സമനിലക്കുരുക്കഴിക്കാന്‍ ബ്ലാസ്റ്റേഴ്സ് ഇന്ന് ജംഷഡ്‍പൂരിനെതിരെ

കൊച്ചി: ഇന്ത്യന്‍ സൂപ്പര്‍ ലീഗില്‍ സമനിലക്കുരുക്കില്‍പ്പെട്ട് ഉഴലുന്ന കേരള ബ്ലാസ്റ്റേഴ്സ് ജയം തേടി ഇന്ന് ജംഷഡ്പൂര്‍ എഫ്സിയെ നേരിടും. സീസണിലെ ആദ്യമത്സരത്തില്‍ അമര്‍ തൊമര്‍ കൊല്‍ക്കത്തയ്‍ക്കെതിരെ ജയിച്ചതൊഴിച്ചാല്‍ തുടര്‍ന്നിങ്ങോട്ട് ഒരു മത്സരത്തില്‍ പോലും ജയിക്കാന്‍ കേരള ബ്ലാസ്റ്റേഴ്സിന് കഴിഞ്ഞിട്ടില്ല. ഈ സ്ഥിതി തുടര്‍ന്നാല്‍ ആദ്യനാലിലെത്താതെ ടീം പുറത്തുപോകേണ്ടി വരും.

ബ്ലാസ്റ്റേഴ്സിന്‍റെ സ്വന്തം തട്ടകമായ കൊച്ചി ജവഹര്‍ലാല്‍ നെഹ്റു അന്താരാഷ്ട സ്റ്റേഡിയത്തില്‍ വെച്ചാണ് മത്സരം നടക്കുക. ആരാധക പിന്തുണ ബ്ലാസ്റ്റേവ്സിനുണ്ടെങ്കിലും അത് മുതലാക്കാന്‍ സാധിക്കുന്നില്ല എന്നതാണ് ടീമിനെ വലയ്ക്കുന്ന ഘടകം. സമനിലയില്‍ കുരുങ്ങി നില്‍ക്കുന്ന കേരള ബ്ലാസ്റ്റേഴ്സിന് മുന്നോട്ട് പോകണമെങ്കില്‍ വിജയം അനിവാര്യമാണ്. അതേസമയം ആദ്യനാലിലെത്താന്‍ ജംഷഡ്പൂരിനും ജയിച്ചേ തീരൂ. നിലവില്‍ എട്ട് പോയിന്‍റുമായി ബ്ലാസ്റ്റേഴ്സ് ഏഴാം സ്ഥാനത്തും 15 പോയിന്‍റുമായി ജംഷഡ്പൂര്‍ അഞ്ചാം സ്ഥാനത്തുമാണുള്ളത്. വൈകീട്ട് 7.30ന് മത്സരം ആരംഭിക്കും.