കരാർ ദീർഘിപ്പിക്കുന്ന കാര്യത്തിൽ ചർച്ചകൾ നടന്നു
കേരള ബ്ലാസ്റ്റേഴ്സുമായി കരാർ ദീർഘിപ്പിക്കുന്ന കാര്യത്തിൽ എന്തെങ്കിലും ചർച്ചകൾ നടന്നോയെന്ന ചോദ്യം ഫൈനലിന് ശേഷം സംസാരിക്കവെ ഇവാൻ വുകോമനോവിച്ചിന് നേരിടേണ്ടി വന്നു. കരാർ കാര്യത്തിൽ താൻ ക്ലബ്ബുമായി സംസാരിച്ചെന്ന് ഇതിന് മറുപടി നൽകിയ ഇവാൻ, ക്ലബ്ബിൽ തുടരാൻ തനിക്കും, താൻ തുടരാൻ ക്ലബ്ബിനും ആഗ്രഹമുണ്ടെന്നും വ്യക്തമാക്കി. സീസൺ അവസാനിച്ചിരിക്കുന്ന സാഹചര്യത്തിൽ കരാർ കാര്യത്തിൽ ക്ലബ്ബുമായി വിശദമായി സംസാരിക്കാാൻ ഒരുങ്ങുകയാണെന്ന സൂചനകളും ഇതിനൊപ്പം ഇവാൻ പങ്കു വെച്ചു.
Also Read : അവസാനം എവിടെയാണ് പിഴച്ചത്; ബ്ലാസ്റ്റേഴ്സിന്റെ ഫൈനൽ തോൽവിക്ക് പിന്നിലെ കാരണങ്ങൾ...
അടുത്ത ദിവസങ്ങൾ കരാർ ചർച്ചകൾക്കായി ഉപയോഗിക്കും
2021-22 സീസൺ അവസാനിച്ചതിനാൽ ഇനിയുള്ള കുറച്ച് ദിവസങ്ങളും, ആഴ്ചകളും കരാർ വിപുലീകരണ ചർച്ചകൾക്കായി വിനിയോഗിക്കുമെന്നാണ് ഇവാൻ പറയുന്നത്. വികാരങ്ങളെ ആദ്യം തണുപ്പിക്കേണ്ടതുണ്ടെന്നും, സമാധാനത്തോടെ ഇക്കാര്യങ്ങളിൽ തീരുമാനത്തിലെത്തേണ്ടതുണ്ടെന്നും വ്യക്തമാക്കിയ ഇവാൻ, നമ്മൾ വീണ്ടും കാണുമെന്ന് പ്രതീക്ഷിക്കുന്നതായും കൂട്ടിച്ചേർത്തു.
ഇവാൻ കേരള ബ്ലാസ്റ്റേഴ്സിൽ
ഒരൊറ്റ സീസൺ കൊണ്ട് കേരള ബ്ലാസ്റ്റേഴ്സിനെ മാറ്റി മാറിച്ച പരിശീലകനാണ് ഇവാൻ വുകോമനോവിച്ച്. കഴിഞ്ഞ വർഷം ജൂണിൽ ബ്ലാസ്റ്റേഴ്സിന്റെ പരിശീലകനായി നിയമിതനായ അദ്ദേഹം ടീമിനൊപ്പമുള്ള കന്നി സീസണിൽ 23 ഐ എസ് എൽ മത്സരങ്ങളിലാണ് അവരെ നയിച്ചത്. ഇതിൽ പത്തെണ്ണത്തിൽ ടീമിന് വിജയം നേടിക്കൊടുക്കാൻ ഇവാന് കഴിഞ്ഞപ്പോൾ, 8 മത്സരങ്ങൾ സമനിലയിലായി. 5 ഐ എസ് എൽ മത്സരങ്ങളിൽ മാത്രമാണ് വുകോമനോവിച്ചിന്റെ കീഴിൽ ബ്ലാസ്റ്റേഴ്സ് പരാജയം ഏറ്റുവാങ്ങിയത്. കേരള ബ്ലാസ്റ്റേഴ്സിൽ ഇതു വരെയെത്തിയ പരിശീലകരിൽ ആരാധകർക്ക് ഏറ്റവും പ്രിയപ്പെട്ടയാൾ കൂടിയാണ് നാൽപ്പത്തിനാലുകാരനായ ഇവാൻ. അത് കൊണ്ടു തന്നെ ഇവാൻ അടുത്ത സീസണിൽ ഇവിടെയുണ്ടാകണമെന്ന് എല്ലാവരും ഒരേ സ്വരത്തിൽ പറയുന്നു.
ഫൈനൽ പരാജയത്തിന്റെ നിരാശയിൽ നിന്ന് കളികാർക്ക് എങ്ങനെ തിരിച്ചു വരാനാകും?
ഫൈനലിലെ പരാജയം നൽകിയ നിരാശയിൽ നിന്ന് ബ്ലാസ്റ്റേഴ്സ് താരങ്ങൾക്ക് എങ്ങനെ തിരിച്ചു വരാനാകും എന്നതിനെക്കുറിച്ചും ഇവാൻ മനസ് തുറന്നിരുന്നു. ഫൈനൽ തോൽവികൾ കരിയറിന്റെ ഭാഗമാണെന്ന് പറയുന്ന അദ്ദേഹം, ഈ ടീമിലെ കൂടുതൽ പേർക്കും ഇതാദ്യത്തെ ഫൈനലല്ല കഴിഞ്ഞതെന്നും ഓർമ്മിപ്പിച്ചു. തന്റെ കളികാർ കൂടുതൽ ഫൈനലുകളിൽ കളിക്കുമെന്ന് പ്രതീക്ഷിക്കുന്നതായി ചൂണ്ടിക്കാട്ടിയ ഇവാൻ, ഞങ്ങൾ വീണ്ടും കഠിനാധ്വാനം ചെയ്യുമെന്നും, ഈ താരങ്ങൾക്ക് കൂടുതൽ ഫൈനലുകളിൽ കളിക്കാൻ കഴിയുമെന്ന് കരുതുന്നതായും വ്യക്തമാക്കി.
ആരാധകർക്കുള്ള സന്ദേശം
ഫൈനൽ മത്സരം നടന്നത് അങ്ങ് ഗോവയിലായിരുന്നെങ്കിലും ബ്ലാസ്റ്റേഴ്സിന്റെ ആരാധകരാൽ മഞ്ഞക്കടലായിരുന്നു സ്റ്റേഡിയം. ഏറെ ദൂരം താണ്ടി ഫൈനലിൽ ബ്ലാസ്റ്റേഴ്സിനെ പിന്തുണക്കാൻ ഗോവയിലെത്തിയ ആരാധകരോടുള്ള നന്ദിയും ഇന്നലെ സംസാരത്തിനിടെ ഇവാൻ പ്രകടിപ്പിച്ചു. ഫൈനൽ കാണാൻ കേരളത്തിൽ നിന്ന് ഇത്രയധികം ആരാധകർ ഗോവയിലെത്തിയത് ഏറെ സന്തോഷം നൽകുന്നുണ്ടെന്ന് പറഞ്ഞ ഇവാൻ, എല്ലാ ആരാധകരേയും ഞങ്ങൾ ആസ്വദിച്ചെന്നും, അവർക്കെല്ലാവർക്കും വലിയ നന്ദിയുണ്ടെന്നും വ്യക്തമാക്കി.