ISL 2018: ജംഷഡ്പൂരില്‍ ബ്ലാസ്റ്റേഴ്സിന് തിരിച്ചടി; രണ്ട് ഗോളിന് പിന്നില്‍

ജംഷഡ്‍പൂര്‍: ഇന്ത്യന്‍ സൂപ്പര്‍ ലീഗ് അഞ്ചാം സീസണില്‍ രണ്ടാം ജയം തേടിയിറങ്ങിയ കേരള ബ്ലാസ്റ്റേഴ്സിന് തിരിച്ചടി. ആദ്യപകുതി പിന്നിടുമ്പോള്‍ ജംഷഡ്പൂര്‍ എഫ്സിക്കെതിരെ എതിരില്ലാത്ത രണ്ട് ഗോളുകള്‍ക്ക് ബ്ലാസ്റ്റേഴ്സ് പിന്നിട്ടുനില്‍ക്കുകയാണ്. മത്സരം ആരംഭിച്ച് മൂന്നാം മിനുട്ടില്‍ തന്നെ ജംഷഡ്‍പൂര്‍ ലക്ഷ്യം കണ്ടു.

ഓസ്ട്രേലിയന്‍ താരം ടിം കാഹിലാണ് ജംഷഡ്‍പൂരിനായി ആദ്യഗോള്‍ കണ്ടെത്തിയത്. രണ്ടാം ഗോള്‍ തമിഴ്നാട് സ്വദേശിയായ മൈക്കല്‍ സൂസെ രാജിന്‍റെ വകയായിരുന്നു. ബോക്സിന്‍റെ വലതുഭാഗത്തുനിന്നും സമയം ഒട്ടും പാഴാക്കാതെയെടുത്ത ഒരു വലംകാലന്‍ ഷോട്ട് പോസ്റ്റിന്‍റെ ഇടതുമൂലയിലൂടെ വലയിലെത്തുകയായിരുന്നു.

നിലവില്‍ മൂന്ന് മത്സരങ്ങളില്‍ ഒരു ജയവും രണ്ട് സമനിലകളുമായി 5 പോയിന്‍റോടെ ഏഴാം സ്ഥാനത്താണ് ബ്ലാസ്റ്റേഴ്സിന്‍റെ സ്ഥാനം. അതേസമയം നാല് മത്സരങ്ങളില്‍ ഒരു വിജയവും മൂന്ന് സമനിലകളുമായി ആറ് പോയിന്‍റോടെ ആറാം സ്ഥാനത്താണ് ജംഷഡ്പൂര്‍. ജംഷഡ്‍പൂര്‍ എഫ്സിയുടെ ഹോം ഗ്രൗണ്ടായ ജെആര്‍ഡി ടാറ്റാ സ്പോര്‍ട്സ് കോംപ്ലക്സിലാണ് മത്സരം നടക്കുന്നത്.