പ്യൂട്ടിയക്ക് പകരക്കാരൻ വന്നിട്ടില്ല
സെന്റര്‍ മിഡ്ഫീല്‍ഡ്, ഡിഫെന്‍സീവ് മിഡ്ഫീല്‍ഡ് അതിമനോഹരമായി 2021 - 2022 സീസണില്‍ കൈകാര്യം ചെയ്ത പ്യൂട്ടിയ ( Puitea ) ആണ് 2022 - 2023 സീസണിന്റെ ഇടയില്‍ കേരള ബ്ലാസ്റ്റേഴ്സ് എഫ് സി വിട്ടത്. 2022 ഡിസംബര്‍ 29 ന് പ്യൂട്ടിയ കോല്‍ക്കത്തന്‍ വമ്പന്‍ ക്ലബ്ബായ എ ടി കെ മോഹന്‍ ബഗാനിലേക്ക് ( ATK Mohun Bagan F C ) ചേക്കേറി. പകരക്കാരനായി കേരള ബ്ലാസ്റ്റേഴ്സ് എഫ് സി ഇതുവരെ ഒരു താരത്തിനെ സ്വന്തമാക്കിയില്ല.
സന്ദീപിൻ്റെ പരിക്കും തിരിച്ചടി
അതേസമയം, പ്രതിരോധ നിരയില്‍ റൈറ്റ് ബാക്ക് സന്ദീപ് സിംഗ് കാലിനു പൊട്ടലേറ്റ് ഈ സീസണില്‍ നിന്ന് പുറത്തായിട്ടുണ്ട്. പകരം ഹര്‍മന്‍ജോത് സിംഗ് ഖബ്ര ടീമില്‍ ഉണ്ടെങ്കിലും മൂന്നാമതൊരു പകരക്കാരന്‍ ഈ പൊസിഷനില്‍ ഇല്ല എന്നതാണ് വാസ്തവം. അതായത് ഹര്‍മന്‍ജോത് സിംഗ് ഖബ്രയ്ക്ക് സസ്‌പെന്‍ഷനോ പരിക്കോ സംഭവിച്ചാല്‍ കേരള ബ്ലാസ്റ്റേഴ്സ് എഫ് സി ശരിക്കും വിഷമവൃത്തത്തില്‍ ആകും.
നിഷു കുമാര്‍ റൈറ്റ് ബാക്കിലും കളിക്കാന്‍ പ്രാപ്തനാണ് എന്നതു മാത്രമാണ് ഏക ആശ്വാസം. സെന്റര്‍ ഡിഫെന്‍ഡര്‍ ക്രൊയേഷ്യന്‍ താരം മാര്‍ക്കൊ ലെസ്‌കോവിച്ചിനും പരിക്കാണ്. പരിക്ക് ഭേദമായി താരം വൈകാതെ കളത്തില്‍ എത്തുമെന്നാണ് റിപ്പോര്‍ട്ട്.
ബ്ലാസ്റ്റേഴ്സിൽ ഔട്ട്ഗോയിംഗ് മാത്രം ഇൻകമിംഗ് ഇല്ല
ജനുവരി ട്രാന്‍സ്ഫര്‍ വിന്‍ഡോയില്‍ ഇന്ത്യന്‍ സൂപ്പര്‍ ലീഗ് പോയിന്റ് പട്ടികയിലെ ഏറ്റവും പിന്നിലുള്ള നോര്‍ത്ത് ഈസ്റ്റ് യുണൈറ്റഡ് എഫ് സി വരെ കളിക്കാരെ വാങ്ങുകയും റിലീസ് നടത്തുകയും ചെയ്തു എന്നതും ശ്രദ്ധേയം. ലീഗ് വിന്നേഴ്‌സ് ഷീല്‍ഡ് ലക്ഷ്യം വെച്ച് മുന്നേറുന്ന നിലവിലെ ഒന്നാം സ്ഥാനക്കാരായ മുംബൈ സിറ്റി എഫ് സിയും ജനുവരി ട്രാന്‍സ്ഫര്‍ വിന്‍ഡോ മുതലാക്കി. രണ്ട് കളിക്കാരെയാണ് മുംബൈ സിറ്റി എഫ് സി ജനുവരി ട്രാന്‍സ്ഫര്‍ വിന്‍ഡോയിലൂടെ എത്തിച്ചത്. ജനുവരി ട്രാന്‍സ്ഫര്‍ വിന്‍ഡോ ഒട്ടും ഉപയോഗിക്കാതിരുന്നത് ചെന്നൈയിന്‍ എഫ് സിയും ബംഗളൂരു എഫ് സിയും ആണ്. ഈ രണ്ട് ക്ലബ്ബുകളും ആരെയും പുറത്തേക്കും വിട്ടില്ല അകത്തേക്ക് സ്വീകരിച്ചും ഇല്ല. പുറത്തേക്ക് കളിക്കാരെ വിട്ടതില്‍ പുതിയതായി കരാറില്‍ കളിക്കാരെ എടുക്കാതിരുന്ന ഏക ക്ലബ് കേരള ബ്ലാസ്റ്റേഴ്സ് എഫ് സി ആണ് എന്നതും ശ്രദ്ധേയം.
പുതിയ കളികാർക്കായി ശ്രമം നടത്തുന്നു
ജനുവരി ട്രാന്‍സ്ഫര്‍ വിന്‍ഡോയില്‍ കേരള ബ്ലാസ്റ്റേഴ്സ് എഫ് സി പുതിയ കളിക്കാരെ സ്വന്തമാക്കാന്‍ ശ്രമം നടത്തുന്നുണ്ട് എന്നാണ് സൂചന. എന്നാല്‍, ഇതു സംബന്ധിച്ച് അന്തിമ തീരുമാനങ്ങള്‍ ഒന്നും ഇതുവരെ പുറത്തു വന്നിട്ടില്ല. അതേസമയം, റിസേര്‍വ് സംഘത്തില്‍ നിന്ന് രണ്ട് കളിക്കാരെ കേരള ബ്ലാസ്റ്റേഴ്സ് എഫ് സി സീനിയര്‍ ടീമിലേക്ക് പ്രമോട്ട് ചെയ്തിട്ടുണ്ട്. ഇരട്ടകളായ 20 കാരന്‍ ഫോര്‍വേഡ് മുഹമ്മദ് ഐമനും മിഡ്ഫീല്‍ഡര്‍ മുഹമ്മദ് അസ്ഹറുമാണ് ആ രണ്ട് കളിക്കാര്‍. ജനുവരി 20ന് ആയിരുന്നു ഈ ഇരട്ട സഹോദരന്മാരെ സീനിയര്‍ ടീമിലേക്ക് ക്ഷണിച്ചത്.
Also Read : ബ്ലാസ്റ്റേഴ്സ് ആരാധകര്‍ക്ക് ആശ്വാസ വാര്‍ത്ത; പരിക്കേറ്റ സൂപ്പര്‍ താരം പരിശീലനത്തിന്
ഇനി 6 മത്സരങ്ങൾ
2022 - 2023 സീസണില്‍ ഞായറാഴ്ച ( 29 - 1 - 2023 ) നോര്‍ത്ത് ഈസ്റ്റ് യുണൈറ്റഡ് എഫ് സിക്ക് എതിരേ നടക്കുന്നത് ഉള്‍പ്പെടെ ആറ് മത്സരങ്ങളാണ് കേരള ബ്ലാസ്റ്റേഴ്സ് എഫ് സിക്ക് ലീഗ് റൗണ്ടില്‍ ശേഷിക്കുന്നത്. നിലവില്‍ 14 മത്സരങ്ങളില്‍ 25 പോയിന്റുമായി നാലാം സ്ഥാനത്താണ് കേരള ബ്ലാസ്റ്റേഴ്സ് എഫ് സി.
ലീഗ് റൗണ്ടില്‍ ആദ്യ ആറ് സ്ഥാനക്കാര്‍ക്ക് പ്ലേ ഓഫ് യോഗ്യത ലഭിക്കും. ഐ എസ് എല്‍ പോരാട്ടത്തിനു പിന്നാലെ കേരളം ആതിഥേയത്വം വഹിക്കുന്ന സൂപ്പര്‍ കപ്പും കേരള ബ്ലാസ്റ്റേഴ്സ് എഫ് സിക്ക് മുന്നിലുണ്ട്. അതുകൊണ്ടു തന്നെ വരും ദിനങ്ങളില്‍ ആവേശകരമായ സൈനിംഗുകള്‍ കേരള ബ്ലാസ്റ്റേഴ്സ് എഫ് സി പ്രഖ്യാപിക്കും എന്ന പ്രതീക്ഷയിലാണ് ആരാധകര്‍.
Read Latest Sports News and Malayalam News