ഡൽഹി ‍ഡൈനമോസിനെതിരെ ബ്ലാസ്റ്റേഴ്‌സ് ഒരു ഗോളിന് മുന്നിൽ

കൊച്ചി: ഐഎസ്എല്‍ അഞ്ചാം സീസണിലെ രണ്ടാം ജയം തേടി കേരളാ ബ്ലാസ്റ്റേഴ്സിന് മികച്ച മുന്നേറ്റം. ആദ്യ പകുതി പിന്നിടുമ്പോൾ സി.കെ.വിനീതിലൂടെ ഗോൾ നേടിയ ബ്ലാസ്റ്റേഴ്‌സ് മുന്നിട്ട് നിൽക്കുകയാണ്.കൊച്ചി ജവഹര്‍ലാല്‍ അന്താരാഷ്ട്ര സ്റ്റേഡിയത്തിലാണ് കളി നടക്കുന്നത്. സ്വന്തം തട്ടകത്തില്‍ മഞ്ഞപ്പടയുടെ പിന്തുണ കൂടി ചേരുമ്പോള്‍ ഡല്‍ഹിക്കെതിരെ ജയം എളുപ്പത്തില്‍ സ്വന്തമാക്കാനാകുമെന്ന പ്രതീക്ഷയിലാണ് ബ്ലാസ്റ്റേഴ്സ്. ഗോൾ കീപ്പറായിരുന്ന ധീരജ് സിങ്ങിനെ പ്ളേയിങ് ഇലവനിൽ നിന്ന് മാറ്റി. നവീൻ കുമാറാണ് ധീരജിന് പകരം ഇന്ന് കേരളത്തിന്റെ ഗോൾ വല കാക്കുന്നത്.

കഴിഞ്ഞ മത്സരങ്ങളിൽ മികച്ച പ്രകടനം കാഴ്‌ച വെച്ച മതേജ് പോപ്ലാറ്റ്നിച്ചിനെയും പ്ളേയിങ് ഇലവനിൽ പരിശീലകൻ ഉൾപ്പെടുത്തിയിട്ടില്ല.പരിശീലകൻ ഡേവിഡ് ജെയിംസിന്‍റെ പരീക്ഷണം വിജയിക്കുമോ എന്ന് അറിയാൻ നിമിഷങ്ങൾ മാത്രമാണ് ബാക്കി. കഴിഞ്ഞ രണ്ട് മത്സരങ്ങളില്‍ ഒരു ജയവും ഒരു സമനിലയുമാണ് ബ്ലാസ്റ്റേഴ്സിന്‍റെ സമ്പാദ്യം. അതേസമയം ഡല്‍ഹിക്ക് കഴിഞ്ഞ രണ്ട് മത്സരങ്ങളും ജയിക്കാനായിട്ടില്ല.

ഒരു കളിയില്‍ പരാജയപ്പെടുകയും രണ്ടാമത്തേത് സമനിലയില്‍ പിരിയുകയും ചെയ്തു. ഈ കണക്കുകള്‍ ബ്ലാസ്റ്റേഴ്സിന് മുന്‍തൂക്കവും അത്മവിശ്വാസവും നല്‍കുന്നുണ്ട്.മികച്ച ഫോമിലുള്ള ബ്ലാസ്റ്റേഴ്സിന്‍റെ മുന്നേറ്റ നിര തന്നെയാണ് ടീമിന്‍റെ കരുത്ത്. ഇതുവരെയുള്ള മത്സരങ്ങളില്‍ വിദേശ താരങ്ങളായ പോപ്ലാറ്റ്നിച്ചും സ്റ്റൊവനോവിച്ചും മികച്ച പ്രകടനം തന്നെയാണ് പുറത്തെടുത്തത്. എന്നാൽ ഈ മത്സരത്തിൽ മതേജ് പോപ്ലാറ്റ്നിച്ച് കളിക്കുന്നില്ല എന്നത് ദുഖകരമാണ്.