വല കാക്കാന്‍ രണ്ട് പേര്‍
ഗോള്‍കീപ്പിങ്ങിലെയും പ്രതിരോധത്തിലെയും പിഴവുകളാണ് സീസണില്‍ കേരള ബ്ലാസ്റ്റേഴ്സിന് വലിയ തിരിച്ചടി സമ്മാനിച്ചത്. ഈ രണ്ട് മേഖലയിലും തന്നെയാണ് ഏറ്റവും ആദ്യം പരിഹാരം കാണാന്‍ ബ്ലാസ്റ്റേഴ്സ് ശ്രമിക്കുന്നതും. ഇതിന്‍റെ ഭാഗമായി രണ്ട് പുതിയ ഗോൾ കീപ്പർമാരെയാണ് കേരള ബ്ലാസ്റ്റേഴ്സ് സൈൻ ചെയ്യുന്നത്. ബെംഗളൂരു എഫ്സിയില്‍ നിന്നും പ്രബ്ഷുകൻ ഗില്ലും ഒഡിഷ എഫ്സിയില്‍ നിന്നും ആല്‍ബിനോ ഗോമസുമാണ് ഉടന്‍ ബ്ലാസ്റ്റേഴ്സിനൊപ്പം ചേരുക എന്നാണ് റിപ്പോര്‍ട്ട്. എന്നാല്‍ ഇക്കാര്യങ്ങള്‍ സംബന്ധിച്ച് കേരള ബ്ലാസ്റ്റേഴ്സ് മാനേജ്മെന്‍റ് ഇതുവരെ ഔദ്യോഗിക പ്രഖ്യാപനം ഒന്നും തന്നെ നടത്തിയിട്ടില്ല.
Twitter-Sevens Football
രഹ്നേഷിനെ നിലനിര്‍ത്തില്ല
സീസണിന്‍റെ തുടക്കത്തില്‍ വലിയ പ്രതീക്ഷയോടെ ബ്ലാസ്റ്റേഴ്സിലേക്ക് എത്തിയ മലയാളി ഗോള്‍കീപ്പറാണ് ടിപി രഹ്നേഷ്. എന്നാല്‍ പ്രതീക്ഷയ്ക്ക് ഒത്ത് ഉയരാന്‍ ടിപി രഹ്നേഷിന് സാധിച്ചില്ല. മത്സരങ്ങളില്‍ വലിയ പിഴവുകള്‍ വരുത്തി ടീമിന് തോല്‍വി സമ്മാനിക്കുന്ന നിലയിലേക്കും രഹ്നേഷിന്‍റെ പ്രകടനങ്ങള്‍ മാറി. മോശം ഗോള്‍കീപ്പിങ് തന്നെയായിരുന്നു ഇക്കുറി ബ്ലാസ്റ്റേഴ്സിന് ഏറ്റവും കൂടുതല്‍ തലവേദനയായത്. ഇതിന് പിന്നാലെയാണ് താരത്തെ നിലനിര്‍ത്തേണ്ടെന്ന തീരുമാനത്തിലേക്ക് ബ്ലാസ്റ്റേഴ്സ് എത്തിയത്.
Twitter-Kerala Blasters FC
പ്രതിരോധത്തില്‍ തിരി
ഇതിനൊപ്പം തന്നെ കേരള ബ്ലാസ്റ്റേഴ്സിന് വലിയ തലവേദന സൃഷ്ടിച്ച മറ്റൊരു മേഖലയാണ് പ്രതിരോധം. സന്ദേശ് ജിങ്കാന്‍റെ അഭാവം തന്നെയാണ് ടീമിനെ പ്രതിസന്ധിയിലാക്കിയത്. പിന്നാലെ പല പരീക്ഷണങ്ങള്‍ പ്രതിരോധത്തില്‍ നടത്തി നോക്കിയെങ്കിലും ഒന്നും ഫലം കണ്ടില്ല. ഈ സാഹചര്യത്തിലാണ് ലീഗിലെ ഏറ്റവും മികച്ച സെന്‍റര്‍ ബാക്കുകളില്‍ ഒരാളായ തിരിയെ ബ്ലാസ്റ്റേഴ്സ് സ്വന്തമാക്കുന്നത്. ജംഷഡ്പൂര്‍ എഫ്സിയില്‍ നിന്നാണ് താരം ബ്ലാസ്റ്റേഴ്സില്‍ എത്തുന്നത്. നേരത്തേ അത്ലറ്റികോ മാഡ്രിഡ് ബി ടീമിന് വേണ്ടി കളിച്ചിട്ടുള്ള താരമാണ് തിരി.
Twitter-Sevens Football
മുന്നേറ്റത്തില്‍ പുതിയ മുഖം
ഇതിനൊപ്പം തന്നെ ഇന്ത്യന്‍ യുവതാരങ്ങളിൽ ഏറെ പ്രതീക്ഷ നൽകുന്ന മുന്നേറ്റ നിര താരം വിക്രം പ്രതാപ് സിംഗിനെയും ബ്ലാസ്റ്റേഴ്സ് ഒപ്പം ചേര്‍ക്കുകയാണ്. താരവുമായി കേരള ബ്ലാസ്റ്റേഴ്സ് കരാർ ഒപ്പുവെച്ചതായാണ് റിപ്പോര്‍ട്ട്. നാല് വര്‍ഷത്തേക്കാണ് താരത്തെ ബ്ലസ്റ്റേഴ്സ് സ്വന്തമാക്കിയിരിക്കുന്നത്. ഈ സീസൺ അവസാനിക്കുന്നതോടെ സൈനിംഗ് കേരള ബ്ലാസ്റ്റേഴ്സ് ഔദ്യോഗികമായി പ്രഖ്യാപിക്കുമെന്നാണ് സൂചന.
Twitter-Yazaryzr18
ഒടുവില്‍ പുയേറ്റയും
ഇതിനെല്ലാമൊടുവിലാണ് നോര്‍ത്ത് ഈസ്റ്റ് യുണൈറ്റഡ് മധ്യനിരയിലെ മിന്നും താരം ലാല്‍തംഗ കാല്‍റിങ്ങി(പുയേറ്റ)നെ കേരള ബ്ലാസ്റ്റേഴ്സ് റാഞ്ചുന്നത്. താരത്തെ കൊച്ചിയിലെത്തിക്കാനുള്ള നടപടിക്രമങ്ങളെല്ലാം ക്ലബ്ബ് പൂര്‍ത്തിയാക്കിയതായാണ് റിപ്പോര്‍ട്ട്. 2018-19 സീസണില്‍ ഐഎസ്എല്ലില്‍ അരങ്ങേറ്റം കുറിച്ച പുയേറ്റ മിന്നുന്ന പ്രകടനമാണ് നോര്‍ത്ത് ഈസ്റ്റിന് വേണ്ടി പുറത്തെടുത്തത്. എന്നാല്‍ പരിക്കിനെ തുടര്‍ന്ന് ഈ സീസണില്‍ താരത്തിന്‍ കൂടുതല്‍ അവസരങ്ങള്‍ ലഭിച്ചില്ല. ഇതിന് പിന്നാലെയാണ് താരത്തെ സ്വന്തം പാളയത്തിലെത്തിക്കാന്‍ ബ്ലാസ്റ്റേഴ്സ് തീരുമാനിച്ചത്.