കേരള ബ്ലാസ്റ്റേഴ്സില്‍ വന്‍ അഴിമതി?
ഐഎസ്എല്ലിന്‍റെ ആറാമത് സീസണ്‍ അതിന്‍റെ അവസാന ഘട്ടത്തിലേക്ക് കടക്കാനിരിക്കെ വലിയ നാണക്കേടാണ് പുതിയ വാര്‍ത്തകള്‍ ഉണ്ടാക്കിയിരിക്കുന്നത്. കേരള ബ്ലാസ്റ്റേഴ്സില്‍ പുതിയ താരങ്ങളെ സൈന്‍ ചെയ്യുന്നതിനായി വന്‍ തോതില്‍ കോഴ വാങ്ങുന്നതായാണ് ആരോപണം. ആരാധകര്‍ ഇത് അന്വേഷിക്കണമെന്നാണ് ആവശ്യപ്പെട്ടിരിക്കുന്നത്.
ആരോപണം മൈക്കിള്‍ ചോപ്രയുടേത്
കേരള ബ്ലാസ്റ്റേഴ്സിന്‍റെ മുന്‍ വിദേശ താരം മൈക്കിള്‍ ചോപ്രയാണ് ക്ലബ്ബിനെതിരെ ഗൗരവ സ്വഭാവത്തിലുള്ള ആരോപണവുമായി രംഗത്തെത്തിയിരിക്കുന്നത്. തന്‍റെ ട്വിറ്റര്‍ അക്കൊണ്ടിലൂടെയാണ് താരം ഇക്കാര്യം ആരോപിക്കുന്നത്. ആരാധകര്‍ ഇത് ചോദ്യം ചെയ്യണമെന്നും മൈക്കിള്‍ ചോപ്ര ട്വീറ്റില്‍ ആവശ്യപ്പെടുന്നു.
ഇഷ്ഫാക് അഹമ്മദ് ആരോപണ നിഴലില്‍
കേരള ബ്ലാസ്റ്റേഴ്സിന്‍റെ സഹപരിശീലകന്‍ ഇഷ്ഫാക് അഹമ്മദിനെതിരെയാണ് മൈക്കിള്‍ ചോപ്ര ഗുരുതര ആരോപണം ഉന്നയിച്ചിരിക്കുന്നത്. ട്വീറ്റില്‍ ഇഷ്ഫാക്കിനെ കൂടി ടാഗ് ചെയ്തു കൊണ്ടാണ് ചോപ്ര ഇക്കാര്യം ഉന്നയിക്കുന്നത്. പുതിയ താരങ്ങളെ സൈന്‍ ചെയ്യിപ്പിക്കുമ്പോള്‍ ഏജന്‍റുമാരില്‍ നിന്ന് ഇഷ്ഫാക്ക് കൈക്കൂലി വാങ്ങുന്നുണ്ട് എന്നതാണ് ആരോപണം. ഇഷ്ഫാക് ഇതിന് മറുപടി നല്‍കണമെന്നും ചോപ്ര ആവശ്യപ്പെടുന്നു.
Twitter-Michael Chopra
പ്രതികരിക്കാതെ ഇഷ്ഫാക്
ഞായറാഴ്ച വൈകീട്ട് 5 മണിയോടെയാണ് ചോപ്രയുടേതായി ഒരു ട്വീറ്റ് പ്രത്യക്ഷപ്പെട്ടത്. കേരള ബ്ലാസ്റ്റേഴ്സിനാകെ കളങ്കമുണ്ടാക്കുന്ന ട്വീറ്റ് പുറത്ത് വന്ന് മണിക്കൂറുകള്‍ പിന്നിട്ടിട്ടും ഇതിന് മറുപടി നല്‍കാനോ വിഷയത്തില്‍ പ്രതികാരിക്കാനോ ഇഷ്ഫാക് അഹമ്മദ് തയ്യാറായിട്ടില്ല. ആരോപണത്തില്‍ കഴമ്പുണ്ടോ എന്നറിയാന്‍ ഇഷ്ഫാക്കിന്‍റെ മറുപടിക്കായി കാത്തിരിക്കുകയാണ് ബ്ലാസ്റ്റേഴ്സ് ആരാധകര്‍.
Twitter-RazrTyzn
ഇഷ്ഫാക്കിന് പിന്തുണയുമായി ആരാധകര്‍
അതേസമയം സംഭവത്തില്‍ കേരള ബ്ലാസ്റ്റേഴ്സ് സഹപരിശീലകന്‍ ഇഷ്ഫാക് അഹമ്മദിന് പിന്തുണയുമായാണ് ആരാധകര്‍ രംഗത്തെത്തിയിരിക്കുന്നത്. ചോപ്ര പറഞ്ഞതിനെ ബഹുമാനിക്കുന്നു എങ്കില്‍ പോലും ഈ ആരോപണം സാധൂകരിക്കുന്ന എന്ത് തെളിവാണ് താങ്കലുടെ കയ്യില്‍ ഉള്ളതെന്നാണ് ആരാധകരുടെ ചോദ്യം. ആരോപണങ്ങള്‍ ഉന്നയിക്കുമ്പോള്‍ അതിന് കൃത്യമായ തെളിവ് നിരത്താനും താങ്കള്‍ ബാധ്യസ്ഥനാണ് എന്നാണ് ചോപ്രയോട് ആരാധകര്‍ പറയുന്നത്.