നോക്കൗട്ടായതിനാൽ ഈ മത്സരം തോൽക്കുന്ന ടീം പുറത്തേക്കുള്ള വഴി കാണും. അതിനാൽ ഇരു കൂട്ടരും കൈയ്യും മെയ്യും മറന്ന് പോരാടുന്നത് ബെംഗളൂരുവിൽ കാണാം. അതേ സമയം മത്സരത്തിൽ സുന്ദര ഫുട്ബോളിന് സ്ഥാനമുണ്ടാവില്ലെന്നും ഏത് വിധേനയും ജയിക്കുകയാണ് തങ്ങളുടെ ലക്ഷ്യമെന്നും ബ്ലാസ്റ്റേഴ്സ് പരിശീലകൻ ഇവാൻ വുകോമനോവിച്ച് വ്യക്തമാക്കിക്കഴിഞ്ഞു. ടീം ജയത്തിന് വേണ്ടി ഏതറ്റം വരെയും പോവുമെന്ന് ഇവാൻ തന്നെ സൂചന നൽകിയതിനാൽ ബ്ലാസ്റ്റേഴ്സ് ആരാധകരും ഏറെ ആവേശത്തോടെയാണ് ഈ മത്സരത്തിനായി കാത്തിരിക്കുന്നത്.
ഏത് വിധേനയും ജയം നേടണം
ഏത് വിധേനയും ജയം നേടുക എന്നതാണ് പ്ലേ ഓഫിലെ സാഹചര്യം എന്ന് ഇവാൻ വുകോമനോവിച്ച് പറയുന്നു, "ഏത് വിധേനയും ജയം നേടുക എന്നതാണ് പ്ലേ ഓഫിൽ ലക്ഷ്യം വയ്ക്കുന്നത്. അതിൽ സുന്ദര ഫുട്ബോളിന് സ്ഥാനം ഇല്ല. മികച്ച ഫുട്ബോൾ ആണ് നിങ്ങൾ കളിച്ചത് എന്നത് ആരാധകരെ സംതൃപ്തരാക്കില്ല. കാരണം, മത്സരത്തിനു ശേഷം ഫലം എന്താണ് എന്നാണ് ഏവരും നോക്കുക. അതുകൊണ്ടു തന്നെ ശാരീരികമായ ഏറ്റുമുട്ടൽ ഉൾപ്പെടെയുള്ള സാഹചര്യമാണ് പ്ലേ ഓഫിൽ അരങ്ങേറുക. 2021 - 2022 സീസണിൽ ഫൈനലിൽ ഉൾപ്പെടെ അത്തരം സാഹചര്യങ്ങൾ ആയിരുന്നു. ഇത്തവണയും അതിന് മാറ്റം ഇല്ല - ഇവാൻ വുകോമനോവിച്ച് കൂട്ടിച്ചേർത്തു.
Also Read : ഈ സീസണിൽ ബ്ലാസ്റ്റേഴ്സിന് പറ്റിയ ഏറ്റവും വലിയ പ്രശ്നം അതായിരുന്നു, അവസാനം വെളിപ്പെടുത്തലുമായി ഇവാൻ വുകോമനോവിച്ച്
പ്രതിരോധ ഫുട്ബോൾ ഇഷ്ടമല്ല
"ഹോം മത്സരങ്ങളിൽ കേരള ബ്ലാസ്റ്റേഴ്സ് എഫ് സി മികച്ച പ്രകടനമാണ് കാഴ്ച വെച്ചത്. സ്വന്തം തട്ടകം എന്നത് ഏതൊരു ടീമിന്റെയും കരുത്താണ്. ഫൈനൽ തേർഡിലെ ഫിനിഷിംഗ് പ്രശ്നം കേരള ബ്ലാസ്റ്റേഴ്സ് എഫ് സിയെ ബാധിച്ചിരുന്നു. ഡിഫെൻസ് ഫുട്‌ബോളിൽ എനിക്ക് വിശ്വാസം ഇല്ല. കാരണം, ഫുട്‌ബോളിന്റെ സൗന്ദര്യത്തിന് എതിരാണ് അതെന്ന് ഞാൻ വിശ്വസിക്കുന്നു. കേരള ബ്ലാസ്റ്റേഴ്സ് എഫ് സി ആരാധകർക്കും ഡിഫെൻസീവ് ഫുട്ബോൾ ഇഷ്ടം അല്ലെന്നാണ് മനസിലാക്കാൻ സാധിച്ചത്. കൂടുതൽ കളിക്കാരെ ആകർഷിക്കാനും ടീം കരുപ്പിടിപ്പിക്കാനും കേരള ബ്ലാസ്റ്റേഴ്സ് എഫ് സിക്ക് സാധിച്ചു എന്നു വിശ്വസിക്കുന്നു - ഇവാൻ വുകോമനോവിച്ച് പറഞ്ഞു.
നിലവിലെ ഫോമിൽ ബെംഗളൂരുവിനെ വീഴ്ത്തുക ബ്ലാസ്റ്റേഴ്സിന് കഠിനം
അതേ സമയം നിലവിലെ ഫോമിൽ ബെംഗളൂരു എഫ് സിയെ തോൽപ്പിക്കുക കേരള ബ്ലാസ്റ്റേഴ്സിനെ സംബന്ധിച്ച് ഏറെ ദുഷ്കരമായിരിക്കുമെന്നാണ് വിലയിരുത്തൽ. സീസൺ പാതിഘട്ടംകഴിഞ്ഞപ്പോൾ മികവിലെത്തിയ ടീമാണ് ബെംഗളൂരുവെങ്കിൽ നേരെ മറിച്ചാണ് ബ്ലാസ്റ്റേഴ്സിന്റെ കാര്യത്തിൽ സംഭവിച്ചത്‌. ബെംഗളൂരു ഈ വർഷം കളിച്ച എട്ട് മത്സരങ്ങളിലും വിജയം നേടിയപ്പോൾ ബ്ലാസ്റ്റേഴ്സ് അവസാനമിറങ്ങിയ 9 ൽ 7 കളികളിലും തോൽവിയേറ്റുവാങ്ങി. ഫോം വെച്ച് നോക്കിയാൽ ബെംഗളൂരുവിന്റെ വിജയം ഉറപ്പാണെങ്കിലും പ്ലേ ഓഫിൽ ഇവാനും സംഘവും അദ്ഭുതങ്ങൾ പ്രവർത്തിക്കുമെന്ന പ്രതീക്ഷയിലാണ് ആരാധകർ.
Also Read : വിബിന്‍ മോഹനനെ പോലെ ഉള്ള കളിക്കാര്‍ ഇന്ത്യയില്‍ വിരളം; പറയുന്നത് മറ്റാരും അല്ല, സാക്ഷാല്‍ ഇവാന്‍ വുകോമനോവിച്ച്
കേരള ബ്ലാസ്റ്റേഴ്സും ബെംഗളൂരു എഫ് സിയും നേർക്കുനേർ
ബദ്ധവൈരികളായ കേരള ബ്ലാസ്റ്റേഴ്സ് എഫ് സിയും, ബെംഗളൂരു എഫ് സിയും തമ്മിലുള്ള നേർക്കുനേർ പോരാട്ടങ്ങളിൽ ബെംഗളൂരുവിന് മികച്ച മുൻ തൂക്കമുണ്ട്. കണക്കുകളിൽ ഇത് വ്യക്തവുമാണ്. ഐ എസ് എല്ലിൽ ഇതു വരെ 12 മത്സരങ്ങളിലാണ് ഇരു ടീമുകളും നേർക്കുനേർ വന്നത്. ഇതിൽ 7 എണ്ണത്തിൽ ബെംഗളൂരു എഫ് സി വിജയിച്ചപ്പോൾ, 3 കളികളിൽ മാത്രമാണ് കേരള ബ്ലാസ്റ്റേഴ്സിന് ജയം നേടാനായത്. രണ്ട് മത്സരങ്ങൾ സമനിലയിലായി. ഈ സീസണിൽ ഇരു ടീമുകളും തമ്മിൽ കൊച്ചിയിൽ വെച്ചു നടന്ന മത്സരത്തിൽ കേരള ബ്ലാസ്റ്റേഴ്സ് ജയം നേടിയപ്പോൾ, ബെംഗളൂരുവിൽ ആതിഥേയർ പകരം വീട്ടിയിരുന്നു.
Read Latest Sports News and Malayalam News