തുടര്‍ജയം തേടി ബ്ലാസ്റ്റേഴ്സ് വീണ്ടുമിറങ്ങുന്നു; എതിരാളികള്‍ ജംഷഡ്പൂര്‍
ലീഗ് റൗണ്ടില്‍ ഇനി അവശേഷിക്കുന്ന ആറ് മത്സരങ്ങള്‍ ഫൈനല്‍ മത്സരങ്ങള്‍ പോലെ ബ്ലാസ്റ്റേഴ്സിന് കളിക്കേണ്ടി വരുമെന്ന് കോച്ച് ഇൽകോ ഷട്ടോരി നേരത്തേ തന്നെ വ്യക്തമാക്കിയിട്ടുണ്ട്.
Samayam Malayalam 18 Jan 2020, 3:34 pm
സീസണില്‍ ആദ്യ പകുതിക്ക് ശേഷം പുത്തനുണര്‍വ്വ് കൈവരിച്ച കേരള ബ്ലാസ്റ്റേഴ്സ് എഫ്സി കഴിഞ്ഞ രണ്ട് മത്സരങ്ങളില്‍ തുടര്‍ച്ചയായി ജയം കണ്ടെത്തി. ആദ്യനാലിലേക്കുള്ള മുന്നേറ്റത്തിന്‍റെ ഭാഗമായി തുടര്‍ജയം തേടി ഞായറാഴ്ച വീണ്ടുമിറങ്ങുകയാണ് ബ്ലാസ്റ്റേഴ്സ്. പട്ടികയില്‍ ബ്ലാസ്റ്റേഴ്സിന് തൊട്ട് താഴെ നില്‍ക്കുന്ന ജംഷഡ്പൂര്‍ എഫ്സിയാണ് എതിരാളികള്‍.
ആദ്യനാലില്‍ ഇടംപിടിക്കണമെങ്കില്‍ ഇനിയുള്ള മത്സരങ്ങളിലെല്ലാം മികച്ച പ്രകടനം നടത്തുകയും ജയിക്കുകയും വേണം കേരള ബ്ലാസ്റ്റേഴ്സിന്. നിലവില്‍ 12 മത്സരങ്ങള്‍ പൂര്‍ത്തിയാക്കിയ ബ്ലാസ്റ്റേഴ്സ് 14 പോയിന്‍റുമായാണ് പട്ടികയില്‍ ഏഴാം സ്ഥാനത്ത് നില്‍ക്കുന്നത്. ലീഗ് റൗണ്ടില്‍ ഇനി ആറ് മത്സരങ്ങള്‍ കൂടിയാണ് ബ്ലാസ്റ്റേഴ്സിന് അവശേഷിക്കുന്നത്. ഇവയെല്ലാം ഫൈനല്‍ മത്സരങ്ങള്‍ പോലെ ബ്ലാസ്റ്റേഴ്സിന് കളിക്കേണ്ടി വരുമെന്ന് കോച്ച് നേരത്തേ തന്നെ വ്യക്തമാക്കിയിട്ടുണ്ട്.
Also Read: ധോണി രണ്ടും കല്‍പ്പിച്ചോ? ബിസിസിഐയുടെ പുറത്താക്കല്‍ വകവെയ്ക്കാതെ പരിശീലനം
അതേസമയം ജംഷഡ്പൂര്‍ എഫ്സി നിലവില്‍ കേരള ബ്ലാസ്റ്റേഴ്സിന് താഴെയാണ് ഉള്ളത്. 11 മത്സരങ്ങളില്‍ നിന്ന് 13 പോയിന്‍റ് സ്വന്തമാക്കിയിട്ടുണ്ട്. ജംഷഡ്പൂരിനും ആദ്യനാലിലെത്താന്‍ വലിയ പരിശ്രമം തന്നെ നടത്തേണ്ടി വരും. അതേസമയം ഞായറാഴ്ച ജയിക്കാനായാല്‍ കേരള ബ്ലാസ്റ്റേഴ്സിനെ മറികടന്ന് മുന്നേറാന്‍ ജംഷഡ്പൂരിന് സാധിക്കും. ജംഷഡ്പൂരിന്‍റെ തട്ടകമായ ജെആര്‍ഡി ടാറ്റ സ്പോര്‍ട്സ് കോംപ്ലക്സിലാണ് മത്സരം നടക്കുക.