ബ്ലാസ്റ്റേഴ്സിന് തിരിച്ചടിയായത്
കേരള ബ്ലാസ്റ്റേഴ്സ് മത്സരത്തിൽ നന്നായി കളിച്ചെന്നും ഭൂരിഭാഗം സമയവും കളി നിയന്ത്രിച്ചെന്നുമാണ് ഇവാൻ വുകോമനോവിച്ച് പറയുന്നത്‌. ഫൈനൽ തേഡിൽ തന്റെ ടീം സൃഷ്ടിച്ച അവസരങ്ങളെല്ലാം നിലവാരമുള്ളതായിരുന്നുവെന്ന് പറഞ്ഞ അദ്ദേഹം, ആ ഫൈനൽ ടച്ച് ഇല്ലാതെ പോയത് ടീമിനെ വിജയത്തിൽ നിന്ന് തടഞ്ഞു എന്ന തരത്തിലാണ് സംസാരിച്ചത്.
"ഇതൊരു നല്ല മത്സരമായിരുന്നു. മത്സരം കൈകാര്യം ചെയ്യാനും അത് നിയന്ത്രിക്കാനുമുള്ള പദ്ധതി ഞങ്ങൾക്കുണ്ടായിരുന്നു. ഇന്ന് ഭൂരിഭാഗം സമയവും ഞങ്ങൾ കളി നിയന്ത്രിച്ചു. ഫൈനൽ തേഡിൽ സൃഷ്ടിക്കപ്പെട്ട അവസരങ്ങളെല്ലാം മികച്ചതായിരുന്നു. എന്നാൽ ആ ലാസ്റ്റ് ടച്ച് ഉണ്ടായിരുന്നില്ല." ഇവാൻ പറഞ്ഞു നിർത്തി.
ബ്ലാസ്റ്റേഴ്സ് താരങ്ങളെ അഭിനന്ദിച്ച് ഇവാൻ
ബെംഗളൂരുവിനെതിരായ മത്സരത്തിൽ പരാജയം നേരിടേണ്ടി വന്നെങ്കിലും മൈതാനത്ത് നന്നായി കളിച്ച തന്റെ താരങ്ങളെ അഭിനന്ദിക്കാൻ ഇവാൻ വുകോമനോവിച്ച് മറന്നില്ല. തന്റെ കളികാർ മികച്ച പ്രകടനം കാഴ്ച വെച്ചു. പരിശീലകൻ എന്ന നിലയിൽ ഞാൻ അതിൽ അഭിമാനിക്കുന്നു. ബെംഗളൂരു എഫ് സി ഒരു മികച്ച ടീമാണ്. ഇത് കടുപ്പമേറിയ ഒരു മത്സരമായിരുന്നു." ഇവാൻ പറഞ്ഞു.
വ്യക്തിഗത പിഴവുകൾ പോയിന്റുകൾ നഷ്ടപ്പെടുത്തുന്നു
"സെറ്റ് പീസുകളിലൂടെ, പ്രത്യേകിച്ച് ബെംഗളൂരു എഫ് സിയെ പ്രതിരോധിക്കുന്നത് പ്രയാസമുള്ള കാര്യമാണ്. സാഹചര്യം നല്ല രീതിയിൽ കൈകാര്യം ചെയ്യാൻ മികച്ച ഏകാഗ്രത വേണം, ഒപ്പം വ്യക്തിഗത പിഴവുകൾ ഒഴിവാക്കണം അതാണ് മത്സരത്തിൽ വ്യത്യാസം വരുത്തുന്നത്‌. വ്യക്തിഗത പിഴവുകൾ നമുക്ക് പോയിന്റുകൾ നഷ്ടപ്പെടുത്തുന്നു." ഇവാൻ പറഞ്ഞു നിർത്തി.
ലൂണക്ക് അടുത്ത കളി നഷ്ടമാകും
ബെംഗളൂരു എഫ് സിക്കെതിരായ മത്സരത്തിൽ ബ്ലാസ്റ്റേഴ്സ് സൂപ്പർ താരം അഡ്രിയാൻ ലൂണ മഞ്ഞക്കാർഡ് കണ്ടിരുന്നു. മത്സരത്തിന്റെ എഴുപത്തിയഞ്ചാം മിനുറ്റിൽ റോഷൻ നവോറമിനെതിരെ നടത്തിയ ഫൗളാണ് ലൂണയുടെ മഞ്ഞക്കാർഡിലേക്ക് നയിച്ചത്. ഇതോടെ ഈ സീസണിൽ ലൂണക്ക് 4 മഞ്ഞക്കാർഡുകളായി. ഐ എസ് എൽ നിയമം അനുസരിച്ച് നാല് മഞ്ഞക്കാർഡുകളാകുന്ന താരത്തിന് ടീമിന്റെ അടുത്ത കളി നഷ്ടമാകും. ഇതിനാൽ കേരള ബ്ലാസ്റ്റേഴ്സിന്റെ അടുത്ത മത്സരത്തിൽ ലൂണക്ക് കളിക്കാനാവില്ല. ലൂണയില്ലാതെ ബ്ലാസ്റ്റേഴ്സ് കളിക്കാൻ പോകുന്ന ആദ്യ മത്സരം കൂടിയാകും അത്. ലീഗ് അവസാന ഘട്ടത്തിലേക്ക് എത്തിയിരിക്കുന്ന സാഹചര്യത്തിൽ ലൂണയെപ്പോലൊരു താരത്തെ നഷ്ടമാകുന്നത് ബ്ലാസ്റ്റേഴ്സിന് നൽകുന്ന തിരിച്ചടി ചെറുതൊന്നുമല്ല.
ഇനി ബ്ലാസ്റ്റേഴ്സിന്റെ ലക്ഷ്യം
ഐ എസ് എൽ പോയിന്റ് പട്ടികയിൽ നിലവിൽ 18 കളികളിൽ 31 പോയിന്റുകളുമായി മൂന്നാം സ്ഥാനത്താണ് കേരള ബ്ലാസ്റ്റേഴ്സ്. രണ്ട് മത്സരം മാത്രം ബാക്കി നിൽക്കെ രണ്ടാം സ്ഥാനത്ത് ഫിനിഷ് ചെയ്ത് സെമിയിലേക്ക് നേരിട്ട് യോഗ്യത നേടാമെന്ന ബ്ലാസ്റ്റേഴ്സിന്റെ പ്രതീക്ഷകൾ ഏറെക്കുറെ അവസാനിച്ചു. നിലവിൽ രണ്ടാം സ്ഥാനത്തുള്ളത് 17 കളികളിൽ 36 പോയിന്റുള്ള ഹൈദരാബാദാണ്. അവരെ മറികടന്ന് രണ്ടാം സ്ഥാനത്തെത്തുക എന്നത് ഇനി ഏറെക്കുറെ അസംഭവ്യമായ കാര്യമാണ്. അതിനാൽ ഇനി ബ്ലാസ്റ്റേഴ്സിന്റെ ലക്ഷ്യം മൂന്നാം സ്ഥാനത്തോ നാലാം സ്ഥാനത്തോ ഫിനിഷ് ചെയ്യുന്നത് ആകും. കാരണം ഇങ്ങനെ സംഭവിച്ചാൽ സെമി യോഗ്യതക്കായുള്ള നോക്കൗട്ട് മത്സരം കൊച്ചിയിൽ സ്വന്തം കാണികൾക്ക് മുന്നിൽ വെച്ചു കളിക്കാൻ അവർക്കാവും.
Also Read : കേരള ബ്ലാസ്റ്റേഴ്സിലേക്ക് വരാനുള്ള കാരണം വെളിപ്പെടുത്തി ഡാനിഷ് ഫാറൂഖ്
ബ്ലാസ്റ്റേഴ്സിന്റെ ശേഷിക്കുന്ന മത്സരങ്ങൾ
ഇനി രണ്ട് മത്സരങ്ങളാണ് ലീഗ് ഘട്ടത്തിൽ കേരള ബ്ലാസ്റ്റേഴ്സിന് ശേഷിക്കുന്നത്. ഇത് രണ്ടും ലീഗിലെ ഏറ്റവും കരുത്തരായ ടീമുകൾക്കെതിരെയാണ്. ഈ മാസം പതിനെട്ടിന് എടികെ മോഹൻ ബഗാനെ നേരിടുന്ന ബ്ലാസ്റ്റേഴ്സ് ഇരുപത്തിയാറിന് ഹൈദരാബാദിനെതിരെയും കളിക്കും. ഇതിൽ ഒന്നിൽ ജയിച്ചാൽ ബ്ലാസ്റ്റേഴ്സിന്റെ പ്ലേ ഓഫ് യോഗ്യത ഉറപ്പാകും. അല്ലെങ്കിൽ പ്ലേ ഓഫ് യോഗ്യത ഉറപ്പിക്കാൻ മറ്റ് ടീമുകളുടെ മത്സരഫലങ്ങൾ മഞ്ഞപ്പടക്ക് ആശ്രയിക്കേണ്ടി വരും.
Read Latest Sports News and Malayalam News