വരവറിയിച്ച് ബ്ലാസ്റ്റേഴ്സ്; രണ്ട് ഗോളിന്‍റെ ഉശിരൻ ജയം

കൊല്‍ക്കത്ത: ഇന്ത്യന്‍ സൂപ്പര്‍ ലീഗിന്‍റെ അഞ്ചാം പതിപ്പില്‍ വരവറിയിച്ച് കേരള ബ്ലാസ്റ്റേഴ്സ്. കൊല്‍ക്കത്തയില്‍ നടന്ന ഉദ്ഘാടന മത്സരത്തില്‍ അമര്‍ തൊമര്‍ കൊല്‍ക്കത്തയ്‍ക്കെതിരെ കേരള ബ്ലാസ്റ്റേഴ്സിന് രണ്ട് ഗോളിന്‍റെ ഉശിരൻ ജയം. എതിരില്ലാത്ത രണ്ടു ഗോളുകള്‍ക്കായിരുന്നു വിജയം. മികച്ച അറ്റാക്കിംഗ് ഫുട്ബോള്‍ കാഴ്ചവെച്ച ബ്ലാസ്റ്റേഴ്സിന് ആദ്യപകുതിയിൽ തന്നെ നിരവധി അവസരങ്ങള്‍ വീണുകിട്ടി. ആദ്യ പകുതി അവസാനിച്ചപ്പോള്‍ മത്സരം ഗോള്‍രഹിത സമനിലയിലായിരുന്നു.

ഗോള്‍രഹിതമായിരുന്ന ആദ്യ പകുതിക്ക് ശേഷം പെകൂസൻ ഗ്രൗണ്ടിൽ എത്തിയതോടെ കളിയുടെ ഗതി മാറി. 77-ാം മിനിറ്റിൽ മറ്റെഹ് പൊപ്ലാനിക് ആദ്യ ഗോള്‍ നേടി. 86-ാം മിനിറ്റില്‍ സ്റ്റഹോനാവിച് രണ്ടാമത്തെ ഗോള്‍ വലയിലാക്കി. കേരള ബ്ലാസ്റ്റേഴ്സ് കൊല്‍ക്കത്തയിൽ നേടുന്ന ആദ്യ ജയവുമാണിത്.

ആദ്യ പകുതിയില്‍ മറ്റെഹ് പൊപ്ലാനിയുടെ കൊള്ളിയാൻ കണക്കുള്ള മുന്നേറ്റങ്ങള്‍ ഏറെ മികച്ചുനിന്നു. ലാകിച് പെസിച്, സഹല്‍ അബ്ദുല്‍ സമദ്, നികോള എന്നിവരും ഏറെ കളിമികവ് കാട്ടി. ബ്ലാസ്റ്റേഴ്സിന്‍റെ ഏറ്റവും മികച്ച മലയാളി താരം സി.കെ വിനീതില്ലാതെയാണ് ആദ്യ ഇലവൻ കോച്ച് ഡേവിഡ് ജെയിംസ് ഇറക്കിയത്.
ഐഎസ്എല്‍ ചരിത്രത്തില്‍ ഇതിവരെ ആരോഗ്യകരമായ പോരാട്ടമാണ് കൊല്‍ക്കത്തയും ബ്ലാസ്റ്റേഴ്സും തമ്മില്‍ നടന്നിട്ടുള്ളത്. എന്നാല്‍ കണക്കുകള്‍ പരിശോധിച്ചാല്‍ കൊല്‍ക്കത്തയ്ക്കാണ് മുന്‍തൂക്കം. ഇതുവരെ കളിച്ച മത്സരങ്ങളില്‍ ഒരു തവണ മാത്രമേ ബ്ലാസ്റ്റേഴ്സിന് ജയിക്കാന്‍ കഴിഞ്ഞിട്ടുള്ളൂ. കൂടുതല്‍ മത്സരങ്ങളില്‍ ജയം കൊല്‍ക്കത്തയ്ക്കൊപ്പമായിരുന്നു.

എന്നാല്‍ ഇത്തവണ രണ്ടും കല്‍പ്പിച്ച് തന്നെയാണ് ടീം കേരള ബ്ലാസ്റ്റേഴ്സ് കളത്തിലിറങ്ങുന്നത്. ബ്ലാസ്റ്റേഴ്സ് പ്രതിരോധത്തിലെ ഉരുക്കുകോട്ടയായ സന്ദേശ് ജിങ്കാന്‍റെ നായകത്വത്തിലിറങ്ങുന്ന ടീം ഏറെ കെട്ടുറപ്പുള്ളതാണ്. തഴക്കവും പഴക്കവും ചെന്ന താരങ്ങള്‍ക്ക് പകരം എന്തിനും പോന്ന യുവനിരയാണ് ഇത്തവണ ബ്ലാസ്റ്റേഴ്സിന്‍റെ സവിശേഷത. പരിശീലകനായ ഡേവിഡ് ജെയിംസിന് സൂപ്പര്‍ ലീഗ് മൈതാനത്തിനകത്തും പുറത്തുമുള്ള അനുഭവസമ്പത്തും കേരളത്തിന് ഗുണം ചെയ്യും. കൊല്‍ക്കത്ത സാള്‍ട്ട് ലേക്ക് സ്റ്റേഡിയത്തിലാണ് മത്സരം നടക്കുക.