ഗോള് പൂരത്തിനൊടുവില് കേരള ബ്ലാസ്റ്റേ്ഴ്സിനെ വീഴ്ത്തി ചെന്നൈയിന് എഫ്സി . കൊച്ചി ജവഹര്ലാല് നെഹ്റു സ്റ്റേഡിയത്തിലെ ആവേശപ്പോരാട്ടത്തില് ബ്ലാസ്റ്റേഴ്സ് മൂന്നു ഗോളുകള് സ്വന്തമാക്കിയെങ്കിലും ഇരട്ടി ഗോളുകള് തിരിച്ചടിച്ച് ചെന്നൈയിന് ജൈത്രയാത്ര തുടര്ന്നു. സീസണില് സന്ദര്ശകരുടെ തുടര്ച്ചയായ നാലാം ജയമാണ് കൊച്ചിയിലേത്
ഐഎസ്എല് ആറാം സീസണിലെ ആദ്യ ഹാട്രിക് നേടിയ നായകന് ഒഗ്ബച്ചെയാണ് ബ്ലാസ്റ്റേഴ്സിനായി മൂന്നു ഗോളുകളും സ്വന്തമാക്കിയത്. ചെന്നൈക്കായി റാഫേല് ക്രിവല്ലെറോ, ലാലിയന്സുല ചാങ്തെ, നെറിജസ് വാല്സ്കിസ് എന്നിവര് ഇരട്ട ഗോളുകള് നേടി. ഫെബ്രുവരി ഏഴിന് നോര്ത്ത് ഈസ്റ്റിനെതിരെ ഗുവാഹത്തിയിലാണ് ബ്ലാസ്റ്റേഴ്സിന്റെ അടുത്ത മത്സരം.
Also Read: കളി തോറ്റാലെന്താ.. ഒഗ്ബെചെ ആരാധകര്ക്ക് നല്കിയത് മറക്കാനാകാത്ത സമ്മാനം!!
ബ്ലാസ്റ്റേഴ്സിന്റെ മുന്നേറ്റത്തോടെയാണ് കൊച്ചിയില് കളിയുണര്ന്നത്. മൂന്നാം മിനിറ്റില് സെര്ജിയോ സിഡോഞ്ചയെ അനിരുദ്ധ് ഥാപ്പ വീഴ്ത്തിയതിന് ബ്ലാസ്റ്റേഴ്സിന് ഫ്രീകിക്ക് ലഭിച്ചു. ചെന്നൈയിന് ബോക്സില് അപകടമുയര്ത്തിയ നീക്കമായിരുന്നു അത്. ആറാം മിനിറ്റില് ബര്തലോമിയോ ഒഗ്ബെച്ചെ നല്കിയ പന്തുമായി ഇടതുമൂലയിലൂടെ മുന്നേറിയ ജെസെല് കര്ണെയ്റോ ചെന്നൈയിന് ഗോള് കീപ്പര് വിശാല് കെയ്ത്തിനെ പരീക്ഷിച്ചു. പിന്നാലെ മെസി ബൗളിയുടെ കരുത്തുറ്റ അടി ചെന്നൈയിന് പ്രതിരോധതാരം എല് സറാബിയ തടഞ്ഞു.
പതിനൊന്നാം മിനിറ്റിലായിരുന്നു ബ്ലാസ്റ്റേഴ്സിന്റെ മറ്റൊരു മനോഹര നീക്കം. ഒഗ്ബെച്ചെ തുടങ്ങി. ബോക്സിന് തൊട്ടുമുന്നില്വച്ച് ജിയാന്നി സുയ് വര്ലൂണ് അടിതൊടുത്തു. നേരിയ വ്യത്യാസത്തിലാണ് പുറത്തുപോയത്. 27ാം മിനിറ്റില് വീണ്ടും ബ്ലാസ്റ്റേഴ്സ് ചെന്നൈയിന് ഗോള്മുഖത്ത് കടുത്ത ആക്രമണം നടത്തി. സെയ്ത്യാസെന് സിങ്ങിന്റെ ക്രോസ് ബോക്സിലേക്ക്. മെസി ബൗളി പന്തുമായി മുന്നേറാന് ശ്രമിക്കുന്നതിനിടെ ജെറി ലാല്റിന്സുവാല തടഞ്ഞു. മെസി ബൗളി പെനല്റ്റിക്ക് വാദിച്ചെങ്കിലും റഫറി വഴങ്ങിയില്ല.
39ാം മിനിറ്റില് ചെന്നൈയിന് മുന്നിലെത്തി. കളിഗതിക്കെതിരെയായിരുന്നു ഈ ഗോള്. ഫ്രീകിക്കില്നിന്ന് തുടക്കം. ഗോള് കീപ്പര് ടി.പി രഹ്നേഷ് പന്ത് തട്ടിയിട്ടത് ക്രിവെല്ലെറോയുടെ കാലുകളിലേക്കായി. ബ്രസീലുകാരന് എളുപ്പത്തില് ലക്ഷ്യം കണ്ടു.അഞ്ച് മിനിറ്റില് നെറിജുസിലൂടെ ചെന്നൈയിന് രണ്ടാംഗോളും നേടി. ആദ്യപകുതി തീരാന് നിമിഷങ്ങള് ശേഷിക്കെ ക്രിവെല്ലറോയുടെ രണ്ടാം ഗോളിലൂടെ ചെന്നൈയിന് ലീഡുയര്ത്തി.
Also Read: ലീഗില് ഒന്നാമതായിട്ടും ഗോവ കോച്ചിനെ പുറത്താക്കിയതെന്തിന്? കാരണങ്ങളിതാണ്!!
ബ്ലാസ്റ്റേഴ്സിന്റെ ഗോളോടെയാണ് രണ്ടാം പകുതി തുടങ്ങിയത്. 48ാം മിനുറ്റില് നായകന് ഒഗ്ബച്ചെയുടെ ഗോളിലൂടെ ബ്ലാസ്റ്റേഴ്സ് ചെന്നൈയിന്റെ ലീഡ് കുറച്ചു. ബോക്സിലേക്ക് ജെസെല് നല്കിയ ക്രോസ് ഇടത് ഭാഗത്ത് മാര്ക്ക് ചെയ്യപ്പെടാതെ നിന്നിരുന്ന ഒഗ്ബച്ചെ വലയിലാക്കുകയായിരുന്നു. അമ്പതാം മിനുറ്റില് ഒഗ്ബച്ചെയുടെ മറ്റൊരു ഷോട്ട് കെയ്ത്ത് അനായാസം കയ്യിലാക്കി. ഒപ്പമെത്താന് ബ്ലാസ്റ്റേഴ്സ് ശ്രമിക്കുന്നതിനിടെ ചെന്നൈയിന് വീണ്ടും വല കുലുക്കി.
വാല്സ്കിസിന്റെ അസിസ്റ്റില് ലാലിയന്സുവാല ചാങ്ക്തെയായിരുന്നു സ്കോറര്. ബ്ലാസ്റ്റേഴ്സും ശ്രമം തുടര്ന്നു. 62ാം മിനുറ്റില് ഒഗ്ബച്ചെയുടെ ബൈസിക്കിള് കിക്ക് ക്രോസ് ബാറില് തട്ടി പുറത്തായി. റാക്കിപ്പിന് പകരം സഹല് അബ്ദുസമദ് കളത്തിലെത്തി. 65ാം മിനുറ്റില് രണ്ടാമതും ചെന്നൈ വല കുലുങ്ങി. മൈതാന മധ്യത്തില് നിന്ന് നായകനെ ലക്ഷ്യമാക്കി സിഡോഞ്ചയുടെ പാസ്. ബോക്സിന് പുറത്ത് നിന്ന് പന്ത് സ്വീകരിച്ച ഒഗ്ബച്ചെ ചെന്നൈ പ്രതിരോധ തീര്ക്കും മുമ്പേ വലങ്കാല് ഷോട്ട് വലയിലാക്കി.
11 മിനുറ്റിന്റെ ഇടവേളയില് ഒഗ്ബച്ചെ സീസണിലെ ആദ്യ ഹാട്രിക് നേട്ടം സ്വന്തമാക്കി. ഇടത് പാര്ശ്വത്തില് നിന്നുള്ള നര്സാരിയുടെ ക്രോസ് ബോക്സിലേക്ക്. ഒഗ്ബച്ചെയും മെസി ബൗളിയും വാനിലുയര്ന്നു. ഒഗ്ബച്ചെയുടെ ഹെഡര് ലക്ഷ്യം കണ്ടു. ഗാലറി ഇളകിയാടി. ചെന്നൈയിന്റെ ലീഡ് ഒന്നായി കുറഞ്ഞു. അധികം വൈകാതെ എണ്പതാം മിനുറ്റില് ചാങ്തെയിലൂടെ ചെന്നൈ രണ്ടു ഗോള് ലീഡ് വീണ്ടെടുക്കുകയും ചെയ്തു. അവസാന മിനുറ്റിലെ ഗോളിലൂടെ വാല്സ്കിസ് ചെന്നെയിന് പട്ടിക പൂര്ത്തിയാക്കി.