച്ച ടീമും മികച്ച താരങ്ങളും കേരള ബ്ലാസ്റ്റേഴ്സിന് ഉണ്ടെന്നാണ് കോച്ച് ഇല്‍കോ ഷട്ടോരി അവകാശപ്പെടുന്നത്. എന്നാല്‍ സീസണിന്‍റെ തുടക്കം മുതല്‍ താരങ്ങള്‍ക്ക് പരിക്കേറ്റ് പുറത്ത് പോകേണ്ടി വരുന്നതാണ് ടീമിന് എന്നും തലവേദനയാകുന്നത്. ഇതിനെ മറികടന്ന് മികച്ച റിസള്‍ട്ട് ഉണ്ടാക്കാന്‍ കേരള ബ്ലാസ്റ്റേഴ്സിന് കഴിയുമെന്ന് തന്നെയാണ് കോച്ച് വിശ്വസിക്കുന്നത്. തനിക്ക് മുന്നില്‍ വരുന്ന ഏത് വെല്ലുവിളികളും ഏറ്റെടുക്കാന്‍ താന്‍ തയ്യാറാണെന്നും ഷട്ടോരി കൂട്ടിച്ചേര്‍ത്തു.