പോയിന്റ് പട്ടികയിൽ മൂന്നാം സ്ഥാനത്തോ നാലാം സ്ഥാനത്തോ എത്തിയാൽ പ്ലേ ഓഫിൽ ഹോം ആനുകൂല്യം ലഭിക്കുമെന്നതിനാൽ ജയം മാത്രമാകും അവസാന കളിയിൽ മഞ്ഞപ്പടയുടെ ലക്ഷ്യം. പ്ലേ ഓഫ് ഉറപ്പിച്ച് അടുത്ത മത്സരം കളിക്കാനിറങ്ങുന്ന ബ്ലാസ്റ്റേഴ്സിന് പക്ഷേ വലിയ തലവേദന സമ്മാനിക്കുന്ന ഒരു കാര്യമുണ്ട്. എന്താണ് അത്?
ബ്ലാസ്റ്റേഴ്സിന് തലവേദനയാവുന്ന മഞ്ഞക്കാർഡ് നിയമം
ഇന്ത്യൻ സൂപ്പർ ലീഗിലെ നിയമപ്രകാരം നാലാമത്തേയും, ഏഴാമത്തേയും, ഒൻപതാമത്തേയും മഞ്ഞക്കാർഡ് കാണുന്ന ഒരു കളികാരന് ടീമിന്റെ അടുത്ത മത്സരത്തിൽ കളിക്കാനാവില്ല. പ്ലേ ഓഫിലെത്തുന്ന ടീമിലെ ഒരു താരം ലീഗ് ഘട്ടത്തിലെ അവസാന മത്സരത്തിലാണ് ഇത്തരത്തിൽ കാർഡ് വാങ്ങുന്നതെങ്കിൽ പ്ലേ ഓഫിലെ ആദ്യ മത്സരത്തിൽ നിന്ന് ഇവർക്ക് സസ്പെൻഷൻ ലഭിക്കും. സത്യത്തിൽ കേരള ബ്ലാസ്റ്റേഴ്സിന് വളരെയധികം ആശങ്ക സമ്മാനിക്കുന്ന കാര്യമാണിത്.
അഞ്ച് ബ്ലാസ്റ്റേഴ്സ് താരങ്ങൾ സസ്പെൻഷന് അരികിൽ
പ്ലേ ഓഫിലേക്ക് ഒരു മത്സരത്തിന്റെ മാത്രം ദൂരം ബാക്കിയിരിക്കെ അഞ്ച് ബ്ലാസ്റ്റേഴ്സ് താരങ്ങളാണ് സസ്പെൻഷന് വക്കിലുള്ളത്. ഇതിൽ ഹൈദരാബാദ് എഫ് സിക്കെതിരെ നടക്കാനിരിക്കുന്ന അടുത്ത മത്സരത്തിൽ മഞ്ഞക്കാർഡ് ലഭിക്കുന്നവർക്ക് പ്ലേ ഓഫിലെ നോക്കൗട്ട് മത്സരത്തിൽ ബ്ലാസ്റ്റേഴ്സിനായി കളിക്കാനാവില്ല. 6 മഞ്ഞക്കാർഡുമായി മധ്യനിര സൂപ്പർ താരം ഇവാൻ കലിയൂഷ്നി, 3 വീതം കാർഡുകളുമായി പ്രതിരോധ താരങ്ങളായ ഹർമൻജോത് ഖബ്ര, നിഷു കുമാർ മധ്യനിര താരം ജീക്സൺ സിംഗ്, ഗോൾകീപ്പർ പ്രഭ്സുഖൻ സിംഗ് ഗിൽ എന്നിവരാണ് സസ്പെൻഷന് തൊട്ടരികിൽ.
4 പേരും ബ്ലാസ്റ്റേഴ്സിന്റെ സ്റ്റാർട്ടിംഗ് ഇലവനിലെ പ്രധാനികൾ
സസ്പെൻഷന് അരികെ നിൽക്കുന്ന 5 താരങ്ങളിൽ 4 പേരും കേരള ബ്ലാസ്റ്റേഴ്സിന്റെ സ്റ്റാർട്ടിംഗ് ഇലവനിലെ സ്ഥിരം മുഖങ്ങളാണ്‌. മധ്യനിരയിലെ മിന്നും താരം ഇവാൻ കലിയൂഷ്നി തന്നെയാണ് ഇതിൽ ഏറ്റവും പ്രധാനി. ഈ സീസണിൽ ബ്ലാസ്റ്റേഴ്സിന്റെ ഏറ്റവും മികച്ച താരങ്ങളിൽ ഒരാളായ കലിയൂഷ്നിയില്ലാതെ ബ്ലാസ്റ്റേഴ്സ് പ്ലേ ഓഫ് കളിക്കുന്ന കാര്യം ആരാധകർക്ക് ചിന്തിക്കാനേ കഴിയില്ല.
ഗോൾകീപ്പർ പ്രഭ്സുഖൻ ഗിൽ ഇല്ലാത്തതിനെക്കുറിച്ചും ആലോചിക്കാനാവില്ല. ബാക്കപ്പ് ഗോൾകീപ്പറായി സീനിയർ താരം കരൺജിത് സിംഗ് ഉണ്ടെങ്കിലും ഗിൽ വല കാക്കുന്നത് തന്നെയാണ് കൂടുതൽ നല്ലത്. മധ്യനിരയിലെ അവിഭാജ്യഘടകമായ ജീക്സണെ നഷ്ടമാകുന്നതും ബ്ലാസ്റ്റേഴ്സിന് തിരിച്ചടിയാകും. നിഷു കുമാർ, ഹർമൻജോത് ഖബ്ര എന്നിവരാണ് മറ്റ് താരങ്ങൾ. ഇതിൽ നിഷു ടീമിന്റെ സ്റ്റാർട്ടിംഗ് ഇലവനിലെ സ്ഥിരം സാന്നിധ്യമാണ്.
കൂടുതൽ ശ്രദ്ധയോടെ കളിക്കണം
പോയിന്റ് പട്ടികയിൽ രണ്ടാം സ്ഥാനത്ത് ഫിനിഷ് ചെയ്ത് സെമിയിലേക്ക് യോഗ്യത നേടിയ ഹൈദരാബാദ് എഫ് സിയാണ് ലീഗിലെ അവസാന മത്സരത്തിൽ ബ്ലാസ്റ്റേഴ്സിന്റെ എതിരാളികൾ. ഈ മത്സരത്തിൽ കളിക്കുമ്പോൾ കുറച്ച് കൂടി കരുതൽ ബ്ലാസ്റ്റേഴ്സ് താരങ്ങൾ കാണിക്കണം, പ്രത്യേകിച്ച് സസ്പെൻഷന് തൊട്ടരികിലുള്ളവർ. അനാവശ്യമായ ഫൗളുകൾ നടത്തുന്നതും, ഡിലേയിംഗ് ടാക്ടിക്സ് പുറത്തെടുക്കുന്നതുമൊക്കെ ഒരു മഞ്ഞക്കാർഡ് നേടിക്കൊടുക്കാൻ ധാരാളം.
ഇനിയൊരു കാർഡ് വാങ്ങുന്നത് തന്റെ ടീമിന്റെ സെമി പ്രതീക്ഷകളെപ്പോലും പിന്നോട്ടടിക്കും എന്ന വസ്തുത താരങ്ങളുടെ ഉള്ളിലുണ്ടാവണം. ഒരു തരത്തിലും കളി പരുക്കൻ ആവാതിരിക്കാനും അനാവശ്യ പ്രശ്നങ്ങളിൽ ചെന്ന് ചാടാതിരിക്കാനും ഈ കളിയിൽ ഈ താരങ്ങൾ ശ്രദ്ധിക്കണം.
Also Read : അവൻ കാരണമാണ് ബ്ലാസ്റ്റേഴ്സ് തോൽക്കുന്നത്, എല്ലാവരും കുറ്റപ്പെടുത്തി, പിന്നീട് കണ്ടത് ഡയമാന്റകോസിന്റെ ഹീറോയിസം
ഈ സീസണിൽ മഞ്ഞക്കാർഡ് പണി കൊടുത്ത താരങ്ങൾ
ഈ സീസണിൽ ഇതിനകം 4 ബ്ലാസ്റ്റേഴ്സ് താരങ്ങൾക്കാണ് മഞ്ഞക്കാർഡ് അധികമായി കണ്ടതിന് സസ്പെൻഷൻ കിട്ടിയത്. ഉക്രൈൻ മിഡ്ഫീൽഡർ ഇവാൻ കലിയൂഷ്നി, പ്രതിരോധ താരം സന്ദീപ് സിംഗ്, മധ്യനിര താരം അഡ്രിയാൻ ലൂണ, മലയാളി യുവ താരം രാഹുൽ കെ പി എന്നിവരാണിത്. ഇവരിൽ എല്ലാവരുടേയും സസ്പെൻഷൻ നേരത്തെ കഴിഞ്ഞതാണെങ്കിൽ ഹൈദരാബാദ് എഫ് സിക്കെതിരെ നടക്കാനിരിക്കുന്ന മത്സരം രാഹുൽ കെ പിക്ക് സസ്പെൻഷൻ മൂലം വീണ്ടും നഷ്ടമാകും. ഇക്കുറി ഇത്തരത്തിൽ രാഹുലിന് നഷ്ടമാകുന്ന രണ്ടാം മത്സരം ആണിത്.
ബ്ലാസ്റ്റേഴ്സ് താരങ്ങളും മഞ്ഞക്കാർഡിന്റെ എണ്ണവും
17 മത്സരങ്ങളിൽ 6 മഞ്ഞക്കാർഡുകൾ കണ്ട ഇവാൻ കലിയൂഷ്നിയാണ് ഈ സീസണിലെ മഞ്ഞക്കാർഡ് കണക്കിൽ ബ്ലാസ്റ്റേഴ്സ് താരങ്ങളിൽ ഒന്നാമത്. 18 മത്സരങ്ങളിൽ 6 മഞ്ഞക്കാർഡ് ലഭിച്ച മലയാളി താരം രാഹുൽ കെ പി ഒപ്പമുണ്ട്. സന്ദീപ് സിംഗ്, അഡ്രിയാൻ ലൂണ എന്നിവർക്ക് 4 മഞ്ഞക്കാർഡുകളാണ് ലഭിച്ചത്‌.
മൂന്ന് മഞ്ഞക്കാർഡുകൾ ലഭിച്ചവർ- ഹർമൻജോത് ഖബ്ര, നിഷു കുമാർ, പ്രഭ്സുഖൻ ഗിൽ, ജീക്സൺ സിംഗ്. രണ്ട് മഞ്ഞക്കാർഡ് ലഭിച്ചവർ- മാർകോ ലെസ്കോവിച്ച്, ദിമിത്രിയോസ് ഡയമാന്റകോസ്, റൂയിവ ഹോർമിപാം, ഒരു മഞ്ഞക്കാർഡ് ലഭിച്ചവർ - സൗരവ് മണ്ഡൽ, ഡാനിഷ് ഫാറൂഖ്, ജെസൽ കർനെയ്റോ, വിക്ടർ മൊംഗിൽ, സഹൽ അബ്ദുൾ സമദ്.